ލަންޑަން (އޭޕްރީލް 18) - ބްލެކްބާން ރޯވާސްއާ 1-1 އިން އެއްވަރުކޮށް، ފްރޭންކް ލަމްޕާޑްގެ ކޯޗުަކަމުގައި ކުޅޭ ކަވެންޓްރީ ސިޓީން 25 އަހަރަށް ފަހު އިނގިރޭސި ޕްރިމިއާ ލީގުގެ ޖާގައެއް ހޯދައިފި އެވެ.
ރޭގެ ނަތީޖާއާ އެކު، ކަވެންޓްރީ އަށް އިނގިރޭސި ދެ ވަނަ ޑިވިޝަން، ޗެމްޕިއަންޝިޕްގެ ގަދަ ދެ ޓީމުގެ ޖާގައެއް ވަނީ ޔަގީންވެފަ އެވެ. އެއާ އެކު، އަންނަ ސީޒަނުގެ އިނގިރޭސި ޕްރިމިއާ ލީގަށް ޕްރޮމޯޓްވީ އެވެ. ކަވެންޓްރީ މި ވަގުތު އެއް ވަނައިގައި އޮތީ 43 މެޗުން 86 ޕޮއިންޓް ހޯދައިގެންނެވެ. ދެ ވަނައިގައި އޮތް އިޕްސްވިޗް ޓައުން އަށް 41 މެޗުން ވަނީ 75 ޕޮއިންޓް ލިބިފަ އެވެ. ތިން ވަނައިގައި އޮތް މިލްވޯލް އަށް 42 މެޗުން 73 ޕޮއިންޓް، ހަތަރެއްގައި އޮތް ސައުތެމްޓަން އާއި ފަސް ވަނައިގައި އޮތް މިޑްލްސްބަރާ އަށް 42 މެޗުން 72 ޕޮއިންޓް އަދި ހަ ވަނައިގައި އޮތް ހަލް ސިޓީ އަށް ވަނީ 42 މެޗުން 68 ޕޮއިންޓް ލިބިފަ އެވެ.
ބްލެކްބާންގެ ދަނޑު އީވުޑް ޕާކްގައި ކުޅުނު މި މެޗުގެ ދެ ވަނަ ހާފުގެ ކުރީކޮޅުަގައި ބްލެކްބާން އިން ލީޑުނެގީ ރްޔޯޔާ މޮރިޝީޓާ ޖެހި ގޯލުންނެވެ. ކަވެންޓްރީން އެއްވަަރުކުރީ މެޗުގެ ފުރިހަމަ ވަގުުތު ހަމަވާން ހަ މިނިޓަށް ވެފައި ހުއްޓަ އެވެ. މި ލަނޑު ކާމިޔާބުކުރީ ޑިފެންޑަރު، ބޮބީ ތޯމަސް އެވެ.
އިނގިރޭސި ޕްރިމިއާ ލީގުގެ ޖާގައެއް ކަވެންޓްރީ އަށް ލިބުމަކީ، 1987 ވަނަ އަހަރުގެ އެފްއޭ ކަޕްގެ ޗެމްޕިއަންކަން އެ ޓީމުން ހޯދި ފަހުން އެ ކްލަބްގެ ތާރީހުގައި ހާސިލްވި އެންމެ ބޮޑު ކާމިޔާބެވެ. މި ކާމިޔާބީގެ އެންމެ ބޮޑު ކްރެޑިޓެއް ހައްގުވާ އެއް ފަރާތަކީ، 2024 ވަނަ އަހަރުގެ ނޮވެމްބަަރު 28 ވަނަ ދުވަހު ކަވެންޓްރީއާ ހަވާލުވި ކޯޗު ލަމްޕާޑް އެވެ. ލަމްޕާޑް ހަވާލުވިއިރު، ލީގުގެ 17 ވަނައިގައި އޮތް ކަަވެންޓްރީގެ ހާލަތު އެއްކޮށް ކަހަލަ ގޮތަކަށް ބަދަަލުކޮށް، ފުރަތަމަ ފުލް ސީޒަނުގައި އެ ޓީމަށް ޕްރިމިއާ ލީގުގެ ޖާގައެއް މި ހޯދައިދިނީ އެވެ.
ސްކައިސްޕޯޓްސް އަށް ދިން އިންޓަވިއުއެއްގައި ލަމްޕާޑް ބުނީ، އޮޓޮމެޓިކް ޕްރޮމޯޝަން ފުރުސަތެއް ހޯދަން ކަވެންޓްރީ ކުުޅުންތެރިން ކުރި މަސައްކަތަށް ހައްގު އިނާމެއް ލިބިފައިވާ ކަމަށެވެ.
"ބާކީ ތިން މެޗު އޮއްވައި، މި ކަން ހާސިލްކުރެވުމަކީ ހަގީގަތުގަައި ވަރަށް ބޮޑު އުފަލެއް، ވަރަށް ހާއްސަވާނެ ކާމިޔާބެއް،" ކުރިން ޗެލްސީ އާއި ޑާބީ ކައުންޓީ އަށް ކޯޗުކޮށްދިން ލަމްްޕާޑް ބުންޏެވެ.
އޭނާ ބުނީ 25 އަހަރު ފަހުން ކަވެންޓްރީން ޕްރިމިއާ ލީގަށް ނުކުންނާއި ވަރަށް ކެރިގެން، ޗެލެންޖްތައް ނަގަން ބޭނުންވާ ޓީމެއްގެ ގޮތުގައި ކަމަށެވެ.
