ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ ބައްދަލުކުރައްވަން ރައީސް މުހައްމަދު މުއިއްޒު ވެވަޑައިގެންނެވި ވައުދާ ހިލާފަށް އެމަނިކުފާނު ނޫސްވެރިންނާ ބައްދަލު ނުކުރައްވާތާ ހަ ހަފުތާ ފާއިތުވެއްޖެ އެވެ.
މުއިއްޒު އެންމެ ފަހުން ނޫސްވެރިންނާ ބައްދަލުކުރެއްވީ ޖޫން 29، ގަ އެވެ. އޭގެ ފަހުން ހަ ހަފުތާ ފާއިތުވެގެންދިޔައިރު، ފަސް ހަފުތާގެ ހޯމަ ދުވަސް ބަންދު ދުވަހަކާ ދިމާނުވާކަން ފާހަގަކުރެވެ އެވެ.
މުއިއްޒު އިއްޔެ ނޫސްވެރިންނާ ބައްދަލުނުކުރައްވާތީ އެކަމާ ގުޅޭގޮތުން އަދަދު އިން ސުވާލުކުރުމުން ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) އެއްވެސް އެއްޗެއް ވިދާޅެއް ނުވެ އެވެ.
ނަމަވެސް މިދިޔަ ހަފްތާގައި މުންދު ވިދާޅުވީ އެ ހަފްތާގައި މުއިއްޒަށް ނޫސްވެރިންނާ ބައްދަލުނުކުރެއްވުނީ މީޓީން ޝެޑިއުލް ހުރި ގޮތުން ކަމަށާއި އެމަނިކުފާނަށް ވަގުތުވީ ވަރަކުން ނޫސްވެރިންނާ ބައްދަލުކުރައްވާނެ ކަމަށެވެ.
މި އަހަރުގެ މާޗު މަހުން ފެށިގެން ކޮންމެ ހަފުތާއަކު ވެސް ނޫސްވެރިންނާ ބައްދަލުކުރައްވާނެ ކަމަށް މުއިއްޒު ވިދާޅުވީ މި އަހަރުގެ ރިޔާސީ ބަޔާން އިއްވަވަމުން ފެބްރުއަރީ 5، ގަ އެވެ.
މުއިއްޒު އެހެން ވިދާޅުވި ނަމަވެސް، މި ފަހަކަށް އައިސް ގިނަ ހަފުތާތަކުގައި މާލޭގައި ހުންނެވާއިރުވެސް، ނޫސްވެރިންނާ ބައްދަލެއް ނުކުރައްވަ އެވެ. އެމަނިކުފާނު އެންމެ ފަހުން ވެސް ނޫސްވެރިންނާ ބައްދަލުކުރެއްވީ ތިން ހަތުފާގެ މެދުކެނޑުމަކަށްފަހު އެވެ.
މާޗު 2، ގައި ނޫސްވެރިންގެ ބައްދަލުވުންތައް ބާއްވަން ފެށި ފަހުން 25 ހަފުތާ ފާއިތުވެގެން ގޮސްފައިވާއިރު އޭގެ ތެރެއިން މުއިއްޒުއަށް ނޫސްވެރިންނާ ބައްދަލުކުރެވިފައިވަނީ އަށް ހަފުތާގަ އެވެ.
ނޫސްވެރިންނާ ކޮންމެ ހަފުތާއަކު ބައްދަލު ކުރައްވާނެ ކަމުގެ ވައުދާއެކު މާޗު މަހު ނޫސްވެރިންގެ ބައްދަލުވުންތައް ބާއްވަން ފެށުމުގެ ކުރިން، ނޫސްވެރިންގެ ބައްދަލުވުމެއް ބޭއްވީ މެއި 3، 2025، ގަ އެވެ. އެއީ އެމަނިކުފާނުގެ ވެރިކަމުގައި ބޭއްވި ދެވަނަ ނޫސްވެރިންގެ ބައްދަލުވުމެވެ. މި ދައުރުގެ ފުރަތަމަ ނޫސްވެރިންގެ ބައްދަލުވުން މުއިއްޒު ބޭއްވެވީ ޑިސެމްބަރު 5، 2023، ގަ އެވެ.
