ބާލިން (އޭޕްރީލް 12) - ޔޫނިއަން ބާލިންގެ ކޯޗަކަށް މެރީ-ލުއީސް އިޓާ، ހަމަޖެއްސުމާ އެކު، ޖަރުމަނުގެ ފުރަތަމަ ޑިިވިޝަން، ބުންޑަސްލީގާގެ ޓީމަކަށް ކޯޗުކޮށްދޭ ފުރަތަމަ އަންހެން ކޯޗުގެ ޝަރަފް، އޭނާ އަށް ލިބިއްޖެ އެވެ.
ކުރިން ޖަރުމަނުގެ އަންހެން ފުޓްބޯޅައިގެ އެންމެ މަތީ ފަންތީގައި ކުލުނު އިޓާ، 34، އަށް ޔޫނިއަން ބާލިންގެ ކޯޗުކަން ދީފައިވަނީ މި ސީޒަނުގެ ނިޔަލަށެެވެ. ޔޫނިއަން ބާލިންގެ ކޯޗަކަށް ހުރި، ސްޓެފަން ބޯމްގާޓް ވަނީ އިއްޔެ ކުޅުނު މެޗުން ލީގުގެ އެންމެ ފުލުގައި އޮތް ހެއިޑަންހައިމް އަތުން ޔޫނިއަން ބާލިން ބަލިވުމުން މަގާމުން ވަކިކޮށްފަ އެވެ.
ޖުމްލަ އެކު 18 ޓީމު ވާދަކުރާ ޖަރުމަނު ބުންޑަސްލީގާގައި، ޔޫނިއަން ބާލިން އޮތީ 11 ވަނައިގަ އެވެ. އެ ޓީމު އޮތީ ރެލިގޭޝަނަށް ވުރެން 11 ޕޮއިންޓް ކުރީގަ އެވެ. އެކަމަކު، މި އަހަރު ޖަރުމަނު ލީގުގައި މިހާތަނަށް ކުޅުނު 14 މެޗުން ޔޫނިއަން ބާލިން މޮޅުވީ ދެ މެޗުންނެވެ. އެހެންވެ، ބޯމްގާޓްގެ ރެކޯޑް ދަށްވެ، ޔޫނިއަން ބާލިން އިން ކޯޗު ބަދަލުކުރަން ނިންމީ އެވެ.
ޔޫނިއަން ބާލިންގެ 19 އަހަރުން ދަށުގެ ޓީމުގެ ކޯޗުކަން މިދިިޔަ އަހަރުގެ ޖުލައި އިން ފެށިގެން ކުރަމުން އަންނަ އިޓާ، އަންނަ ސީޒަނުގައި ޔޫނިއަން ބާލިން އަންހެން ޓީމުގެ ހެޑް ކޯޗުގެ ޒިންމާއާ ހަވާލުވާ ގޮތަށް ވަނި ހަމަޖެހިފަ އެވެ. އަދި، މިހާރު އޮތްގޮތުން، އެ މަގާމާ ހަވާލުވުމުގެ ކުރިން، މި ސީޒަނުގެ ބާކީބައިގައި ޔޫނިއަން ބާލިންގެ ފިރިހެން ޓީމުގެ ކޯޗުގެ ޒިންމާ ވެސް އިޓާ އަދާކުރާނެ އެވެ.
އެންމެ ފުރަތަމަ ޔޫރަޕްގައި އަންހެން ކޯޗަކަށް ފިރިހެން ޓީމެއްގެ ހެޑް ކޯޗުކަން ދިނީ 1999 ވަނަ އަހަރު އިޓަލީ ތިން ވަނަ ޑިވިޝަނުގަ އެވެ. މީގެ 25 އަހަރު ކުރިން، އިޓަލީގެ ތިން ވަނަ ޑިވިޝަނުގެ ކްލަބް، ވިޓާބެސޭ އިން ވަނީ ކޯޗަކަށް، ކެރޮލީން މޮރޭސް ހަމަޖައްސައިފަ އެވެ. އަދި، ކޮރީން ޑިއާސްރް ވަނީ، ފްރާންސްގެ ދެ ވަނަ ޑިވިޝަނުގައި ވާދަކުރަމުން އައި ކްލާމޯން ފޮންޓްގެ ކޯޗަކަށް 2014-2017 އަށް މަަސައްކަތްކޮށްފަ އެވެ. ފަހުން އޭނާ ވަނީ ފްރާންސްގެ އަންހެން ޓީމުގެ ކޯޗުކަމާ ހަވާލުވެފަ އެވެ.
