"ރައްޔިތުންގެ އަޑު" ގައި ރައީސް މުހައްމަދު މުއިއްޒުއާއެކު ބައިވެރިވާން ބޭނުންވާ މީހުން ނަން ނޯޓު ކުރުމަށް ރައީސް އޮފީހުން މިއަދު ހުޅުވާލައިފި އެވެ.
މި ފުރުސަތު ހުޅުވާލީ ރާއްޖޭގެ އިންތިހާބީ 93 ދާއިރާގެ ތެރެއިން އިހަވަންދޫ ދާއިރާ، ފޮނަދޫ ދާއިރާ، މީދޫ ދާއިރާ، ވިލިމާލެ ދާއިރާ، މައްޗަންގޮޅި ދެކުނު ދާއިރާ، މާމިގިލި ދާއިރާ އަދި ތިނަދޫ އުތުރު ދާއިރާއަށް ނިސްބަތްވާ ރައްޔިތުންނަށެވެ.
މިގޮތުން އެ ދާއިރާތަކަށް ނިސްބަތްވާ ރައްޔިތުން ރައްޔިތުންގެ އަޑު ޕޯޓަލް މެދުވެރިކޮށް އޮގަސްޓް 17، ވާ ހޯމަ ދުވަހުގެ ރޭ 12:00 ގެ ކުރިން ނަން ނޯޓު ކުރުމުގެ ފުރުސަތު ވަނީ ހުޅުވާލައިފަ އެވެ.
ރައްޔިތުންގެ އަޑުގައި ހުޅުމާލެ އުތުރު ދާއިރާ، ހުޅުދޫ ދާއިރާ، ހޯރަފުށި ދާއިރާ އަދި ހުޅުމާލެ މެދު ދާއިރާއަށް ނިސްބަތްވާ ރައްޔިތުން ނަން ނޯޓުކުރަން މީގެ ކުރިން ހުޅުވާލައި ސުންގަޑި އޮތީ ހަމަވެފަ އެވެ. އެ ޕްރޮގްރާމް މިހާތަނަށް ގެނެސްދީފައެއް ނުވެ އެވެ.
ރައްޔިތުންނާ ގާތުން ބައްދަލުކޮށް ރައްޔިތުންގެ އަޑު އެހުމަށް ވަކިވަކި ދާއިރާތަކުން ސީދާ އެމަނިކުފާނާ ވަކިން ބައްދަލުކުރައްވައި ވާހަކަދެއްކުމުގެ ފުރުސަތު ފަހިވާ ޕްރޮގްރާމެއް ފައްޓަވާނެ ކަމަށް މުއިއްޒު އިއުލާންކުރެއްވީ މިދިޔަ ޖޫން މަހު އެވެ.
ރައްޔިތުންނާ ވީހާވެސް ގާތުން ހިދުމަތް ކުރައްވައި، ރައްޔިތުންގެ އަޑުއައްސަވާނެ ކަމަށް ވިދާޅުވެ މުއިއްޒު އަހާ ފޯރަމްފަދަ ތަފާތު އެކި ޕްރޮގްރާމްތަކެއް އިއުލާންކުރެއްވި ނަމަވެސް، އެ ޕްރޮގްރާމްތައް ގަވާއިދުން ކުރިއަށްނުގެންދެވޭކަން ފާހަގަކުރެވެ އެވެ.
ނޫސްވެރިންނާވެސް ގަވާއިދުން ކޮންމެ ހަފްތާއެއްގެ ހޯމަ ދުވަހު ބައްދަލުކުރައްވާނެ ކަމަށް ފެބްރުއަރީ 5، ގައި މުއިއްޒު ވިދާޅުވި އެވެ. ނަމަވެސް އޭގެ ފަހުން 25 ހަފްތާ ފާއިތުވެފައިވާއިރު، މުއިއްޒަށް ނޫސްވެރިންނާ ބައްދަލުކުރެއްވުނީ އެންމެ އަށް ހަފްތާގަ އެވެ. އެންމެ ފަހުން ޖޫން 29، ގައި ނޫސްވެރިންނާ ބައްދަލުކުރެއްވި ފަހުންވެސް ހަ ހަފްތާ ވަނީ ފާއިތުވެފަ އެވެ.
