މެޑްރިޑް (އޭޕްރީލް 8) - ޔުއެފާ ޗެމްޕިއަންސް ލީގުގައި ރޭ ކުޅުނު ކުއާޓާ ފައިނަލުގެ ފުރަތަމަ ލެގުގެ މެޗުތަކުން ބަޔާން މިއުނިކުން 2-1 އިން ރެއާލް މެޑްރިޑް ބަލިކުރިއިރު، ސްޕޯޓިން ލިޒްބަން އަތުން 1-0 އިން އާސެނަލް މޮޅުވެއްޖެ އެވެ.
ރެއާލްގެ ދަނޑު ސަންޓިއާގޯ ބާނަބާއުގައި ރޭ ކުޅުނު މެޗުން ބަޔާން މޮޅުވުމުގެ އެންމެ ބޮޑު ކްރެޑިޓެއް ހައްގުވަނީ އުމުރުން 40 އަހަރުގެ ގޯލްކީޕަރު، މެނުއަލް ނޯޔާ އަށެވެ. އެ ގޮތުން، ނޯޔާ ވަނީ ރެއާލުން ފޮނުވާލި ނުވަ ހަމަލާއެއް ހުއްޓުވައިފަ އެވެ. މިއީ، 2020 ވަނަ އަހަރުގެ ފަހުން، އެއް މެޗެއްގައި ނޯޔާ އެންމެ ގިނަ ހަމަލާ ހުއްޓުވާފައިވާ މެެޗެވެ.
ރޭގެ މެޗުގައި ބަޔާނުން ރަނގަޅު ކުޅުމަކާ އެކު މެޗު ފެށިއިރު، އެ ޓީމަށް ލީޑުނަގައިދޭން ގޯލު ކުރިމަތިން ޑަޔޫޓް އުޕަމެކާނޯ އަށް ލިބުނު ފުރުސަތުގައި ބޭނުން ނުހިފުނެވެ. ފުރަތަމަ ހާފު ނިމެން ހަތަރު މިނިޓަށް ވެފައި ވަނިކޮށް، ބަޔާނަށް ލީޑުނަގައިދިނީ ލުއިސް ޑިއާޒް އެވެ. މިއީ، މެޗުގެ 41 ވަނަ މިނިޓްގައި ސާޖް ގްނާބްރީ ދިން ބޯޅައަކުން އޭރިއާތެރެއިން ހަމަޖެހިލައިފައި ތިރިތިރިން ގޯލަށް ބޯޅަ ފޮނުވާލައިގެން ޑިއާޒް ޖެހި ގޯލެކެވެ.
ދެ ވަނަ ހާފުގެ ކުޅުން ފެށިގެން 21 ސިކުންތު ތެރޭގައި ބަޔާނުން ދެ ވަނަ ލަނޑު ޖެހި އެވެ. މިއީ، އޭރިއާ ރޮނގުކައިރިން ގޯލުގެ ތިރީ ކަނަށް ބޯޅަ އަމާޒުކޮށްލައިގެން ހެރީ ކޭން ކާމިޔާބުކުރި ގޯލެކެވެ.
ރެއާލުން ގޯލެއް ޖަހަން ކުރި މަސައްކަތް ކާމިޔާބުވީ، 74 ވަނަ މިނިޓްގަ އެވެ. މިއީ، ޓްރެންޓް އަލެކްސަންޑަ އާނޯލްޑް ނެގި ހުރަހަކަށް އަރައި ކީލިއަން އެމްބާޕޭ ޖެހި ގޯލެކެވެ. މިއީ، މި ފަހަރުގެ ޗެމްޕިއަންސް ލީގުގައި އެމްބާޕޭ ޖެހި 14 ވަނަ ގޯލެވެ.
ރޭގެ މެޗުގައި ލަނޑު ޖަހަން އެމްބާޕޭ އާއި ވިނީޝިއުސް ފޮނުވާލި ރަނގަޅު ގިނަ ހަމަލާތަކެއް ބަޔާންގެ ކީޕަރު ނޯޔާ ވަނީ ހުއްޓުވައިފަ އެވެ. އަދި، ވިނީޝިއުސް އަތުން ލަނޑު ޖަހާނެ ރަނގަޅު ހުސް ފުރުސަތުތަކެއް ގެއްލުނެވެ.
ސްޕޯޓިން ލިޒްބަން ދަނޑުގައި އާސެނަލް މޮޅުވި ހަމައެކަނި ގޯލު ޖެހީ މެޗުގެ އިތުރު ވަގުތުގެ ފުރަތަމަ މިނިޓްގަ އެވެ. މިއީ، އާސެނަލުން ބަދަލަކަށް އެރި ދެ ކުޅުންތެރިން ގުޅިގެން ކުރި އެޓޭކެއްގައި ޖެހި ގޯލެކެވެ. އެ ގޮތުން، ގަބްރިއެލް މާޓިނެލީ ތަނަަވަސްކޮށްދިން ފުރުސަތެއްގައި، އޭރިއާތެރެއިން ކައި ހަވާޓްޒް ވަނީ ހަމަޖެހިލައިފައި ގޯލަށް ބޯޅަ ފޮނުވާލައިދަ އެވެ.
އަމިއްލަ ދަނޑުގައި މި ފަހަރުގެ ޗެމްޕިއަންސް ލީގުގައި ބަލިނުވެ، ރޭގެ މެޗާ ކުރިމަތިލި ސްޕޯޓިން އިން މި މެޗުން މޮޅުވާން ރަނގަޅު ފުރުސަތުތަކެއް ހޯދި އެވެ. އެކަމަކު، އާސެނަލްގެ ކީޕަރު، ޑޭވިޑް ރާޔާ ވަނީ ސްޕޯޓިންގެ ހަމަލާތައް މަތަކޮށްފަ އެވެ.
އަންނަ ހަފްތާގައި އާސެނަލާއި ބަޔާން ދަނޑުގައި ކުޅޭ ދެ ވަނަ ލެގުގެ މެޗުތަކަށް ނުކުންނައިރު، މި ދެ ޓީމަށް ވެސް ވަނީ ފުރަތަމަ ލެގުގައި ހޯދި މޮޅާ އެކު ސެމީ ފައިނަލުގެ ފުރުސަތު ބޮޑުވެފަ އެވެ.
ޗެމްޕިއަންސް ލީގުގެ ކުއާޓާ ފައިނަލް ފަހު ދެ މެޗު މިރޭ އޮންނާނެ އެވެ. ބާސެލޯނާ އިން އެތުލެޓިކޯ މެޑްރިޑާ ކުޅޭއިރު، ޕީއެސްޖީން ބައްދަލުކުރާނީ ލިވަޕޫލާ އެވެ.
