ލަންޑަން (އޭޕްރީލް 22) - ފަސް އަހަރާއި ބައިގެ ކޮންޓްރެކްޓެއްގެ ދަށުން ޗެލްސީގެ ކޯޗަކަށް ގެނައި، ލިއަމް ރޮސެނިއާ، ތިން މަސް ދުވަހަށް ފަހު މަގާމުން ވަކިކޮށްފި އެވެ.
ރޮސެނިއާ އަށް ޗެލްސީގެ ކޯޗަކަށް ހުރެވުނީ 104 ދުވަހު އެވެ. ޗެލްސީއާ ހަވާލުވެ، ރޮސެނިއާގެ ކޯޗުކަމުގައި އެ ޓީމު ކުޅުނު 23 މެޗުގެ ތެރެއިން މޮޅުވީ 11 މެޗުންނެވެ. ރޮސެނިއާގެ ކޯޗުކަމުގައި ޗެލްސީން އެންމެ ފަހުން ކުޅުނު މެޗަކީ، ރޭ ލީގުގައި ބްރައިޓަން ހޯލްވް އެންޑް އަލްބިއަން އަތުން 3-0 އިން ބަލިވި މެޗެވެ. އެ މެޗަށް ފަހު، ރޮސެނިއާ ވަނީ އެއީ އެއްވެސް ގޮތަކަށް ބަލައިގަނެވޭނެ ކަންތައްތަކެއް ފެނިގެންދިޔަ މެޗެއް ނޫން ކަމަށް ބުނެފަ އެވެ.
ލީގުގައި ޖެހިޖެހިގެން ފަސް ވަނަ މެޗުގައި ލަނޑެއް ނުޖެހި ބަލިވުމާ އެކު، ޗެލްސީ އަށް ވަނީ 114 އަހަރު ތެރޭ ދަށް ރެކޯޑަކާ ކުރިމަތިލާން ޖެހިފަ އެވެ. ޗެލްސީން ލީގުގައި އެންމެ ފަހުން ޖެހިޖެހިގެން ފަސް މެޗުން ލަނޑެއް ނުޖެހި ބަލިވީ 1912 ވަނަ އަހަރު އެވެ. ހުރިހާ މުބާރާތަކަށް ބަލާއިރު، ޗެލްސީން އެންމެ ފަހުން ކުޅުނު އަށް މެޗުގެ ތެރެއިން ހަތް މެޗު ވަނީ ބަލިވެފަ އެވެ. މޮުޅުވި ހަމައެކަނި މެޗަކީ އެފްއޭ ކަޕްގައި ތިން ވަނަ ޑިވިޝަނުގެ ޕޯޓް ވޭލް އަތުން މޮޅުވި މެޗެވެ.
އިނގިރޭސި 21 އަހަރުން ދަށުގެ ޓީމަށް ކުރިން ކުޅުނު ރޮސެނިއާ، ކޯޗިން ކެރިއަރު ފެށީ، 2022 ވަނަ އަހަރު އެވެ. ޑާބީ ކައުންޓީގެ ވަގުތީ ކޯޗަކަށް 2022 ވަނަ އަހަރު މަސައްކަތްކުރި ރޮސެނިއާ، ފަހުން، 2022 އިން 2024 އަށް ހަލް ސިޓީގެ ކޯޗަކަށް ހުރުމަށް ފަހު، ސްޓްރާސްބޯއާ ހަވާލުވީ ތިން އަހަރުގެ ކޮންޓްރެކްޓެއްގަ އެވެ. އެކަމަކު، މި އަހަރުގެ ޖެނުއަރީގައި ޗެލްސީން ދިން އޮފާ ބަލައިގަނެ، އެ ޓީމާ ހަވާލުވެ، މާ ގިނަ ދުވަހު އެ ޓީމުގައި ހުރެވޭ ގޮތެއްނުވި އެވެ.
ޗެލްސީގެ ކޯޗުކަން މި ސީޒަނުގެ ނިޔަލަށް ހަވާލުކޮށްފައިވަނީ، ކަލުމްް މެކްފާލޭންއާ އެެވެ. ޗެލްސީން މި ސީޒަނުގައި ފުރަތަމަ ވަކިކުރި ކޯޗު، އެންޒޯ މަރެސްކާ، އެ ޓީމު ދޫކޮށްދިއުމުން، ދެ މެޗުގައި މެކްފާލޭން ވަނީ ޗެލްސީގެ ކޯޗުކަން ކޮށްފަ އެެވެ. އެއީ، މެންޗެސްޓާ ސިޓީއާ 1-1 އިން އެއްވަރުވި މެޗާއި ފުލަމް އަތުން ބަލިވި މެޗުގަ އެވެ.
ޗެލްސީ މި ވަގުތު އޮތީ ލީގުގެ ހަތް ވަނައިގަ އެވެ. އެ ޓީމުން ދެން އެންމެ އަވަހަށް ކުޅޭނީ އެފްއޭ ކަޕް ސެމީ ފައިނަލުގައި ލީޑްސް ޔުނައިޓެޑާ އެެވެ. އެއީ، އަންނަ އާދިއްތަ ދުވަހު އެވެ.
އާ ކޯޗެއް ހޯދަން މަސައްކަތް ކުރަމުން އަންނަ ޗެލްސީން، ރެއާލް މެޑްރިޑްގެ ކުރީގެ ކޯޗު ޒަބީ އަލޮންސޯ، ބޯންމައުތު ދޫކޮށްލަން ނިންމާފައިވާ އަންޑޯނީ އިރައޯލާ އަދި ފުލަމްގެ ކޯޗު މާކޯސް ސިލްވާ އަށް އަންނަނީ ފާރަލަމުންނެވެ.
