އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ ލޭބާ ސެކްރެޓަރީގެ މަގާމުން ލޯރީ ޗާވޭޒް-ޑިރެމާ ވަކިވެވަޑައިގަންނަވާނެ ކަމަށް ވައިޓް ހައުސްއިން ހާމަކޮށްފި އެވެ.
އޭނާއަކީ މިދިޔަ މާޗު މަހުން ފެށިގެން މިހާތަނަށް ޓްރަމްޕްގެ ސަރުކާރުން ވަކިވެވަޑައިގަންނަވާ ތިންވަނަ އަންހެން އޮފިޝަލެވެ. މާޗު މަހު މިނިއާޕޮލިސްގައި ފެޑަރަލް އެޖެންޓުން ހިންގި އިމިގްރޭޝަން ރެއިޑްތަކެއްގައި ބަޑިޖަހައި ދެ މީހަކު މަރާލުމާ ގުޅިގެން، ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯމް ރައީސް ޓްރަމްޕް ވަނީ މަގާމުން ވަކިކުރައްވާފަ އެވެ. މީގެ އިތުރުން، މި މަހުގެ ކުރީކޮޅު އެޓާނީ ޖެނެރަލް ޕޭމް ބޮންޑައި ވެސް ޓްރަމްޕް ވަނީ މަގާމުން ދުރުކުރައްވާފަ އެވެ.
ލޭބާ ސެކްރެޓަރީ މަގާމުން ވަކިވެވަޑައިގަންނަވާކަން އިއުލާން ކުރައްވައި، ވައިޓް ހައުސްގެ ޑައިރެކްޓާ އޮފް ކޮމިއުނިކޭޝަންސް ސްޓީވަން ޗިއުން ހޯމަ ދުވަހުގެ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ޗާވޭޒް-ޑިރެމާ ވަނީ އެމެރިކާގެ މަސައްކަތްތެރިންގެ ހައްގުތައް ހިމާޔަތްކުރުމުގައި "ލާމަސީލު މަސައްކަތްތަކެއް" ކުރައްވާފައި ކަމަށާއި، ދެން އޭނާ ފެނިގެންދާނީ އަމިއްލަ ސެކްޓަރުގެ ވަޒީފާއަކުން ކަމަށެވެ.
ޗިއުން އިތުރަށް ވިދާޅުވީ، ލޭބާ ސެކްރެޓަރީގެ މަގާމުގެ ޒިންމާތަކާ ވަގުތީ ގޮތުން ހަވާލުވެވަޑައިގަންނަވާނީ މިހާރުގެ ޑެޕިއުޓީ ލޭބާ ސެކްރެޓަރީ ކީތު ސޮންޑަލިންގް ކަމަށެވެ.
ޗާވޭޒް-ޑިރެމާ މަގާމުން ވަކިވާ ސަބަބެއް ޗިއުން ހާމަނުކުރެއްވި ނަމަވެސް، އޭނާގެ ދަށުން މަސައްކަތްކުރާ މުވައްޒަފަކާ އެކު "ނުރަނގަޅު ގުޅުމެއް" ބޭއްވި ކަމުގެ ތުހުމަތާއި، ރަސްމީ ގަޑީގައި އޮފީސް ތެރޭގައި ރާބޮއެ ހެދި ކަމުގެ ތުހުމަތުގައި އޭނާގެ މައްސަލަ ތަހުގީގު ކުރަމުންދާ ކަމަށް ނިއުޔޯކް ޕޯސްޓުން ޖެނުއަރީ މަހު ރިޕޯޓުކޮށްފައިވެ އެވެ.
ޓްރަމްޕްގެ ދެވަނަ ދައުރުގައި ލޭބާ ޑިޕާޓްމަންޓުން ވަކިވި ފުރަތަމަ އިސް އޮފިޝަލަކީ ޗާވޭޒް-ޑިރެމާއެއް ނޫނެވެ.
2025 ވަނަ އަހަރުގެ އޮގަސްޓް މަހު، ބިއުރޯ އޮފް ލޭބާ ސްޓެޓިސްޓިކްސް (ބީ.އެލް.އެސް) ގެ ޑައިރެކްޓަރުގެ މަގާމުގައި ހުންނެވި، އަދި ކުރީގެ ރައީސް ޖޯ ބައިޑަން އައްޔަންކުރެއްވި އެރިކާ މެކްއެންޓާފާ ވަނީ މަގާމުން ވަކިކުރައްވާފަ އެވެ. އެއީ ޖުލައި މަހު ވަޒީފާގެ ބާޒާރު ދަށްވިކަމަށާއި، މެއި އަދި ޖޫން މަހުގެ ހާލަތު ކުރިން ރިޕޯޓުކުރި ވަރަށް ވުރެ ގޯސްކަމަށް ދެއްކި ރިޕޯޓަކާ ގުޅިގެންނެވެ.
