އީރާނާ ދެކޮޅަށް ދޭން ރާވާފައިވާ ހަމަލާތައް މަޑުޖައްސާލައި، ހަނގުރާމަ ހުއްޓާލުމަށް އެއްބަސްވެފައިވާ މުއްދަތު އިތުރުކުރިކަން އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރައްވައިފި އެވެ.
ޓްރަމްޕް ވިދާޅުވީ މި ނިންމެވުން ނިންމެވީ ހަނގުރާމަ ނިމުމަކަށް ގެނައުމަށްޓަކައި އީރާނުގެ ސަރުކާރުން ހުށަހެޅުމެއް ތައްޔާރުކުރުމަށް އިތުރު ވަގުތު ދިނުމުގެ ގޮތުން ކަމަށެވެ.
އަންގާރަ ދުވަހު ނިންމި މި ނިންމުމަކީ ޕާކިސްތާނުގެ މެދުވެރިންގެ އެދުމުގެ މަތިން ނިންމި ނިންމުމެއް ކަމަށް ޓްރަމްޕް ވިދާޅުވި އެވެ. ކުރިން ހަމަޖެހިފައި އޮތް ގޮތުން ނަމަ، ހަނގުރާމަ ހުއްޓާލުމުގެ މުއްދަތު ބުދަ ދުވަހަށް ހަމަވާނެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އެމެރިކާގެ ރައީސް ވިދާޅުވީ، އީރާނުގެ ބަނދަރުތައް ބަންދުކޮށްގެން ހިންގާ ބްލޮކޭޑް ކުރިއަށް ގެންދިއުމަށާއި، އެ ނޫން ހުރިހާ ގޮތަކުން ވެސް އަސްކަރިއްޔާ ތައްޔާރީ ހާލަތެއްގައި ބޭއްވުމަށް އަމުރު ކުރައްވާފައިވާ ކަމަށެވެ. އަދި އީރާނުން ހުށަހެޅުމެއް ހުށަހަޅައި، އެކަމާ މެދު ކުރެވޭ މަޝްވަރާތައް ވަކި ގޮތަކަށް ނިމެންދެން ހަނގުރާމަ ހުއްޓާލުމުގެ މުއްދަތު އިތުރުކުރައްވާނެ ކަމަށް ވެސް ޓްރަމްޕް ވިދާޅުވި އެވެ.
ޓްރަމްޕްގެ މި ބަޔާނާ ގުޅިގެން އީރާނުން ވަގުތުން ރައްދެއް ދީފައެއް ނުވެ އެވެ. ނަމަވެސް އެ ގައުމުގެ ތަސްނީމް ނިއުސް އެޖެންސީން ބުނެފައިވަނީ، މިކަމާ މެދު އީރާނުން ގެންގުޅޭ ސިޔާސަތު ފަހުން ރަސްމީކޮށް އިއުލާން ކުރާނެ ކަމަށެވެ.
މިއީ ޓްރަމްޕްގެ ވައިޓް ހައުސްއިން ކުއްލި ގޮތަކަށް ސިޔާސަތު ބަދަލުކުރި ދަނޑިވަޅެކެވެ. ސޯޝަލް މީޑިއާގައި މި ޕޯސްޓް ކުރެއްވުމުގެ މަދު ގަޑިއިރުތަކެއް ކުރިން ޓްރަމްޕް ވިދާޅުވެފައިވަނީ، ހަނގުރާމަ ހުއްޓާލުމުގެ މުއްދަތު އިތުރުކުރުމާ އޭނާ ދެކޮޅު ކަމަށެވެ. އަދި އީރާނުގެ އުމްރާނީ ވަސީލަތްތަކަށް އެމެރިކާއިން ވަރުގަދަ ހަމަލާތަކެއް ދިނުމުގެ ކުރިން އޮތް ވަގުތު ކުޑަވަމުންދާ ކަމުގެ އިންޒާރު ވެސް އޭނާ ދެއްވި އެވެ.
ޓްރަމްޕްގެ ނިންމެވުން ކުއްލިއަކަށް ބަދަލުވީ، އީރާނުގެ ބަނދަރުތައް އެމެރިކާގެ ކަނޑުގެ ސިފައިން ބަންދުކޮށްފައި އޮތް އޮތުން އީރާނުގެ އޮފިޝަލުން ކުށްވެރިކޮށް، ބުދަ ދުވަހަށް ތާވަލުކޮށްފައިވާ މަޝްވަރާތަކުގައި ބައިވެރިވުމާ މެދު ސުވާލު އުފެދިފައި ވަނިކޮށެވެ.
މި ނިންމުމާ ގުޅިގެން ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ ހަނގުރާމަ ހުއްޓާލުމުގެ މުއްދަތު އިތުރުކުރުމަށް އެއްބަސްވެވަޑައިގަތުމުން ޓްރަމްޕަށް ޝުކުރު އަދާކުރައްވާފަ އެވެ. އަދި މި މައްސަލައަށް ސުލްހަވެރި ހައްލެއް ހޯދުމަށް އިސްލާމްއާބާދުން ކުރަމުންދާ މަސައްކަތްތައް ކުރިއަށް ގެންދާނެ ކަމަށް އޭނާ ވިދާޅުވި އެވެ.
އެކްސްގައި ކުރެއްވި ޕޯސްޓެއްގައި ޝަރީފް ވިދާޅުވީ، ދެ ފަރާތުން ވެސް ހަނގުރާމަ ހުއްޓާލުމުގެ އެއްބަސްވުމަށް އިހުތިރާމްކޮށް، އިސްލާމްއާބާދުގައި ބޭއްވުމަށް ހަމަޖެހިފައިވާ ދެވަނަ ބުރުގެ މަޝްވަރާތަކުގައި ދާއިމީ ސުލްހައިގެ އެއްބަސްވުމަކަށް އާދެވޭނެ ކަމަށް އުންމީދު ކުރައްވާ ކަމަށެވެ.
އަންގާރަ ދުވަހުގެ ކުރީކޮޅު އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، އީރާނުގެ ބަނދަރުތައް ބަންދުކުރުމަކީ "ހަނގުރާމައިގެ އަމަލެއް" ކަމަށާއި، އެއީ މިހާރު އޮތް ހަނގުރާމަ ހުއްޓާލުމުގެ އެއްބަސްވުމާ ހިލާފު ކަމެއް ކަމަށެވެ.
