ބޭންކް އޮފް މޯލްޑިވްސް (ބީއެމްއެލް) ގައި މިވަގުތު ހުރި ޑޮލަރު ޑިޕޮސިޓުގެ އަދަދު ގާތްގަނޑަކަށް 1.2 ބިލިއަން ޑޮލަރަށް އަރާކަން މިއަދު އެ ބޭންކުން ހާމަކުރި މައުލޫމާތުން އެނގިއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އެ ބޭންކުގެ ސީއީއޯ މުހައްމަދު ޝަރިފް ހާމަކުރެއްވި ގޮތުގައި ފާއިތުވި 43 އަހަރުގެ ތެރޭގައި ވެސް އެންމެ ބޮޑު ފައިދާއެއް އެ ބޭންކަށް ލިބުނީ މިދިޔަ އަހަރުގެ ތެރޭގަ އެވެ. މިއަހަރުގެ ފުރަތަމަ ކުއާޓަރު ވެސް ނިންމާލީ އެ ބާރު ދުވެލީގައި ކަމަށް ޝަރީފް ވިދާޅުވި އެވެ.
"ޖުމުލަ ޑިޕޮސިޓަކީ 40.7 ބިލިއަން ރުފިޔާ. މީގެ ތެރެއިން އަޅުގަނޑު ފާހަގަކޮށްލަން މިހާރު ހުރި ނިސްބަތަށް ބަލާއިރު މީގެ ދެ ބައިކުޅަ އެއް ބަޔަކީ ޑޮަލަރު ޑިޕޮސިޓް، ގާތްގަނޑަކަށް ދެ ބައިކުޅަ އެއް ބަޔަކީ ޑޮަލަރުން ބެހެއްޓިފައި ހުރި ޑިޕޮސިޓް ބޭންކުގައި،" ޝަރީފް ވިދާޅުވި އެވެ.
ޖުމަލަ ޑިޕޮސިޓްގެ ނިސްބަތުން ދެ ބައިކުޅަ އެއް ބަޔަކީ ޑޮަލަރުން ހުރި ޑިޕޮސިޓް ކަމަށްވާއިރު ރަސްމީ އެކްސްޗޭންޖު ރޭޓުގައި އެއީ ގާތްގަނޑަކަށް 1.3 ބިލިއަން ޑޮލަރެވެ.
ބީއެމްއެލްގެ ޖުމްލަ އެސެޓު 60 ބިލިއަން ރުފިޔާއަށް މިހާރު ވަނީ އަރާފަ އެވެ. އެއީ ބީއެމްއެލްގެ ތާރީހުގައި އެސެޓުތަކާއި ޑިޕޮސިޓުތައް އެންމެ މަތިވީ ފަހަރެވެ.
ބޭންކުން ވަނީ މިދިޔަ ކުއާޓަރުގެ ތެރޭގައި އާންމުންނާއި ވިޔަފާރިތަކަށް 226 މިލިއަން ޑޮލަރު ވިއްކާފަ އެވެ. އެއީ ޑޮލަރު ސަޕޯޓުގެ ގޮތުގައި ވިޔަފާރިތަކަށް ވިއްކި 106.2 މިލިއަން ޑޮލަރާއި، ކްރެޑިޓް ކާޑާއި ޑެބިޓު ކާޑުން ކުރެވުނު މުއާމަލާތްތަކަށް ވިއްކި 119.9 މިލިއަން ޑޮލަރެވެ.
މިއަހަރުގެ ފުރަތަމަ ކުއާޓަރުގައިި ބޭންކަށް އާމްދަނީގެ ގޮތުގައި 1.2 ބިލިއަން ރުފިޔާ ލިބުނެވެ. އޭގެ ތެރެއިން 631 މިލިއަން ރުފިޔާއަކީ ސާފު ފައިދާ އެވެ.
