މެންޗެސްޓާ (އޭޕްރީލް 18) - އިނގިރޭސި ޕްރިމިއާ ލީގުގައި މާދަމާރޭ އާސެނަލާ ދެކޮޅަށް މެންޗެސްޓާ ސިޓީން ކުޅޭ މެޗަކީ "ފައިނަލެއް" ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ސިޓީން ވަނީ މިދިޔަ ހަފްތާގައި ޗެލްސީ ދަނޑުގައި ހޯދި މޮޅާ އެކު، ލީގުގެ އެއް ވަނައިގައި އޮތް އާސެނަލާ ދެމެދު ހަ ޕޮއިންޓަށް ފަރަގު ކުޑަކޮށްފަ އެވެ. ލީގުގެ އެއް ވަަނައިގައި އާސެނަލް އޮތީ 32 މެޗުން 70 ޕޮއިންޓާ އެކު އެވެ. ދެ ވަނައިގައި އޮތް ސިޓީ އަށް 31 މެޗުން ވަނީ 64 ޕޮއިންޓް ލިބިފަ އެވެ. ލީގުގައި މާދަމާރޭ އާސެނަލް ބަލިކޮށްގެން ދެ ޓީމުން މެޗު ހަމަކުރާއިރު ލީގު ތާވަލުގެ އެއް ވަނަ އަށް އެރުމުގެ ފުރުސަތު ސިޓީ އަށް އެބައޮތެވެ. އެކަމަކު، އާސެނަލް އަތުން ސިޓީ ބަލިވެއްޖެނަމަ، ދެ ޓީމުގެ މެޗު ހަމަވާއިރު، އާސެނަލަށް ލީޑެއް އޮންނާނެ އެވެ.
މާދަމާރޭގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ގާޑިއޯލާ ބުނީ، އެ މެޗުން ސިޓީ އަށް މޮޅުނެވިއްޖެނަަމަ، އެ ހިސާބުން ލީގުގެ ރޭސް ނިމުނީ ކަމަށެވެ.
"ޔަގީންކަަމެއް، އަހަރެމެން ބަލިވެއްޖިއްޔާ މި ކަން މި ނިމުނީ. އަހަރެމެން ބޭނުންވަނީ ކޮންފިޑެންސް، އެކަން ރަނގަޅަށް އޮތް ކަމަށް އަހަރެން ދެކެނީ، ސުަޕަމާކެޓަކުން ގަންނަ އެއްޗެއް ގޮތަށް ކޮންފިޑެންސް އޮވެއްޖެނަމަ، ކޮންމެ މީހަކު ވެސް އެކަން ކުރާނެ. އަހަރެމެންނަށް އޮތީ އަމިއްލަ އަށް އެކަން އޮތްކަން ސާބިތުކޮށްދިނުން،" ގާޑިއޯލާ ބުންޏެވެ.
ފާއިތުވި އަހަރުތަކުގައި ސިޓީން ގިނަ ފަހަރުތަކެއްގެ މަތިން ލީގު ޗެމްޕިއަންަކަން ހޯދާފައިވާތީވެ، އެ ޓީމަށް މީގެ އެޑްވާންޓޭޖް އޮތް ކަމަށް ގިނަ ބަޔަކު ބުނި ނަމަވެސް، ގާޑިއޯލާ ވަނީ މީގެ އެހެން ނަޒަރަކުން ވިސްނާއިރު އާސެނަލަށް ވެސް ބޮޑު ހިތްވަރެއް ލިބޭނެ ކަމެއް އެބައޮތް ކަމަށެވެ.
"ބާވީސް އަހަރު ލީގު ތަށްޓެއް ނުހޯދައި އާސެނަލުން އެ އޮތީ، އެ މީހުންނަށް އެނގޭ މި މެޗުން މޮޅުވިއްޔާ އެކަން ބަދަލުކުރެވޭނެކަން، އެހެންވީމަ، އެ މީހުން ހުރިހާ ގޮތަކުން ވެސް މި މެޗަށް ދޭ އަހައްމިއްޔަތުކަން ބޮޑުވާނެ. އެހެންވީމަ މެންޓަލް އެސްޕެކްޓަކަށް ބަލަންޏާމުން އެއީ ވެސް ކަމެއް. އަހަރެމެން އަބަދުވެސް އިދިކޮޅު ޓީމަށް އިހުތިރާމްކުރަން، އަހަރެމެން މެޗަށް ތައްޔާރުވާނީ ޓެކްޓިކަލީ ވެސް މެންޓަލީ ވެސް ވިސްނައިގެން،" އާޓެޓާ ބުންޏެވެ.
މިދިޔަ މަހު ސިޓީން ވަނި ލީގު ކަޕްގެ ފައިނަލުގައި 2-0 އިން އާސެނަލް ބަލިކޮށްފަ އެެވެ. ޕްރިމިއާ ލީގުގައި މާދަމާރޭ އަމިއްލަ ދަނޑުގައި އާސެނަލާ ކުޅޭއިރު، އެޑްވާންޓޭޖެއް އޮތް ކަމަށް ފެނޭތޯ ކުރި ސުވާލަށް ގާޑިއޯލާ ބުނީ، މެޗުގެ ކުރިން ކުރެވޭނީ ހުރިހާ ކަމަކަށް ވެސް އުންމީދު ކަމަށާއި ކޮންމެ ކަމެއްގެ ތަފާތު ވެސް ފެންނަން ޖެހޭނީ މެޗު ކުޅޭ ވަގުުތު ކަމަށެވެ.
"އަހަންނަށް މިކޭލް (އާޓެޓާ) ކޮންމެ ވެސް ވަރަކަށް އެނގޭ. އޭނަ ތައްޔާރުވާނެ ކޮންމެ ހާލަތަކަށް ވެސް،" ގާޑިއޯލާ ބުންޏެވެ.
މިދިޔަ ތިން އަހަރު ލީގުގެ ދެ ވަނައިގައި ނިންމި އާސެނަލާއި ފާއިތުވި ފަސް އަހަރުގެ ތެރެއިން ހަތަރު އަހަރު ލީގު ޗެމްޕިއަންކަން ހޯދި ސިޓީން ކުޅޭ މެޗު ފަށާނީ މާދަމާރޭ 20:30 ގަ އެެވެ.
