މެޑްރިޑް (އޭޕްރީލް 15) - ދެ ވަަނަ ލެގުގައި އަމިއްލަ ދަނޑުގައި ރޭ ބަލިވި ނަމަވެސް ބާސެލޯނާ ކަޓުވާލުމަށް ފަހު، ނުވަ އަހަރަށް ފަހު އެތުލެޓިކޯ މެޑްރިޑުން ޔުއެފާ ޗެމްޕިއަންސް ލީގުގެ ސެމީ ފައިނަލުން ޖާގަ ހޯދައިފި އެވެ.
މިދިޔަ ހަފްތާގައި ބާސެލޯނާ ދަނޑުގައި ކުޅުނު މެޗުން އެ ޓީމު އަތުން އެތުލެޓިކޯ އިން 2-0 އިން ކުރިހޯދި އެވެ. ރޭގެ މެޗުގައި ބާސެލޯނާ އިން އެތުލެޓިކޯ ދަނޑުގައި ދެ ގޯލުގެ ލީޑެއް ނެގި ނަމަވެސް، އެތުލެޓިކޯ އިން ލަނޑެއް ޖަަހައި، 3-2 ގެ އެގްރިގޭޓުން ކުރިހޯދައި، ސެމީ އަށް ދަތުރުކުރީ އެވެ.
މިއީ، 2016/2017 ވަނަ އަހަރުގެ ސީޒަނުގެ ފަހުން އެތުލެޓިކޯ އިން ޗެމްޕިއަންސް ލީގު ސެމީގައި ކުޅޭ ފުަރަތަމަ ފަހަރެވެ. އެ ފަަހަރު ސެމީގައި އެތުލެޓިކޯ ކެޓީ ރެއާލް މެޑްރިޑް އަތުންނެވެ.
އެތުލެޓިކޯގެ ވަންޑާ މެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗުގައި ބާސެލޯނާ އިން ހަތަރު ވަނަ މިނިޓްގައި ފެރަން ޓޮރޭޒް ދިން ބޯޅައަކުން ލަމީން ޔަމާލް ގޯލެއް ޖަހައި، ލީޑު ނެގި އެވެ. އަދި، 24 ވަަނަ މިނިޓްގައި ޑެނީ އޮލްމޯ ދިން ބޯޅައެއް ހިފައިގެން އޭރިއާެތެރެއިން ގޯލުގެ މަތީ ކަނަށް ބޯޅަ ފޮނުވާލައި ޓޮރޭޒް ވަނީ ބާސެލޯނާ އަށް ދެ ވަނަ ލަނޑެއް ޖަހައިދީފަ އެވެ.
އެކަމަކު، މެޗުގެ 31 ވަނަ މިނިޓްގައި ކައުންޓަ އެޓޭކެއްގައި ބާސެލޯނާގެ ޑިފެންސް ލައިނުން ޖާގަ ހޯދައި، އަޑެމޯލާ ލުކްމަން ވަނީ ގޯލެއް ޖަހައި، އެތުލެޓިކޯ އަށް ފަރަގު ކުޑަކޮށްދީ، އެގްރިގޭޓުން އެ ޓީމަށް ކުރިހޯދައިދީފަ އެވެ. މިއީ، މާކޯސް ލޮރެންޓޭ އަރިމަތިން ބޯޅަ ހިފައިގެން އަރައި ނެގި ހުރަހަކުން ލުކްމަން ޖެހި ގޯލެކެވެ.
ފުރަތަމަ ލެގެކޭ އެއްގޮތަށް ދެ ވަނަ ލެގުގައި ވެސް ބާސެލޯނާ އިން ރަތެއް ހޯދި އެވެ. ފުރަތަމަ ލެގުގެ ދެ ވަނަ ހާފުގެ ކުރީކޮޅުގައި، ބާސެލޯނާގެ ޑިފެންޑަރު، ޕައު ކުބަރްސީ އަށް ރަތެއް ދެއްކީ، ޖޫލިއާނޯ ސިމިއޯނީ އަށް ކުރި ފައުލަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. ރޭގެ މެޗުގައި، ބާސެލޯނާގެ އެރިކް ގާސިއާ ރަތެއް ހޯދީ އެތުލެޓިކޯގެ އަލެކްސަންޑަ ސޯލޯތަށް ފައުލެއް ކޮށްގެން، މެޗު ނިމެން ބާކީ 12 ވަރަކަށް މިނިޓެއް ވެފައި ހުއްޓަ އެވެ.
ބާސެލޯނާއިން ގިނަ ފައުލުތަކެއް ހޯދަން އެޕީލްކުރި މި މެޗުގައި އެތުލެޓިކޯގެ ކީޕަރު، ޖުއާން މޫސޯ ވަނީ ރަނގަޅު ކުޅުމެއް ދައްކައި ގިނަ ހަމަލާތަކެއް ހުއްޓުވައިފަ އެވެ.
މި ސީޒަނުގައި ސްޕެނިޝް ކަޕުން ވެސް ބާސެލޯނާ ކެޓީ އެތުލެޓިކޯ އަތުން ބަލިވެގެންނެވެ. އެ މުބާރާތުގެ ސެމީ ފައިނަލުގެ ފުރަަތަމަ ލެގުގައި އެތުލެޓިކޯ އިން އަމިއްލަ ދަނޑުގައި 4-0 އިން ބާސެލޯނާ ބަލިކުރިއިރު، ބާސެލޯނާ ދަނޑުގައި އެ ޓީމަށް އެތުލެޓިކޯގެ މައްޗަށް ކުރިހޯދުނީ 3-0 އިންނެވެ. އެހެންވެ، އެތުލެޓިކޯ އިން ކުރިހޯދީ 4-3 އިންނެވެ.
އަނެއްކޮޅުން، އެތުލެޓިކޯ އިން މި ވަނީ ޗެމްޕިއަންސް ލިގުގެ ނޮކައުޓްގައި ބާސެލޯނާއާ ޖެހުުނު ތިން ފަހަރު ވެސް ކުރިހޯދައިފަ އެވެ. މި ފަހަރުގެ ސެމީ ފައިނަލުގައި އެތުލެޓިކޯ ކުޅޭނީ އާސެނަލާއި ސްޕޯޓިން ލިޒްބަން، ކުއާޓާ ފައިނަލުގައި ކުޅެގެން މޮޅުވާ ޓީމަކާ އެވެ. ފުރަތަަމަ ލެގުގައި މިދިޔަ ހަފްތާގައި ސްޕޯޓިން ދަނޑުގައި އާސެނަލް 1-0 އިން މޮޅުވިއިރު، މިރޭގެ މެޗު އޮތީ އާސެނަލް ދަނޑުގަ އެވެ.
