ލިވަޕޫލް (އޭޕްރީލް 26) - ލިވަޕޫލްގެ މިސްރު ފޯވާޑް، މުހައްމަދު ސަލާހުގެ ފަޔަށް އަނިޔާވެ، ރޭ ކްރިސްޓަލް ޕެލަސްއާ ދެކޮޅަށް ކުޅުނު މެޗުގައި ބަދަލުކުރަން ޖެހުނުއިރު، މިއީ، އޭނާ ލިވަޕޫލުން ފެނުނު ފަހު މެޗަށް ވުމުގެ ފުރުސަތު އޮތް ކަމަށް ދޭހަވާ ގޮތަށް އެ ޓީމުގެ ކޯޗު، އާނާ ސްލޮޓް ވާހަކަ ދައްކައިފި އެެވެ.
އުމުރުން 33 އަހަރުގެ ސަލާހު ވަނީ މި ސީޒަނަށް ފަހު ލިވަޕޫލް ދޫކޮށްލާނެކަން އިއުލާނުކޮށްފަ އެވެ. ޕެލަސް އަތުން 3-1 އިން ލިވަޕޫލް މޮޅުވި މެޗުގެ 59 ވަނަ މިނިޓްގައި ސަލާހު ވަނީ ބަދަލުކޮށްފަ އެވެ. އޭނާ ފޭބީ ވާތު ފަޔަށް ލިބުނު އަނިޔާއަކާ ހެދި އެވެ. ލިވަޕޫލުން މި ސީޒަނުގައި ކުޅޭ ފަހު މެޗު އޮތީ އަންނަ މަހުގެ 24 ވަނަ ދުވަހު އަމިއްލަ ދަނޑުގައި ބްރެންޓްފޯޑާ ދެކޮޅަށެވެ. އެ މެޗަށް ސަލާހު ފިޓްވެދާނެތޯ ކުރި ސުވާލަށް ސްލޮޓް ބުނީ، އަދި އެ ވާހަކަ ދައްކަން އަވަސް ކަަމަށެވެ.
"އަނިޔާގެ ތަފްސީލްގެ ވާހަކަ ދައްކަން އަދި އަވަސް. އެކަމަކު، އަހަރެމެން އެންމެންނަށް ވެސް އެނގޭ މޯ (ސަލާހު) އެ ގޮތަށް ދަނޑުން ފައިބާނީ ކުޑަ އަނިޔާއެއް ވެގެން ނޫން ކަން. އަަހަންނަށް ވިސްނެނީ އެއީ ކުޑަ ކަމެއް ނޫން ގޮތަށް. ދެން، އަހަރެމެން ދެނެގަންނަން ޖެހޭނީ އަނިޔާެގެ އިތުރު ތަފްސީލްތައް ޓެސްޓްތައް ހަދައިގެން،" މެޗަށް ފަހު ދިން ފުރަތަމަ އިންޓަވިއުގައި، ސްލޮޓް ބުންޏެވެ.
އޭގެ ފަހުން، ނޫސްވެރިންގެ ބައްދަލުވުމުގެ ތެރެއިން ވާހަކަ ދައްކަމުން ސްލޮޓް ބުނީ، ހަގީގަތުގައި އޭނާ އަށް ފެންނަ ގޮތުގައި، ސަލާހު ދަނޑުން ފޭބި ގޮތުން ބެލެވެނީ އޭނާ ދެން މި ސީޒަނުގައި އިތުރު މެޗެއްގައި ނުކުޅެވޭނެކަން ކަމުގަައި ކަމަށެވެ.
"އެއީ، އޭނަ (ސަލާހު) ދަނޑުން ފޭބި ގޮތަށް ބަލާފައި. އެކަން ސަލާހު އަށް ވެސް އިހުސާސްވޭ. އެއީ، ސީޒަނުގައި ބާކީ މި އޮތީ މަދު ހަފްތާތަކެއް. އަހަރެމެން އުންމީދުކުރަނީ އަދި ސަލާހު (ލިވަޕޫލްގެ މެޗުތަކުން) ފެންނާނެ ކަމަށް،" ސްލޮޓް ބުންޏެވެ.
ކުރިން ޗެލްސީ އަށް ކުޅުނު ސަލާހު، ލިވަޕޫލާ ގުޅުނީ، 2017 ވަނަ އަހަރު އިޓަލީގެ ރޯމާ ދޫކޮށް ޖުމްްލަ އެކު، 45 މިލިއަން ޑޮލަރުގެ ޕެކޭޖެއްގަ އެވެ. އޭގެ ފަހުން، ތިން ފަހަރެއްގެ މަތިން ސަލާހު ލިވަޕޫލާ އެކު، އެއްބަސްވުމެއް ހަދައި، އެ ޓީމު ދޫކޮށްލަން މި ނިންމީ ނުވަ އަހަރު އެ ޓީމަށް ކުޅުމަށް ފަހު އެވެ. ސަލާހު ވަނީ ލިވަޕޫލަށް 435 މެޗުން 257 ލަނޑު ޖަހައިދީފަ އެވެ. އޭނާ އަކީ ލިވަޕޫލް ތާރީހުގައި އެ ޓީމަށް ތިން ވަނަ އަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. ސަލާހަށް ވުރެން ގިނައިން ލިވަޕޫލަށް ލަނޑު ޖަހައިދިނީ 346 ލަނޑު ޖެހި އިއަން ރަޝް އާއި 285 ލަނޑު ޖެހި ރޮޖާ ހަންޓް އެވެ.
