އީރާނުގެ އަސްކަރީ ބާރުތަކުން ތިން އުޅަނދަކަށް ބަޑީގެ ހަމަލާދިން ކަމުގެ ރިޕޯޓްތައް ފެންމަތިވެފައި ވަނިކޮށް، ހޮރްމޫޒް ކަނޑުއޮޅިން ދަތުރުކުރި މުދާ އުފުލާ ދެ އުޅަނދެއް އެ ގައުމުގެ ކަނޑުގެ ސިފައިންގެ ބެލުމުގެ ދަށަށް ގެންގޮސް، އީރާނުގެ އައްސޭރިފަށަށް ގެންގޮސްފި އެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލާ ގުޅުން އޮންނަ ނޫރު ނިއުސް ވެބްސައިޓުން ރިޕޯޓްކޮށްފައިވާ ގޮތުގައި، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ފުރަތަމަ ހަމަލާދިނީ "އެޕަމިނޮންޑަސް" ނަމަކަށް ކިޔާ އުޅަނދަށެވެ. އެ އުޅަނދަށް ހަމަލާދިނީ އީރާނުގެ ހަތިޔާރު އެޅި ބާރުތަކުން ދިން އިންޒާރުތަކަށް އެ އުޅަނދުން އިޖާބަ ނުދިނުމުން ކަމަށް އެ ނޫހުން ބުނެފައިވެ އެވެ.
ބީބީސީ ވެރިފައި އިން ކަށަވަރުކޮށްދޭ ގޮތުގައި، "ޔޫފޯރިއާ" ނަމަކަށް ކިޔާ ދެވަނަ އުޅަނދެއް ވެސް ބަޑީގެ ހަމަލާތަކަކަށް ފަހު ވަނީ ހުއްޓުވާފަ އެވެ. އޭގެ ފަހުން "އެމްއެސްސީ ފްރާންސެސްކާ" ނަމަކަށް ކިޔާ ތިންވަނަ އުޅަނދަކަށް ވެސް ވަނީ އަމާޒުކޮށްފަ އެވެ.
އައިއާރުޖީސީއާ ގުޅުން އޮންނަ ފާރްސް ނިއުސް އެޖެންސީން ބުނެފައިވާ ގޮތުގައި މި ހަމަލާތަކުގެ ފަހަތުގައި ވަނީ ރިވޮލިއުޝަނަރީ ގާޑްސް އެވެ.
އައިއާރުޖީސީގެ ނޭވަލް ކޮމާންޑުން ސޯޝަލް މީޑިއާގައި ހާމަކޮށްފައިވާ ގޮތުގައި، އެ ފަރާތުގެ ބެލުމުގެ ދަށަށް ގެންދިޔަ "އެޕަމިނޮންޑަސް" އާއި "އެމްއެސްސީ ފްރާންސެސްކާ" އަކީ ބޭނުންވާ ހުއްދަތަކާ ނުލައި ދަތުރުކޮށް، ނެވިގޭޝަން ސިސްޓަމްތަކަށް ބަދަލު ގެނެސްގެން ކަނޑުމަތީގެ ސަލާމަތަށް ނުރައްކާކުރި ދެ އުޅަނދެވެ.
"ހޮރްމޫޒް ކަނޑުއޮޅީގެ ނިޒާމާއި ސަލާމަތްތެރިކަން ނަގާލުމަކީ އަހަރެމެން ހުރަސްކުރާނެ ރަތް ރޮނގެއް ނޫން،" އެ ބަޔާނުގައި ބުނެފައިވެ އެވެ.
އީރާނުގެ ދައުލަތުގެ ޓީވީން ރިޕޯޓްކޮށްފައިވާ ގޮތުގައި، އަތުލައިގަތް ދެ އުޅަނދުގައި ހުރި މުދަލާއި ލިޔެކިޔުންތައް ތަހުގީގު ކުރާނެ އެވެ.
އީރާނުން މި ފިޔަވަޅުތައް އަޅާފައި މިވަނީ، އެމެރިކާ އާއި އީރާނާ ދެމެދު ކުރިއަށްދާ މަޝްވަރާތައް ނިމެންދެން، ހަނގުރާމަ މެދުކަނޑާލުމުގެ އެއްބަސްވުން އެމެރިކާގެ ރައީސް ޑޮނަލްޑް ޓްރަމްޕް އިތުރު ކުރެއްވިތާ މަދު ގަޑިއިރުތަކެއްގެ ތެރޭގަ އެވެ.
އެމެރިކާ އާއި އީރާނާ ދެމެދު އެންމެ ފުރަތަމަ އެކުލަވާލި ހަނގުރާމަ ހުއްޓާލުމުގެ އެއްބަސްވުމުގެ މުއްދަތު ބުދަ ދުވަހަށް ހަމަވާން އޮތް ނަމަވެސް، މެދުވެރިއެއްގެ ދައުރު އަދާކުރާ ޕާކިސްތާނުގެ އެދުމުގެ މަތިން އީރާނަށް ހަމަލާދިނުން މަޑުޖައްސާލާފައިވާ ކަމަށް ޓްރަމްޕް ވިދާޅުވި އެވެ.
އީރާނުގެ ބަނދަރުތައް އެމެރިކާގެ އަސްކަރިއްޔާއިން ބަންދުކޮށްފައި އޮތް އޮތުން ކުރިއަށްދާނެ ކަމަށް އިއުލާންކުރައްވަމުން ޓްރަމްޕް ވިދާޅުވީ، ހޮރްމޫޒް ކަނޑުއޮޅި ބަންދުކޮށްފައި އޮތުމުގެ ސަބަބުން އީރާނުގެ އިގްތިސާދު އިނދަޖެހެމުންދާ ކަމަށެވެ.
ބީބީސީ ވެރިފައި އަށް އެނގިފައިވާ ގޮތުގައި، ބުދަ ދުވަހުގެ ހެނދުނު އައިއާރުޖީސީން ފުރަތަމަ އަމާޒުކުރި އުޅަނދަކީ ގްރީސްގެ ކުންފުންޏަކަށް ނިސްބަތްވާ "އެޕަމިނޮންޑަސް" އެވެ.
ބީބީސީ ވެރިފައި އަށް އިތުރަށް އެނގިފައިވާ ގޮތުގައި، ދެވަނައަށް އަމާޒުކުރި އުޅަނދަކީ ޕެނަމާގެ ދިދަ ޖަހާފައިވާ "ޔޫފޯރިއާ" އެވެ. ޔޫއޭއީގެ ކުންފުންޏަކަށް ނިސްބަތްވާ މި އުޅަނދު ދަތުރުކުރަމުން ދިޔައީ ސައުދީ އަރަބިއްޔާގެ ޖިއްދާއަށެވެ.
ބުދަ ދުވަހުގެ ފަހުގެ ވަގުތެއްގައި، ޕެނަމާގެ ދިދަ ޖަހާފައިވާ ތިންވަނަ އުޅަނދު "އެމްއެސްސީ ފްރާންސެސްކާ" އަށް ހަމަލާދީފައި ވަނީ އީރާނުގެ އައްސޭރިފަށުން ހަ ނޯޓިކަލް މޭލު ބޭރުން، އެ އުޅަނދު ކަނޑުއޮޅިން ނުކުމެގެން އޮމާން ކަނޑަށް ދަތުރުކުރަނިކޮށެވެ.
އީރާނުގެ ފޮރިން މިނިސްޓްރީން ބީބީސީ އަށް ބުނެފައިވާ ގޮތުގައި، އެމެރިކާއާއެކު ބާއްވާ ސުލްހައިގެ މަޝްވަރާތަކުގެ އާ ބުރުގައި ބައިވެރިވުމާ މެދު ތެހެރާނުން އަދި ވަކި ގޮތެއް ނުނިންމަ އެވެ.
