މެންޗެސްޓާ (އޭޕްރީލް 14) - އިނގިރޭސި ޕްރިމިއާ ލީގުގައި ލީޑްސް ޔުނައިޓެޑުން 2-1 އިން މެންޗެސްޓާ ޔުނައިޓެޑް ބަލިކޮށްފި އެވެ.
މިއީ، ލީޑްސް އިން ޔުނައިޓެޑްގެ ދަނޑުގައި ލީގުގައި 1981 ވަަނަ އަހަރުގެ ފަހުން ހޯދި ފުރަތަމަ މޮޅެވެ.
މިއީ، މިދިޔަ މަހުގެ 21 ވަނަ ދުވަހު އިނގިރޭސި ޕްރިމިއާ ލީގުގައި ބޯންމައުތާ 2-2 އިން އެއްވަރުވި މެޗަށް ފަހު، ޔުނައިޓެޑުން ކުޅުނު ފުރަތަމަ މެޗެެވެ. ޔުނައިޓެޑުން ލީޑްސް އަތުން ބަލިވި މެޗުގެ ދެ ވަނަ ހާފުގެ ބޮޑުބައި ކުޅުނީ އެއް ކުޅުންތެރިއަކު މަދުކޮށެވެ. އެއީ، ލީޑްސް އިން ދެ ގޯލުގެ ލީޑެއްގައި ވަނިކޮށް 55 ވަނަ މިނިޓްގައި އެ ޓީމުގެ ލިސަންދްރޯ މާޓިނޭޒް އަށް ރަތެއް ދެއްކުމުންނެވެ. މާޓީނޭޒަަށް ރަތެއް ދެއްކީ ލީޑްސްގެ ފޯވާޑް، ޑޮމިނިކް ކަލްވެޓް-ލެވިން ބޮލުގެ އިސްތަށިގަނޑުގައި ހިފައި ދަމައިގަތުމުންނެވެ، ރަތް ކާޑެއް ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ.
އޯލްޑް ޓްރެފޯޑްގައި ކުޅުނު މެޗުގެ ފަސް ވަނަ މިނިޓްގައި ލީޑްސް އިން ލީޑުނެގީ އޭރިއާތެރެއިން ލިބުނު ފުރުސަތަކުން ނޯއާ އޮކަފޯ ޖެހި ގޯލުންނެވެ. އޭނާ ވަނީ ލިބުނު ފުރުސަތުގައި އެއް ފަހަރުން ގޯލަށް ބޯޅަ ފޮނުވާލައިފަ އެވެ. އޭގެ ކުރިން ކަލްވެޓް ލެވިން ޖެހި ބޯޅައެއް ޔުނައިޓެޑްގެ ކީޕަރު ސެން ލަމެންސް ވަނީ މަތަކޮށްފަ އެވެ.
މެޗުގައި ރަނގަޅު ކުޅުމެއް ދެއްކި ލީޑްސް އިން 29 ވަނަ މިނިޓްގައި ދެ ވަނަ ލަނޑު ޖެހީ ވެސް އޮކަފޯ އެވެ. އޭރިއާބޭރުން ފޮނުވާލި ބޯޅަ ގޯލަށް ވަނީ ޔުނައިޓެޑްގެ ލެނީ ޔޯރޯ ގައިގައި ޖެހިފަ އެވެ. އޭގެ ފަހުން، ލީޑްސްގެ އާއޯ ޓަނާކާ އަށް ތިން ވަނަ ލަނޑެއް ޖަހަން ރަނުގެ ފުރުސަތެއް ލިބުނެވެ. ކީޕަރު ލަމެންސް ކައިރިިން ނައްޓާފައި، ޓަނާކާ އެ ބޯޅަ ފޮނުވާލުުމުގެ ކުރިން މާޓީނޭޒް އައިސް އެ ބޯޅަ ވަނީ ބޭރުކޮށްލައިފަ އެވެ.
ދެ ވަނަ ހާފުގެ ކުޅުން ފެށިގެން ޔުނައިޓެޑަށް ލަނޑެއް ޖަހައިދޭން ބެންޖަމިން ސެސްކޯ ފޮނުވާލި ބޯޅަ ލީޑްސްގެ ކީޕަރު ކާލް ޑާލޯ ވަނީ މަތަކޮށްފަ އެވެ. އެކަމަކު، އޭގެ އިރުކޮޅެއް ފަހުން، ޔުނައިޓެޑްގެ މާޓީނޭޒަށް ރަތެއް ދެއްކުމުން އެ ޓީމަށް އެޓޭކަށް ދިއުމަށް ގޮންޖެހުންތަކެއް ދިމާވެ، ޑިފެންސަށް ގިނަ ކުޅުންތެރިން ފައިބަން ޖެހުނީ އެވެ.
އެކަމަކު، ކުޅުންތެރިއަކު މަދުކޮށް ވެސް ޔުނައިޓެޑުން އެޓޭކްކުރި އެވެ. އެ ގޮތުން، ޔުނައިޓެޑްގެ މަޓެއުސް ކޫންޏާ ފޮނުވާލި ބޯޅައެއް ކީޕަރު ޑާލޯ ވަނީ މަތަކޮށްފަ އެވެ. އެކަމަކު، މެޗުގެ 68 ވަނަ މިިނިޓްގައި ބްރޫނޯ ފެނާންްޑޭސް ނެގި ހުރަހަކުން ކަސެމީރޯ ވަނީ ބޮލުން ގޯލެއް ޖަހައި ފަރަގުކުޑަކޮށްފަ އެވެ. އޭގެ ފަހުން، ސެސްކޯ ބޮލުން ޖެހި ބޯޅައެއް ކީޕަރު ޑާލޯ ވަނީ ހުއްޓުވައިފަ އެވެ.
ލީޑްސް އިން ޔުނައިޓެޑް ބަލިކޮށް މި ފަހަރު ލީގުގައި ރަށުންބޭރުގައި މި ހޯދީ ދެ ވަނަ މޮޅެެވެ. މި މެޗުގެ ކުރިން ލީޑްސް އިން ލީގުގައި ރަށުންބޭރުގައި މޮޅުވީ ތާވަލުގެ ފުލުގައި އޮތް ވުލްވްސް ދަނޑުގަ އެވެ. މި މޮޅާ އެކު، ލީޑްސް ވަނީ ރެލިގޭޝަން ޒޯނާ ހަ ޕޮއިންޓަށް ފަރަގު ބޮޑުކޮށްފަ އެވެ. ލީޑްސް އިން 15 ވަނައިގައި އޮތީ 32 މެޗުން 36 ޕޮއިންޓާ އެކު އެވެ.
މައިކަލް ކެރިކް، ޔުނައިޓެޑްގެ ވަގުތީ ކޯޗުކަމާ ހަވާލުވި ފަހުން އެ ޓީމު ދެ ވަނަ މެޗުން ބަލިވިއިރު، މި ނަތީޖާއާ އެކު ތިން ވަނައިގައި ލީޑުފުޅާކުރަން ލިބުނު ފުރުސަތު ގެއްލުނީ އެވެ. ތިން ވަނައިގައި އޮތް ޔުނައިޓެޑާއި ހަތަރެއްގައި އޮތް އެސްޓަން ވިލާ އަށް 32 މެެޗުން 55 ޕޮއިންަޓް ލިބިފައިވާއިރު، ފަސް ވަނައިގައި އޮތް ލިވަޕޫލަށް ވަނީ 32 މެޗުން 52 ޕޮއިންޓް ލިބިފަ އެވެ.
