ނޭޕްލްސް، އިޓަލީ (ސެޕްޓެމްބަރު 2) - ހިތުގެ މައްސަލައެއް އުޅޭ ކަމަށް ޓެސްޓްތަކުގެ ނަތީޖާ އިން ދެއްކުމުން، އެ އަށް ހައްލެއް ހޯދުމުގެ ގޮތުން، ނަޕޯލީ އަށް ކުޅޭ ސްކޮޓްލެންޑްގެ މިޑްފީލްޑަރު، ސްކޮޓް މެކްޓޮމިނޭ ކުޅުމާ ދުރަށް ދާން ޖެހިއްޖެ އެވެ.
ނަޕޯލީން އިޓާލިއަން ލީގުގައި އެންމެ ފަހުން ކުޅުނު މެޗުގައި، 2-1 އިން ކޯމޯ އަތުން ބަލިވިއިރު، އެ މެޗުގެ 56 ވަނަ މިނިޓްގައި، އުމުރުން 29 އަހަރުގެ މެކްޓޮމިނޭ ވަނީ ބަދަލުކޮށްފަ އެވެ. މެކްޓޮމިނޭ ބަދަލުކުރަން ޖެހުނީ މެ އަށް ތަދުވާތީ ކަމަށް އެ މެޗަށް ފަހު އޮތް ނޫސްވެރިންގެ ބައްދަލުވުމުގައި، ނަޕޯލީގެ ކޯޗު، މަސިމޯ އަލެގްރީ ވަނީ ބުނެފަ އެވެ.
މެކްޓޮމިނޭ އަށް މި ދިމާވި، ހިތުގެ މައްސަލަ ދެނެގަތުމަށް ހެދި ޓެސްޓްތަކުން އެނގިފައިވަނީ، އޭނާގެ ހިތުގެ ވިންދު ޖަހަނީ އެކަށީގެންވާ ސްޕީޑެއްގައި ނޫން ކަމެވެ. އެހެންވެ، މި މައްސަލަ ރަނގަޅު ކުރުމަށްޓަކައި ހިތުގެ ކުޑަ ސާޖަރީއެއް ހަދަން ޖެހޭ ކަމަށް ޑޮކްޓަރުން ވަނީ ލަފާދީފަ އެވެ. އެއާ އެކު، ނަޕޯލީ އާއި ސްކޮޓްލެންޑް ގައުމީ ޓީމުން މިހާރު ނިންމާފައިވަނީ އެ ސާޖަރީ ކުރިއަށް ގެންދިއުމަށެވެ.
އިންސްޓަގްރާމްގައި ކުރި ޕޯސްޓެއްގައި، މެކްޓޮމިނޭ ބުނެފައިވަނީ، މާ ލަސްތަކެއް ނުވެ، ކުޅުމަށް އަވަހަށް އެނބުރި އަންނާނެ ކަމަށެވެ.
ކުޅުމާ ދުރުގައި ހުންނަ މުއްދަތުގެ ތެރޭގައި، މެކްޓޮމިނޭ އަށް ނަޕޯލީގެ މެޗުތަކުގެ އިތުރުން، ސްކޮޓްލެންޑް ގައުމީ ޓީމުގެ ކުރިއަށް އޮތް ހަތަރު މެޗު ވެސް ގެއްލޭނެ އެވެ.
މި މަހުގެ 23 އިން އަންނަ މަހުގެ ހަ ވަނަ ދުވަހުގެ ނިޔަލަށް އޮތް ފީފާ ބްރޭކުގައި، ސްކޮޓްލެންޑުން އާ ކޯޗު، ސަބެސްޓިއަން ޕޮކޮގްނޯލީގެ އިރުޝާދުގެ ދަށުން ހަތަރު މެޗު ކުޅޭނެ އެވެ. އެއީ، ސްލޮވީނިއާއާ އެކު، ކުޅޭ ދެ މެޗާއި ނޯތު މެސެޑޯނިއާ އާއި ސްވިޒަލެންޑާ ދެކޮޅަށް ކުޅޭ މެޗުތަކެވެ.
ޔޫތު ކެރިއަރުން ފެށިގެން، ސީނިއާ ކެރިއަރުގެ ބޮޑުބައި މެކްޓޮމިނޭ ހޭދަކުރީ އިނގިރޭސި ޕްރިމިއާ ލީގުގެ ގަދަބާރު، މެންޗެސްޓާ ޔުނައިޓެޑުންނެވެ. އެ ގޮތުން، 2002 އިން 2017 އަށް ޔުނައިޓެޑްގެ ޔޫތު ސެޓަޕްގައި ހޭދަކުރުމަށް ފަހު، 2017 ވަނަ އަހަރުން ފެށިގެން ޔުނައިޓެޑްގެ ސީނިއާ ޓީމަށް ކުޅެން ފެށި އެވެ. އޭނާ ނަޕޯލީ އަށް ބަދަލުވީ 2024 ވަނަ އަހަރު، 30 މިލިއަން ޑޮލަރުގެ ޑީލެއްގަ އެވެ.
ޔުނައިޓެޑާ އެކު، އިނގިރޭސި ލީގު ކަޕާއި އެފްއޭ ކަޕް ޗެމްޕިއަންކަން ހޯދި މެކްޓޮމިނޭ ވަނީ ނަޕޯލީއާ އެކު އިޓާލިއަން ލީގާއި އިޓާލިއަން ސުޕަ ކަޕް ކާމިޔާބުކޮށްފަ އެވެ. އަދި، އިޓާލިއަން ލީގުގެ 2025 ވަނަ އަހަރުގެ މޮޅު ކުޅުންތެރިޔާގެ މަގާމު ހޯދި މެކްޓޮމިނޭ އެވެ.
