ދިރާގު ދިވެހި ޕްރިމިއާ ލީގުގައި މިރޭ ކުޅުނު މެޗުން، ގދ. ގައްދޫ ފުޓްބޯޅަ ޓީމު އަތުން 2-0 އިން މޮޅުވެ، ވިކްޓަރީ ސްޕޯޓްސް ކްލަބުން ލީގު ތާވަލުގެ އެއް ވަނައިގައި ތިން ޕޮއިންޓުގެ ލީޑެއް ނަގައިފި އެވެ.
މި ފަހަރުގެ ލީގުގައި ވިކްޓަރީން ކުޅުނު ފަސް މެޗުގެ ތެރެއިން ހަތަރު މެޗުން ވަނީ މޮޅުވެފަ އެވެ. އެ ޓީމަށް މޮޅުނުވެވުނީ އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނާ ކުޅުނު މެޗުގަ އެވެ. އެ މެޗު ނިމުނީ 2-2 އިން އެއްވަރުވެގެންނެވެ.
މުހައްމަދު ޝިޔާޒް (މޯހަން)ގެ ކޯޗުކަމުގައި ކުޅޭ، ވިކްޓަރީ އެއް ވަނައިގައި އޮތީ ފަސް މެޗުން 13 ޕޮއިންޓާ އެކު އެވެ. ދެ ވަނައިގައި އޮތް ކްލަބް އީގަލްސް އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ.
ގަލޮޅު ދަނޑުގައި މިރޭ ކުޅުނު މެޗުގައި، ވިކްޓަރީން ލީޑުނެގީ 16 ވަނަ މިނިޓްގަ އެވެ. އޭރިއާ ރޮނގުކައިރިން ވިކްޓަރީގެ އަހުމަދު ހަސަން (އައްމަޑޭ) ފޮނުވާލި ބޯޅަ ގޯލަށް ވަނީ ގައްދޫގެ ސާބިއާ ކީޕަރު، ބޯޖާން ވުކްމިރޯވިޗް އަތުގައި ޖެހިފަ އެވެ.
ފުރަތަމަ ހާފު ނިމުމުގެ ކުރިން ވިކްޓަރީން ވަނީ ދެ ވަނަ ލަނޑެއް ޖަހައިފަ އެވެ. މި ލަނޑު ޖެހީ މެޗުގެ 40 ވަނަ މިނިޓްގައި، އަހުމަދު މާއިޝް ރަޝީދު (މާއި) އެވެ. މިއީ، އަލީ ޝާމިސް (ތޮއްޕޭ) ނެގި ހުރަހަކުން އޭރިއާތެރެއިން މާއި ބޮލުން ޖެހި ގޯލެކެވެ.
ވިކްޓަރީން ވަނީ މި މެޗުގެ ދެ ވަނަ ހާފުގައި އަކުރަމް އަބްދުލް ގަނީ (އަކޫ) ކުޅެން އަރުވައިފަ އެވެ. ގައުމީ ޓީމަށް 2018 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކޮށްދިން އަކޫ ކުޅުމަށް އެނބުރި މި އައީ ދެ އަހަރަށް ފަހު އެވެ. އޭނާ އެންމެ ފަހުން ކުޅުނީ، 2024 ވަނަ އަހަރުގެ ފެބްރުއަރީ މަހު ދެ ވަނަަ ޑިވިޝަނުގައި ވިކްޓަރީން ކުޅުނު މެޗެއްގަ އެވެ.
މިރޭގެ މެޗުގެ ދެ ވަނަ ހާފުގައި ވިކްޓަރީ އަށް ލަނޑު ޖަހަން ގިނަ ފުރުސަތުތަކެއް ލިބި ބޭނުމެއް ނުކުރެވުނެވެ. އެ ގޮތުން، ވިކްޓަރީގެ ކެޕްޓަން، ނާއިޒު ހަސަން (ދާދު) ފޮނުވާލި ހަމަލާތައް ގޯލަކަށް ހަދައެއްނުލެވުނެވެ.
ދިހަ ޓީމު ވާދަކުރާ ލީގުގައި މިހާތަނަށް ޕޮއިންޓެއް ނުލިބި އޮތީ ގައްދޫ އެވެ. ގައްދޫ ކުޅުނު ހަ މެޗުން ވެސް ވަނީ ބަލިވެފަ އެވެ. މިރޭގެ މެޗުގައި ވިކްޓަރީ ކައިރީގައި އެ ޓީމުން ފުރުސަތުތަކެއް ހޯދޭތޯ މަސައްކަތް ކުރިއިރު، އެޓޭކަށް ބޯޅަ ގެންދިއުމުގައި ކުރިން މެޗުތަކަށް ވުރެން އަވަސް ކުޅުންތަކެއް ފެނުނެވެ. އެކަމަކު، ވިކްޓަރީގެ ގޯލުގައި ހުރި މުހައްމަދު ޔާމީން ކައިރިން ގޯލެއް ޖެހޭގޮތެއްނުވި އެވެ.
