މިއުނިކް (އޭޕްރީލް 15) - ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި މިރޭ ބަޔާން މިއުނިކާ ދެކޮޅަށް ކުޅޭ މެޗަށް ނުކުންނައިރު، ފުރަތަމަ ލެގުން ބަލިވެފައި އޮތް ނަމަވެސް ރެއާލް މެޑްރިޑަށް ނަތީޖާ އަނބުރާލެވޭނެ ކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު އަަލްވާރޯ އާބެލޯއާ ބުނެފި އެވެ.
ފާއިތުވި ހަފްތާގައި ރެއާލްގެ ދަނޑުގައި ކުޅުނު ފުރަތަމަ ލެގުން ބަޔާން ވަނީ 2-1 އިން މޮޅުވެފަ އެވެ. އެހެންކަމުން، މިރޭ ބަޔާންގެ ދަނޑު އަލިއާންޒް އެރީނާގައި ދެ ގޯލުގެ ފަރަގަކުން މޮޅުވެގެން ނޫން ގޮތަކަށް ޗެމްޕިއަންސް ލީގުގެ ޗެމްޕިއަންކަން 15 ފަހަރު ހޯދި ރެއާލަށް މި ފަހަރުގެ ސެމީ ފައިނަލަށް ދެވެން ނެތެވެ.
މިއުނިކްގައި މިރޭ ކުޅޭ މެޗުގެ ކުރިން އޮތް ނޫސްވެރިންގެ. ބައްދަލުވުމުގައި އާބެލޯއާ ބުނީ، ޗެމްޕިއަންސް ލީގުގައި އާދަޔާހިލާފު ނަތީޖާއެއް ނެރެން ޖެހޭ ހާލަތެއްގައި އެކަން ކުރުމުގެ ގާބިލުކަން ހުރި އެއް ޓީމު ނެގި ކަމުގައި ވިޔަސް އެއީ ރެއާލް ކަމުގައިވާނެ ކަމަށެވެ.
"މި ދަނޑަށް ތަފާތު ނަތީޖާއެއް ނެރުމުގެ ވިސްނުން ހިފައިގެން އާދެވޭނެ ފެންވަރުގެ އެއް ޓީމު އޮތަސް އެއީ ރެއާލް މެޑްރިޑް. އަހަރެމެންނަކީ 15 ފަހަރު މި މުބާރާތް ކާމިޔާބުކޮށްފައިވާ ޗެމްޕިއަނެއް. އަހަރެމެންނަށް މި މެޗާ ކުރިމަތިލާއިރު ރަނގަޅު ގިނަ ކަންތައްތަކެއް އެބަހުރި، އެހެންވީމަ، ބޭނުންވާ ނަތީޖާ ހާސިލްކުރެވޭނެ ކަމުގެ ޔަގީންކަމާ އެކު، އަހަރެމެން ކުރިމަތި މި ލަނީ،" އާބެލޯއާ ބުންޏެވެ.
ފުރަތަމަ ލެގަށް ބަލާއިރު، މެޗުގެ މޮޅު ކުޅުންތެރިއަކީ ބަޔާންގެ ކީޕަރު މެނުއަލް ނޯޔާ ކަމަށާއި އޭނާގެ ފަރާތުން މޮޅު ގިނަ ސޭވްތަކެއް ފެނުނުކަން ފާހަގަކޮށް އާބެލޯއާ ބުނީ، ރެއާލުން ބަޔާން ދަނޑުގައި ލިބޭ ފުރުސަތުތައް ގޯލަށް ނިންމާލުމުގެ ބައި ރަނގަޅުކޮށްފިނަމަ، އެ ޓީމަށް މި ކަން ހާސިލްކުރެވޭނެ ކަމަށެވެ.
ޗެމްޕިއަންސް ލީގުގައި ރެއާލުން ކުޅެފައިވާ މެޗުތަކުގައި އާދަޔާހިލާފު ގޮތްގޮތަށް ފަހު ވަގުތު ނަތީޖާ އަނބުރާލާފައިވާ ކަމަށާއި، އެ ފަދަ ކަމެއް ތަކުރާރުކުރުމުގެ ގާބިލުކަން ރެއާލްގެ ނަމާ އެކު، ކުޅުންތެރިންނަށް ލިބޭނެ ކަަމަށް ވެސް އާބެލޯއާ ގަބޫލުކުރެ އެވެ.
ރެއާލުން މި މެޗުގައި ކުޅޭނީ ސަސްޕެންޝަނުގެ ސަބަބުން އައުރެލިއަން ޗުއަމެނީ ނުލަ އެވެ. އާބެލޯއާ ބުނީ އެ މަގާމު ފޫބެއްދޭނެ ވަރުގެ ކުޅުންތެރިން ޓީމުގައި އެބަތިބި ކަމަށެވެ.
