ބާސެލޯނާ (އޭޕްރީލް 11) - ސްޕެނިޝް ލީގުގައި މިރޭ ބާސެލޯނާ އިން އެސްޕަންޔޯލް އަތުން 4-1 އިން މޮޅުވެ، ލީގުގެ އެއް ވަނައިގައި ނުވަ ޕޮއިންޓަށް ލީޑުފުޅާކޮށް، މަގާމުގައި ހަމަޖެހިލައިފި އެވެ.
ލީގުގެ ރޭހުގައި ބާސެލޯނާއާ ވާދަކުރަމުން އައި ރެއާލް މެޑްރިޑުން ޖެހިޖެހިގެން ދެ ހަފްތާގައި މި ވަނީ ޕޮއިންޓްތަކެއް ނަގާލައިފަ އެވެ. މި ހަފްތާގައި ކުުޅުނު މެޗުން ޖިރޯނާއާ ވަނީ އެއްވަރުވެފަ އެވެ. ބާސެލޯނާ އިން މިރޭގެ މޮޅާ އެކު، އެއް ވަަަނައިގައި އޮތީ 31 މެޗުން 79 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް 31 މެޗުން ލިިބިފައި އޮތީ 70 ޕޮއިންޓެވެ.
އަމިއްލަ ދަނޑުގައި ކުޅުނު ބާސެލޯނާ އިން މިރޭގެ މެޗުގެ ފުރަތަމަ 25 މިނިޓް ތެރޭގައި ދެ ގޯލު ޖެހި އެވެ. މި ދެ ލަނޑު ވެސް ޖަހާފައިވަނީ ލަމީން ޔަމާލް ތަނަވަސްކޮށްދިން ފުރުސަތުތަކުން ފެރާން ޓޮރޭޒް އެވެ. ފުރަތަަމަ ލަނޑު ޖެހީ ޔަމާލް ނެގި ކޯނަރަކުން ބޮލުންނެވެ. އަދި، ދެ ވަނަ ގޯލު ޖެހީ ޔަމާލް ހަމަޖެހިލައިފައި ދިން ބޯޅައަކުންނެވެ. މިއީ، ސްޕެނިޝް ލީގުގައި، އުމުރުން 18 އަހަރުގެ ޔަމާލް ކުޅުނު 100 ވަނަ މެޗެވެ.
ދެ ގޯލުގެ ލީޑެއްގައި ބާސެލޯނާ އިން ދެ ވަނަ ހާފު ފަށައިގެން ކުޅެމުން ދަނިކޮށް، މެޗުގެ 56 ވަނަ މިނިޓްގައި ޕޮލް ލޮޒާނޯ ވަނީ ލަނޑެއް ޖަަހައި އެސްޕަންޔޯލަށް އުންމީދެއް ހޯދައިދީފަ އެވެ. އެކަމަކު، އެ ޓީމަށް އިތުރު ގޯލެއް ޖެހޭ ގޮތެއްނުވި އެވެ.
ބާސެލޯނާ އިން ތިން ޕޮއިންޓް ކަށަވަރުކުރި ލަނޑުތައް ޖެހީ މެޗުގެ ފަހުކޮޅުގަ އެވެ. އެ ގޮތުން، 87 ވަނަ މިނިޓްގައި ޔަމާލް ރަނގަޅު ކުޅުމެއް ދައްކައި، ބާސެލޯނާގެ ތިން ވަނަ ލަަނޑު ޖެހި އެވެ. އަދި، އޭގެ ދެ މިނިޓް ފަހުން، ފްރެންކީ ޑި ޔޯން ދިން ބޯޅައަކުން މާކަސް ރެޝްފޯޑް ވަނީ ބާސެލޯނާގެ ހަތަރު ވަނަ ލަނޑު ޖަހައިފަ އެވެ.
މި މޮޅާ އެކު، ބާސެލޯނާ އިން ދެން ތައްޔާރުވާނީ ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި އަންގާރަ ދުވަހުގެރޭ އެތުލެޓިކޯ މެޑްރިޑް ދަނޑުގައި ކުޅޭ މެޗަށެވެ. ފުރަތަމަ ލެގުގައި ބާސެލޯނާ ދަނޑުގައި އެތުލެޓިކޯ ވަނީ 2-0 އިން މޮޅުވެފަ އެވެ.
