މިލާން (ސެޕްޓެމްބަރު 6) - އިޓާލިއަން ލީގުގެ އެންމެ ފަހުގެ ޗެމްޕިއަން، އިންޓަ މިލާނުން މިރޭ ލީގުގައި ކުޅުނު މެޗުން ފަހަތުން އަރައި 3-2 އިން ނަޕޯލީ ބަލިކޮށްފި އެވެ.
އިންޓަ އިން މި ވަނީ ލީގުގައި މި ފަހަރު ކުޅުނު ތިން މެޗުން ވެސް މޮޅުވެ، ރެކޯޑް ދަމަހައްޓައިފަ އެވެ. އެ ޓީމަށް ތިން މެޗުން ލިބުނު ނުވަ ޕޮއިންޓާ އެކު މި ވަގުތު އޮތީ އެއް ވަނައިގަ އެވެ.
ސަން ސީރޯ ސްޓޭޑިއަމްގައި ކުޅުނު މި މެޗުގެ ހަ ވަނަ މިނިޓްގައި ނަޕޯލީގެ މަޓެއޯ ޕޮލިޓާނޯ ޖެހި ޝޮޓެއް އިންޓަގެ ކީޕަރު ޖޯސެފް މާޓީނޭޒް ވަނީ މަތަކޮށްފަ އެވެ. އިންޓަ އަށް ލީޑުނަގައިދޭން މެޗުގެ ފުރަތަމަ ހާފުގެ އިތުރު ވަގުތުގައި އެ ޓީމުގެ ފުލްބެކް، ފެޑެރީކޯ ޑި މާކޯ ޖެހި ހިލޭޖެހުން އަމާޒުވީ ގޯލުގެ ހުރަސް ދަނޑިއަށެވެ.
ނަޕޯލީން ވަނީ ދެ ވަނަ ހާފުގެ ކުޅުން ފެށިގެން ފަސް މިނިޓް ތެރޭ ލީޑުނަގައިފަ އެވެ. މެޗުގެ 50 ވަނަ މިނިޓްގައި، އިންޓަ އޭރިއާތެރެއިން،ދެ ފަހަރު މަތިން ފޮނުވާލަން ލިބުނު ބޯޅަ ޕޮލިޓާނޯ ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ. އޭގެ ދެ މިނިޓެއް ފަހުން، އިންޓަ އޭރިއާތެރެއިން ނަޕޯލީގެ ރަސްމުސް ހޮއިލަންޑް ވަނީ ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިގެން އެ ޓީމަށް ދެ ވަނަ ލަނޑެއް ޖަހައިދީފަ އެވެ.
ދެ ގޯލުގެ ލީޑެއް ނަގައި، ނަޕޯލީ އަށް ހަމަޖެހިނުލެވެނިސް އިންޓަ އިން ލަނޑެއް ޖެހި އެވެ. އެ ޓީމަށް މެޗުގެ 55 ވަނަ މިނިޓްގައި މި ގޯލު ކާމިޔާބުކޮށްދިނީ ޑި މާކޯ ހުސްކޮށްލާފައި ނަގައިދިން ބޯޅައަކުން ލައުޓާރޯ މާޓީނޭޒް އެވެ. އިންޓަ އަށް އެއްވަރުކޮށްދޭން މެޗުގެ 72 ވަނަ މިނިޓްގައި މާކަސް ތުރާމް ބޮލުން ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. އިންޓަ އަށް އެއްވަރުކޮށްދިން ލަނޑު ޖެހީ ތުރާމް އެވެ. ނަޕޯލީ ކުޅުންތެރިއަކު އަނިޔާވެގެން އޭރިއާތެރޭގައި ވެއްޓިފައި އޮއްވައި، ކުޅުން ނުހުއްޓައި އިންޓަ އިން ކުރިއަށްގެންދިޔަ އެޓޭކުގައި، އޭރިއާތެރެއަށް ހުރަސްވި ބޯޅަ ތުރާމް ވަނީ ބޮލުން ގޯލަށް ވައްދާލައިފަ އެވެ.
ނަޕޯލީ އަށް އަލުން ލީޑުނަގައިދޭން 88 ވަނަ މިނިޓްގައި ކުޑައޭރިއާތެރެއިން އަންގީސާ އަށް ލިބުނު ބޯޅަ ފޮނުވާލުމުން ދިޔައި ބޭރުންނެވެ.
އިންޓަ އިން މެޗުން މޮޅުވީ އިތުރު ވަގުތުގެ ފުރަތަމަ މިނިޓްގައި މާޓީނޭޒް ޖެހި ގޯލުންނެވެ. މިއީ، ނަޕޯލީގެ އޭރިއާތެރެއިން އެ ޓީމުގެ ޑިފެންޑަރުންނަށް ސަލާމަތްނުކުރެވިދިޔަ ބޯޅައެއް ހޯދައި، މާޓީނޭޒް ޖެހި ގޯލެކެވެ.
