ނޭޕްލްސް، އިޓަލީ (ސެޕްޓެމްބަރު 14) - އިޓާލިއަން ލީގުގައި ރޭ ސަސުއޯލޯ އިން 3-2 އިން ޔުވެންޓަސް ބަލިކުރިއިރު، ބޮލޯނިއާ އަތުން 1-0 އިން ނަޕޯލީ މޮޅުވެއްޖެ އެވެ.
މިއީ، ލޫޝިއާނޯ ސްޕަލެއްޓީގެ ކޯޗުކަމުގައި ކުޅޭ ޔުވެންޓަސް އިން މި ސީޒަނުގައި ބަލިވި ފުރަތަމަ މެޗެވެ.
ސަސުއޯލޯ ދަނޑުގައި ރޭ ކުޅުނު މެޗު ފަށައިގެން ތިން ވަނަ މިނިޓްގައި ޔުވެންޓަސްގެ ނިކޯ ގޮންޒާލޭޒް ޖެހި ޝޮޓެއް ބޭރުވީ ހުރަސްދަނޑީގައި ޖެހިފަ އެވެ. މެޗުގެ ފަސް ގޯލު ވެސް ފެނިގެންދިޔައީ ދެ ވަނަ ހާފުގަ އެވެ.
މެޗުގެ 65 ވަނަ މިނިޓްގައި ސަސުއޯލޯ އިން ލީޑުނެގީ ސެބަސްޓިއާނޯ އެސްޕޮސީޓޯ ޖެހި ގޯލުންނެވެ. މިއީ، ނަމަންޏާ މަޓިޗް ދިން ބޯޅަ އަކަށް އޭރިއާތެރެއިން އަރައި އެސްޕޮސީޓޯ ތިރިތިރިން ގޯލަށް ފޮނުވާލައިގެން ޖެހި ގޯލެކެވެ. ޔުވެންޓަސް އިން އެއްވަރުކުރީ 82 ވަނަ މިނިޓްގައި އެޑޮން ޒެގްރޯވާ ޖެހި ލަނޑުންނެވެ. އޭރިއާތެރެއިން ލިބުނު ފުރުސަތުގައި އޭނާ ވަނީ ހަަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ސަސުއޯލޯ އިން ދެ ވަނަ ފަހަރަށް ލީޑުނެގީ 88 ވަނަ މިނިޓްގަ އެވެ. މިއީ، އޭރިއާ ރޮނގުކައިރިން ކުޑަކޮށް އެތެރެއަށް ވަދެ، ލިބުނު ފުރުސަތަކުން ކިއެރަން ބޯވީ ޖެހި ގޯލެކެވެ. އިތުރު ވަގުތުގެ ފުރަތަމަ މިނިޓްގައި، ޒެގްރޯވާ ވަނީ ލަނޑު ޖަހައި، މެޗުގައި ޔުވެންޓްސް އަށް ދެ ވަނަ ފަހަރަށް އެއްވަރުކޮށްދީފަ އެވެ. ޔުވެންޓަސް އިން ދެ ވަނަ ފަހަރަށް އެއްވަރުކުރިތާ ދެ މިނިޓް ފަަހުން، އިތުރު ވަގުތުގެ ހަތަރު ވަނަ މިނިޓްގައި، ސަސުއޯލޯ މި މެޗުން މޮޅުކޮށްދިން ލަނޑު ޖެހީ، ވަސިލިޔޭ އަޑްޒިޗް އެވެ.
ނޭޕްލްސްގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗުގައި ބޮލޯނިއާގެ ތެއާޓް، ހަތަރު ވަނަ މިނިޓްގައި ޖެހި ގޯލެއް ރެފްރީ ނިންމީ އޮފްސައިޑް ކަމަށެވެ.
މެޗުގެ 14 ވަނަ މިނިޓްގައި ނަޕޯލީގެ ކެވިން ޑި ބްރޭނާ ޖެހި ބޯޅައެއް ދިޔައީ ހުރަސްދަނޑިމަތިންނެވެ. އޭގެ ތިން މިނިޓް ފަހުން، މަޓެއޯ ޕޮލިޓާނޯ ނެގި ހުރަހަކަށް އަރައި، ރަސްމުސް ހޮއިލުންޑް ބޮލުން ފޮނުވާލި ބޯޅައެއް ދިޔައީ ދަނޑިކައިރިން ބޭރުންނެވެ. ބޮލޯނިއާގެ ފެޑެރީކޯ ބާނަޑޭޝްކީ ޖެހި ޝޮޓެއް ނަޕޯލީގެ ކީޕަރު، ވަންޖާ މިލިންކޮވިޗް-ސަވިޗް ވަނީ މަތަކޮށްފަ އެވެ.
ނަޕޯލީ އަށް މެޗުގެ ތިން ޕޮއިންޓް ހޯދައިދިން ގޯލު ޖެހީ 65 ވަނަ މިނިޓްގައި ސްޓަނިސްލާވް ލޮބޮޓްކާ އެވެ. އޭރިއާތެރެއަަށް ކޮންސްޓަންޓީނޯ ފަވަސޫލީ ނެގި ހުރަހަކުން ލޮބޮޓްކާ ފޮނުވާލި ބޯޅަ ގޯލަށް ވަނީ ބޮލޯނިއާގެ ކީޕަރު، މަސީމޯ ޕެސީނާ ފައިގައި ޖެހިފަ އެވެ.
އިޓާލިއަން ލީގުގެ އެއް ވަނައިގައި ލާޒިއޯ އޮތީ ހަތަރު މެޗުން 10 ޕޮއިންޓާ އެކު އެވެ. ނަޕޯލީ، 10 ވަނައިގައި އޮތީ ހަތަރު މެޗުން ހަ ޕޮއިންޓާ އެކު އެވެ. ޔުވެންޓަސް އަށް ހަތަރު މެޗުން ލިބުނު ހަތް ޕޮއިންޓާ އެކު، އޮތީ އަށް ވަނައިގަ އެވެ. ނުވަ ވަނައިގައި އޮތް ސަސުއޯލޯ އަށް ވެސް ހަތަރު މެޗުން ވަނީ ހަތް ޕޮއިންޓް ލިބިފަ އެވެ.
