މެޑްރިޑް (އޭޕްރީލް 11) - ސްޕެނިޝް ލީގުގައި ރޭ ކުޅުނު މެޗުން ޖިރޯނާއާ 1-1 އިން އެއްވަރުވެ، ރެއާލް މެޑްރިޑަށް ޖެހިޖެހިގެން ދެ ވަނަ މެޗުގައި ޕޮއިންޓް ގެއްލި ލީގު ހޯދުމުގެ ރޭހުގައި އިތުރަށް ގޯސް ހާލަތަކަށް ވެއްޓިއްޖެ އެވެ.
މިދިޔަ ހަފްތާގައި ރެއާލުން ލީގުގައި ކުޅުނު މެޗުން ރެލިގޭޝަން ޒޯނުގައި އޮތް މަޔޯކާ އަތުން ވީ ބައްޔެވެ. އޭގެ ފަހުން ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި އަމިއްލަ ދަނޑުގައި ބަޔާން މިއުނިކް އަތުން ބަލިވިއިރު، ރޭ މި ވަނީ ލީގުގައި ޖިރޯނާއާ އެއްވަރުވެފަ އެެވެ. ރޭގެ ނަތީޖާއާ އެކު، ރެއާލުން ލީގުގެ އެއް ވަނައިގައި އޮތް ބާސެލޯނާ އަށް ވުރެން ނުވަ ޕޮއިންޓް ފަހަތަށް ވެއްޓުމުގެ ފުރުސަތު އެބައޮތެވެ.
ބާސެލޯނާ އިން މި ވަގުތު އެއް ވަނައިގައި އޮތީ 30 މެޗުން 76 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލަށް 31 މެޗުން ލިބުނީ 70 ޕޮއިންޓެވެ. މިރޭ ބާސެލޯނާ އިން އެސްޕަންޔޯލް ބަލިކޮށްފިނަމަ، ތާވަލުގެ ކުރިގައި ނުވަަ ޕޮއިންޓުގެ ލީޑެއް ލިބޭނެ އެވެ.
ރޭގެ މެޗުގައި ރެއާލުން 22 ހަަމަލާ ފޮނުވާލިއިރު، ނުވަ ޝޮޓެއް ގޯލާ އަމާޒުކުރި އެވެ. އެކަަމަކު، މި މެޗުގައި ޖެހުނީ އެންމެ ގޯލެކެވެ. އެ ލަނޑު މެޗުގެ ދެ ވަނަ ހާފުގެ ކުޅުން ފެށިގެން ހަ މިނިޓް ތެރޭ ޖެހީ ފެޑެރީކޯ ވަލްވޭޑޭ އެވެ. އޭރިއާ ރޮނގުކައިިރިން ވަލްވޭޑޭ ފޮނުވާލި ބޯޅަ ތިރިތިރިން ގޮސް އަމާޒުވީ ގޯލުގެ ކަަނަށެވެ. އެ ބޯޅަ ހުއްޓުވަން ޖިރޯނާގެ ޕައޮލޯ ގަޒަނީގާ އަށް މާ ބޮޑު ކަމެއް ނުކުރެވުނެވެ.
ރެއާލުން ލީޑުގައި އޮތީ 11 މިނިޓް ވަންދެނެވެ. ލީގުގެ 12 ވަނައިގައި އޮތް ޖިރޯނާ އިން 62 ވަނަ މިނިޓްގައި ލަނޑު ޖަހައި އެއްވަރުކުރި އެވެ. މި ލަނޑު ކާމިޔާބުކުރީ މެޗުގައި ރަނގަޅު ކުޅުމެއް ދެއްކި ފްރާންސްގެ ވިންގް، ތޯމަސް ލެމާ އެވެ.
އަލުން ލީޑުނަގަން ކުރި މަސައްކަތުގައި ރެއާލްގެ ކީލިއަން އެމްބާޕޭ އަށް އޭރިއާތެރެއިން ކުރި ފައުލަކަށް ޕެނަލްޓީ އެއް ހޯދަން ކުރި އެޕީލް ކާމިޔާބެއްނުވި އެވެ.
