ލިވަޕޫލް (އޭޕްރީލް 16) - ލިވަޕޫލަަށް ކުޅެމުން އަންނަ ފްރާންސްގެ ފޯވާޑް، ހޫގޯ އެކިޓީކޭ އަށް ސީރިއަސް އަނިޔާއެއް ކުރިމަތިވެ، ނުވަ މަހެއްހާ ދުވަހަށް ކުޅުމާ ދުރުގައި ހުންނަން ޖެހިއްޖެ އެވެ.
ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި ޕީއެސްޖީއާ ދެކޮޅަށް ކުޅެނިކޮށް، އެކިޓީކޭ، 23،ގެ އަކިލީސް ޓެންޑަން އަށް އަނިޔާވެ، 31 ވަަަނަ މިނިޓްގައި އޭނާ ބަދަލުކުރީ އަށިގަނޑުގައި ބާލައިގެންނެވެ.
އެކިޓީކޭގެ އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގިގެންދިޔައީ އަނިޔާ ސީރިއަސް ކަމެވެ. އެ ޓެސްޓްތައް ލިވަޕޫލާއި ފްރާންސްގެ މެޑިކަލް ޓީމުތަކުން ވަނީ ދިރާސާކޮށްފަ އެވެ.
އެކިޓީކޭގެ މި އަނިޔާގެ ސަބަބުން ދެން އޭނާ އަށް މި އަހަރު އެނބުރި ކުޅުމަށް އާދެވުމުގެ ފުރުސަތު އޮތީ ކުޑަކޮށެވެ. އެހެންކަމުން، ޖޫން މަހު، އެމެރިކާ އާއި މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ވެސް އެކިޓީކޭ އަށް ގެއްލޭނެ އެވެ.
ފްރާންސް ފުޓްބޯޅަ ފެޑެރޭޝަން އިން ނެރުނު ބަޔާނެއްގައި ފްރާންސް ޓީމުގެ ކޯޗު ޑިޑިއޭ ޑެޝޯމްޕްސް ބުނެފައިވަނީ، އެކިޓީކޭ އަށް މި ފަހަރުގެ ވޯލްޑް ކަޕް ނުކުޅެވުމަކީ ދެރައެއް ކަމަށާއި މި ސީޒަނުގައި ލިވަޕޫލްގައި އަދި މި ފަހުން ފްރާންސްގައި އޭނާ އައީ ރަނގަޅު ކުޅުމެއް ދައްކަމުން ކަމަށެވެ.
މީގެ ކުރިން، އަކިލީސް ޓެންޑަންގެ ސީރިއަސް އަނިޔާއެއް ދިމާވި ފްރާންސްގެ ކުޅުންތެރިއަކީ ޕްރެސްނެލް ކިމްޕެމްބޭ އެވެ. އޭނާ އަށް ރަނގަޅަށް ފިޓްވެގެން އެނބުރި ކުޅުމަށް ނުކުމެވުނީ ދެ އަހަރެއްހާ ދުވަސް ފަހުންނެވެ.
ލިވަޕޫލުން އެކިޓީކޭ ގަތީ މިދިޔަ ޖުލައި މަހު، 95 މިލިއަން ޑޮލަރު، ފްރާންސްގެ އައިންޓްރަކް ފްރޭންކްފާޓަށް ދައްކައިފަ އެވެ. އޭނާ ވަނީ މި ސީޒަނުގައި މިހާތަނަށް ލިވަޕޫލަށް ކުޅެދިން ހުރިހާ މެޗެއްގައި 17 ގޯލު ޖަހައި، ހަ ގޯލު ޖަހަން ފުރުސަތު ތަނަވަސްކޮށްދީފަ އެވެ.
މިދިޔަ އަހަރު ފްރާންސްގެ ސީނިއާ ގައުމީ ޓީމުން ޖާގަ ހޯދަން ފެށި އެކިޓީކޭ ވަނީ މިހާތަނަށް އެ ޓީމަށް ކުޅެދިން އަށް މެޗުން ދެ ގޯލު ޖަހައިފަ އެވެ.
