ބޭންކް އޮފް މޯލްޑިވްސްް (ބީއެމްއެލް) އިން ލޯނާއި ފައިނޭންސިން ފެސިލިޓީ ދޫކުރާ އެންމެ މަތީ އުމުރު 60 އިން 75 އަށް އެ ބޭންކުން މަތިކޮށްފި އެވެ.
އުމުރުން 60 އަހަރުން މަތީގެ މީހުންނަށް މިހާރު ބޭންކަކުން ލޯނު ދޫނުކުރެ އެވެ. އެ ނިންމުން ބަދަލުކޮށްފައިވާކަން ހާމަކުރެއްވީ މިއަދު ބޭއްވީ ނޫސްވެރިންގެ ބައްދަލުވުމެއްގައި އެ ބޭންކުގެ ސީއީއޯ މުހައްމަދު ޝަރީފް އެވެ.
"60 އަހަރަށް ވުރެ އުމުރުން ދުވަސްވީ ބޭފުޅަކަށް ލޯނެއް ނުދެވޭ. މިސާލަކަށް 55 އަހަރު ވެފައިވާ ބޭފުޅަކަށް ވެސް މިހާރު ދެވޭނީ ފަސް އަހަރުގެ ތެރޭގައި ދައްކާ ނިންމޭނެ ލޯނެއް. މިހާރު އެ ބަދަލު މި ކުރީ 75 އަހަރަށް،" އޮކްޓޯބަރު 2024، ގައި ބޭންކުގެ އެންމެ އިސް މަގާމާ ހަވާލުވެވަޑައިގެންނެވި ޝަރީފް ވިދާޅުވި އެވެ.
މި ބަދަލުގެ ސަބަބުން ވަރަށް ގިނަ މީހުންނަށް ގެދޮރު ގަތުމަށާއި އަދި އެހެނިހެން ކަންކަމަށް ބޭނުންވާ ފައިސާ ހޯދުމަށް ފަސޭހަ ވެގެންދާނެ ކަމަށް ޝަރީފް ވިދާޅުވި އެވެ.
"މެދު އުމުރުގެ ބޭފުޅުންނަށް ވެސް އިތުރު ފަސޭހަ ވެގެންދާނެ، އެ އޮންނަ 20 އަހަރަށް ނުވަތަ 25 އަހަރަށް އެ ދަމާލައިގެން ފަސޭހަކޮށް އެ ލޯނު ދެއްކުމުގެ ފުރުސަތު ލިބިގެންދާނެ،" ޝަރީފް ވިދާޅުވި އެވެ.
މި ބަދަލު ގެނައީ އިއްޔެ ބޭއްވި ބޯޑު ބައްދަލުވުމެއްގައި ކަމަށް ބޭންކުން ބުނެ އެވެ.
މި އަހަރުގެ ފުރަތަމަ ކުއާޓަރުގެ ތެރޭގައި އާމްދަނީގެ ގޮތުގައި ލިބުނު 1.2 ބިލިއަން ރުފިޔާއިން، 631 މިލިއަން ރުފިޔާ ސާފު ފައިދާގެ ގޮތުގައި ބީއެމްއެލްއަށް ލިބުނެވެ.
މަހުގެ ފުރަތަމަ 15 ގައި ދޫކުރި ލޯނުތަކާއެކީ މި އަހަރު އެކަނި ފަސް ބިލިއަން ރުފިޔާގެ ލޯނު ބީއެމްއެލްއިން ވަނީ ދޫކޮށްފަ އެވެ.
