ނޭޕްލްސް (އޭޕްރީލް 21) - އިޓާލިއަން ލީގުގެ އެންމެ ފަހުގެ ޗެމްޕިއަން، ނަޕޯލީ އަށް ކުޅެމުން އަންނަ ބެލްޖިއަމް ގައުމީ ޓީމުގެ ފޯވާޑް، ރޮމެލޫ ލުކާކޫ އާއި އެ ކްލަބާ ދެމެދު ޖެހިފައިވާ މައްސަަލަ އަށް ހައްލެއް ހޯދުމަށް މަޝްވަރާތަކެއް ކުރިއަށްގެންގޮސްފި އެވެ.
މިދިޔަ މަހު ނަޕޯލީން އިއުލާނުކުރި ގޮތުގައި، އުމުރުން 32 އަހަރުގެ ލުކާކޫ ވަނީ އެ ކްލަބުގެ ޕްރެކްޓިހަށް ރިޕޯޓްކުރަން ދިން ފުރުސަތުގައި އެކަން އެގޮތަށް ކުރަން ދެކޮޅު ހަދައިފަ އެވެ. ބެލްޖިއަމް ގައުމީ ޓީމުން މިދިޔަ މަހު މެކްސިކޯ އާއި އެމެރިކާއާ ދެކޮޅަށް ކުޅުނު މެޗުތަކަށް ނެގި ސްކޮޑުގައި ފުރަތަމަ ލުކާކޫ ހިމެނުނު ނަމަވެސް، ފަހުން އޭނާ ވަނީ އަނިޔާއާ ހެދި ސްކޮޑުން ވަކިވެފަ އެވެ.
ފަލަމަސްގަނޑަށް ލިބިފައިވާ އަނިޔާގެ ސަބަބުން މި ސީޒަނުގައި ލުކާކޫ އަށް ވަނީ ގިނަ މެޗުތަކެއް ގެއްލިފަ އެވެ. އެއްވެސް މެޗެއްގައި ފުރަތަމަ އެގާރައިގައި ހިމެނިގެން ކުޅުމުގެ ފުރުސަތު ލިބިފައިނުވާއިރު، މުޅި ޖުމްލަ މި ސީޒަނުގައި ލުކާކޫ ކުޅެފައިވަނީ 64 މިނިޓެވެ. އެންމެ ފަހުން އޭނާ ކުޅުނު މެޗަކީ، މިދިޔަ މަހު ހަ ވަނަ ދުވަހު ނަޕޯލީން 1-0 އިން ޓޮރިނޯ އަތުން މޮޅުވި މެޗުގަ އެވެ.
ކުރިން ޗެލްސީ، މެންޗެސްޓާ ޔުނައިޓެޑް އަދި އިންޓަ މިލާނަށް ވެސް ކުޅެފައިވާ ލުކާކޫ، އަނިޔާ އަށް ފަަރުވާ ހޯދުމާއި ރިހެބިލިޓޭޝަންގެ ކަންކަން ބެލްޖިއަމްގައި ކުރިއަށްގެންދިއުމަށް ފަހު ވަނީ ނޭޕްލްސް އަށް ގޮސް ނަޕޯލީގެ ވެރިންނާ ބައްދަލުކޮށްފަ އެވެ. އެ ބައްދަލުވުމުގައި، ލުކާކޫގެ އޭޖެންޓް، ފެޑެރީކޯ ޕަސްޓޮރޭލޯ އާއި ނަޕޯލީގެ ސްޕޯޓިން ޑިރެކްޓަރު، ޖިއޮވާނީ މަންނާ ވަނީ ދެ ފަހަރާތުގެ ހުރި ކަންކަން ހިއްސާކޮށްފަ އެވެ.
އެ ބައްދަލުވުމަށް ފަހު، ނަޕޯލީ އާއި ލުކާކޫގެ ދެމެދުގައި ހުރި ހިޔާލު ތަފާތުވުންތަކަށް ހައްލެއް ލިބިފައިވާ ކަމަށް އިޓަލީގެ ނޫސްތަކުން ވަނީ ރިޕޯޓްކޮށްފަ އެވެ. އަދި، އަނިޔާގެ މައްސަލަަ އަށް ފަރުވާ ހޯދުމަށް ލުކާކޫ ކުރަމުން އަންނަ މަސައްކަތުގެ އެންމެ ފަހުގެ މައުލޫމާތު ނަޕޯލީ އަށް ހިއްސާކޮށްފައިވާއިރު، ދެ ހަފްތާއެއްހާ ދުވަސް ފަހުން މެޗުތަކުގައި ކުޅެވޭ ވަރަށް ލުކާކޫ ފިޓްވާނެ ކަމަށް ރިޕޯޓްތައް ބުނެ އެވެ.
