އެމެރިކާގެ ނޭވީ ސެކްރެޓަރީ ޖޯން ފީލަން މަގާމުން ވަކިކޮށްފި އެވެ.
މިކަން ޕެންޓަގަންގެ ތަރުޖަމާނު ސޯން ޕާނެލް އިއުލާނުކޮށްފައި ވާއިރު، ސީއެންއެންއިން ރިޕޯޓުކޮށްފައިވާ ގޮތުގައި އޭނާ ވަކިކުރީ އެ ނިންމުން ވަގުތުން ތަންފީޒުކުރަން ފަށާ ގޮތަށެވެ.
ދިފާއީ ވަޒީރު ޕީޓް ހެގްސެތު، ފީލަންއާ ބައްދަލުކުރައްވައި އަމިއްލައަށް އިސްތިއުފާ ދެއްވުމަށް ނުވަތަ މަގާމުން ވަކިކުރާނެ ކަމުގެ އިންޒާރު ދެއްވާފައިވާ ކަމަށް އިތުބާރު ހުރި މަސްދަރުތަކާ ހަވާލާދީ ސީއެންއެންއިން ރިޕޯޓުކޮށްފައިވެ އެވެ.
ވައިޓް ހައުސްގެ އިސް އޮފިޝަލަކު ވިދާޅުވި ގޮތުގައި ރައީސް ޑޮނަލްޑް ޓްރަމްޕަށް މި ނިންމުމުގެ މައުލޫމާތު ވަނީ އެނގިވަޑައިގެންފައެވެ. ފީލަން ވަކިކުރުމާ ގުޅިގެން ނޭވީގެ އަންޑަރ ސެކްރެޓަރީ ހަންގް ކާއޯ ވަނީ ވަގުތީ ގޮތުން ނޭވީ ސެކްރެޓަރީގެ މަގާމާ ހަވާލުވެވަޑައިގެންފައެވެ.
މި ބަދަލު އައިސްފައިވަނީ އިރާނާއެކު ކުރި ހަނގުރާމަ މެދުކަނޑާލާފައިވާ ދަނޑިވަޅެއްގައި، އެމެރިކާގެ ކަނޑުގެ ސިފައިން އިރާނުގެ ބަނދަރުތައް ބަންދުކޮށްގެން ތިބި ވަގުތެއްގައެވެ. މިހާތަނަށް އެމެރިކާގެ ސިފައިން ވަނީ އިރާނަށް ދަތުރުކުރި 29 އުޅަނދެއް އަނބުރާ ފޮނުވާލައި، ދެ އުޅަނދަކަށް އަރައި ފާސްކޮށްފައެވެ.
މައުލޫމާތު ލިބޭ ގޮތުގައި ފީލަން އާއި ހެގްސެތުއާ ދެމެދު ފާއިތުވި މަސްތަކުގައި ވަނީ ބޮޑެތި ނުތަނަވަސްކަން އުފެދިފައެވެ. އޭގެ ތެރޭގައި މަނަވަރުތައް ބަނުމުގެ މަސައްކަތްތައް ލަސްވުމާއި، ހެގްސެތު ބައިވެރިނުކޮށް ފީލަން ސީދާ ރައީސް ޓްރަމްޕާ މުއާމަލާތް ކުރެއްވުން ހިމެނެއެވެ. މީގެ އިތުރުން، ޑެޕިއުޓީ ޑިފެންސް ސެކްރެޓަރީ ސްޓީވް ފެއިންބާގް، ނޭވީގެ މުހިންމު ޒިންމާތަކެއްގެ ކޮންޓްރޯލް ނަންގަވަން ބޭނުންފުޅުވުމަކީ ވެސް މި މައްސަލަ ގޯސްވި ސަބަބެއް ކަމަށް ބެލެވެއެވެ.
ޖޯން ފީލަން އަކީ އަސްކަރީ ތަޖުރިބާއެއް ނެތް ވިޔަފާވެރިއެކެވެ. އޭނާ އާއި އޭނާގެ އަނބިކަނބަލުން ވަނީ ޓްރަމްޕްގެ ކެމްޕޭނަށް އެތައް މިލިއަން ޑޮލަރެއް ހޯދައިދީފަ އެވެ. 2025 ވަނަ އަހަރު އޭނާ މަގާމަށް އައްޔަންކުރެއްވިއިރު، ޓްރަމްޕް ވިދާޅުވެފައިވަނީ ފީލަން އަކީ ނޭވީގެ ވިޔަފާރި ކަންކަން އެންމެ އިސްކޮށް ކުރިއަށް ގެންދަވާނެ ގާބިލު ބޭފުޅެއް ކަމަށެވެ.
ފީލަން މަގާމުން ވަކިކުރި ސީދާ ސަބަބެއް ސާފުނުވި ނަމަވެސް، މިއީ ޓްރަމްޕްގެ ސަރުކާރުގައި އަސްކަރީ ސެކްރެޓަރީއަކު މަގާމުން ވަކިކުރި ފުރަތަމަ ފަހަރެވެ. މީގެ ކުރިން ވެސް ހެގްސެތު ވަނީ އަސްކަރިއްޔާގެ އިސް ގިނަ އޮފިސަރުންތަކެއް މަގާމުން ވަކިކުރައްވާފައެވެ.
ޖެފްރީ އެޕްސްޓީންގެ އަމިއްލަ މަތިންދާބޯޓުގައި 2006 ވަނަ އަހަރު ފީލަން ދަތުރުކުރި ކަމުގެ ރިޕޯޓުތަކެއް ވެސް މީގެ ކުރިން ވަނީ ފެންމަތިވެފައެވެ. ނަމަވެސް ފީލަންގެ ގާތް އެކުވެރިއަކު ބުނި ގޮތުގައި އެ ދަތުރަކީ އެހެން ބޭފުޅެއްގެ ދައުވަތަކަށް ކުރި ދަތުރެއް ކަމަށާއި، އެއީ އެޕްސްޓީންގެ ބޯޓެއްކަން ފީލަންއަށް އެނގުނީ އެއާޕޯޓަށް ދިޔުމުން ކަމަށެވެ.
