ވިލިމާލޭގެ ޒަމާނީ ފަުނަވަލުގައި މި ސަރުކާރުން ބޭންކް އޮފް މޯލްޑިވްސް (ބީއެމްއެލް) އާ ހަވާލުކޮށްގެން ކުރިއަށްގެންދާ ފްލެޓު އެޅުމުގެ މަޝްރޫއު ހުއްޓުވައިދިނުމަށް ސުޕްރީމް ކޯޓަށް މިއަދު ދުސްތޫރީ މައްސަލައެއް ހުށަހަޅައިފި އެވެ.
މި މައްސަލަ ކޯޓަށް ހުށަހަޅާފައިވަނީ ތިމާވެށި ހިމާޔަތް ކުރުމަށް ވަކާލާތުކުރާ ހުމައިދާ އަބްދުލް ޣަފޫރު އަދި އަހުމަދު އިކްރާމްގެ ފަރާތުންނެވެ. ރައްޔިތުންގެ އާންމު މަސްލަހަތުގެ ދިފާއުގައި މި މައްސަލަ ހުށަހެޅީ ފުނަވާގެ ގަސްތައް ހިމާޔަތްކޮށް ދެމެހެއްޓުމުގެ މަގުސަދުގަ އެވެ.
އެ މައްސަލާގައި ބުނެފައިވާ ގޮތުގައި ވިލިމާލޭގެ ފުނަވަލަކީ ގްރޭޓާ މާލެ ސަރަހައްދުގައި ސަލާމަތުން ހުރި ހަމައެކަނި ދުވަސްވީ ގުދުރަތީ ގަސްގަހާގެހީގެ ތަރިކަ އެވެ. ބީއެމްއެލްއިން އާރުސީސިއާ ހަވާލުކޮށްގެން ކުރިއަށްގެންދާ މި މަޝްރޫއުގެ އަމަލީ މަސައްކަތް، ލޯކަލް ކައުންސިލް އިންތިޚާބާ ދިމާކޮށް އަވަސްއަރުވާލައިގެން ފަށާފައިވާ ކަމަށް ވެސް ދައުވާގައި ބުނެފައިވެ އެވެ.
ސުޕްރީމް ކޯޓަށް ހުށަހެޅި މައްސަލައިގައި މައިގަނޑު ހަތަރު ކަމަކަށް ވަނީ އެދިފަ އެވެ. އެންމެ މުހިންމު ކަމެއްގެ ގޮތުން އެދިފައި އޮތީ ގާނޫނާ ހިލާފަށް ކުރިއަށްގެންދާ މި މަޝްރޫއު އެއްކޮށް ހުއްޓާލުމަށް އަމުރުކޮށްދިނުމަށެވެ.
ހަމައެހެންމެ، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓެއް ހަދާފައި ނުވާތީ އެކަމާ މެދު ފިޔަވަޅު އެޅުމަށާއި، 50 އަހަރަށްވުރެ ގިނަ ދުވަސްވީ ގަސްތަކަށް ގެއްލުންވާ ފަދަ އެއްވެސް ކަމެއް އެ ސަރަހައްދުގައި ނުކުރުމަށް ސަރުކާރާއި މާލެ ސިޓީ ކައުންސިލަށް އަމުރުކޮށްދިނުން ހިމެނެ އެވެ.
މި މައްސަލައިގައި ފާހަގަކޮށްފައިވާ ގޮތުގައި، ސަރުކާރުން މި މަޝްރޫއު ފެށީ ރައްޔިތުންނާ އެއްވެސް މަޝްވަރާއެއް ކުރުމެއް ނެތި އަދި އެކަށީގެންވާ މައުލޫމާތު ހިއްސާކުރުމެއް ނެތި އެވެ.
ވިލިމާލޭގެ ފުނަވާ ސަރަހައްދުގައި ގާނޫނީ ގޮތުން ހިމާޔަތްކޮށްފައިވާ 50 އަހަރުން މަތީގެ ގިނަ ގަސްތަކެއް ހުރި އިރު، ގާނޫނުއަސާސީގެ 22 ވަނަ މާއްދާގެ ދަށުން ތިމާވެށި ހިމާޔަތްކުރުމަކީ ދައުލަތުގެ މައްޗަށް އޮތް ލާޒިމު ވާޖިބެއްކަން ދައުވާގައި ފާހަގަކޮށްފައިވެ އެވެ.
