ލަންޑަން (އޭޕްރީލް 18) - ޗެލްސީ އަށް ކުޅެމުން އަންނަ އިނގިރޭސި ގައުމީ ޓީމުގެ މިޑްފީލްޑަރު، ކޯލް ޕާމާ، މެންޗެސްޓާ ޔުނައިޓެޑަށް ބަދަލުވާން އުޅޭ ކަމަށް މީޑިއާގައި ދެކެވެމުން އަންނަ ވާހަކަތައް ދޮގުކޮށްފި އެވެ.
މެންޗެސްޓާ ސިޓީގައި 13 އަހަރު ހޭދަކުރި ނަމަވެސް ޕާމާ، 23، އަކީ މެންޗެސްޓާ ޔުނައިޓެޑްގެ ސަޕޯޓަރެކެވެ. މީގެ ތިން އަހަރު ކުރިން ޗެލްސީ އަށް 50 މިލިއަން ޑޮލަރުގެ ފީ އަކަށް ބަދަލުވި، ޕާމާގެ މުސްތަގުބަލާ ގުޅޭގޮތުން، ފާއިތުވި ހަތަރު ވަރަކަށް މަސް ދުވަހު މީޑިއާގައި ގިނަ ވާހަކަތަކެއް ވަނީ ދެކެވިފަ އެވެ. އެ ގޮތުން، މި ސީޒަނުގައި ޕާމާގެ ކުޅުން ދަށްވެ، އަނިޔާގެ ގިނަ މައްސަލަތަކެއް ކުރިމަތިވުމުގެ އަސްލަކީ، އޭނާ އުފަން ސަރަހައްދު މެންޗެސްޓާ އަށް ބަދަލުވާން ބޭނުންވުން ކަމަށް ވެސް މީޑިއާގައި ވާހަކަ ދެކެވުނެވެ.
ޗެލްސީގައި ޕާމާ ހުރީ އުފަލުން، ޓްރާންސްފާގެ ވާހަކައެއް ނެތް
ޗެލްސީ އަށް ކުޅެމުން އަންނަ އިނގިރޭސި ތަރި، ކޯލް ޕާމާ އެ ކްލަބްގައި ހުރީ އުފަލުން ކަމަށާއި އޭނާއާ ގުޅޭގޮތުން ޓްރާންސްފާގެ އެއްވެސް ވާހަކައެއް ނެތް ކަމަށް ޗެލްސީގެ ކޯޗު، ލިއަމް ރޮސެނިއާ ވަނީ ބުނެފައިި
އިނގިރޭސި މަޝްހޫރު ނޫހެއް ކަމަށްވާ " ދި ގާޑިއަން" އަށް ދިން އިންޓަވިއުއެއްގައި ޕާމާ ބުނީ، މީިޑިއާގައި ދައްކާ ހުރިހާ ވާހަކަ އަކީ ހަގީގަތެއް ނޫން ކަމަށެވެ.
"އެންމެން ވެސް ވާހަކަ ދައްކާނެ. އެކަމަކު ފެންނަ ބައެއް ވާހަަކަތަކުން އަހަރެން ގާތަށް ވަރަށް ހިނި ވެސް އާދޭ. ޔަގީންކަމެއް، މެންޗެސްޓާ އަކީ އަހަރެން އުފަންވި ސަރަހައްދު. އަހަރެންގެ އާއިލާ އެންމެން އުޅެނީ އެ ތަނުގައި، އެކަމަކު އެ ބުނާ ގޮތަށް އަހަރެން މިސް އެއް ނުވޭ، ފަަހަރެއްގައި ތިން މަސް ދުވަހު ނުގޮސް ދިމާނުވެ ހުންނަންޏާ މިސްވާނެ،" ޕާމާ ބުންޏެވެ.
ޗެލްސީއާ އެކު، 2033 ވަނަ އަހަރުގެ ޖޫން މަހުގެ ނިޔަލަށް މީގެ އެއް އަހަރު ކުރިން ކޮންޓްރެކްޓެއްގައި ސޮއިކުރި ޕާމާ ބުނީ، ޗެލްސީގައި މަސައްކަތްކުރަނީ ޕްލޭނެއް އޮވެގެން ކަމަށެވެ.
"ޗެލްސީ ދޫކޮށް ދާން އަދި އެއްވެސް ވިސްނުމެއް ނުގެންގުޅެން،" ޕާމާ ބުންޏެވެ.
ޗެލްސީގައި ހޭދަކުރި ފުރަތަމަ ދެ ސީޒަނުގައި ކުޅުނު 97 މެޗުން އެ ޓީމަށް 43 ގޯލު ޖަހައިދިން ޕާމާ އަށް މި ސީޒަނުގައި މިހާތަނަށް ޖެހުނީ 27 މެޗުން 10 ގޯލެވެ. އަނިޔާގެ ސަބަބުން މި ސީޒަނުގައި ޕާމާ އަށް މި ސީޒަނުގައި މިހާތަނަށް 15 މެޗު ވަނީ ގެއްލިފަ އެވެ.
އިނގިރޭސި ޕްރިމިއާ ލީގުގައި މިރޭ ޗެލްސީން އަމިއްލަ ދަނޑުގައި މެންޗެސްޓާ ޔުނައިޓެޑާ ދެކޮޅަށް ކުޅޭނެ އެވެ.
