ލަންޑަން (އޭޕްރީލް 13) - އިނގިރޭސި ޕްރިމިއާ ލީގުގައި މި ހަފްތާގައި ކުޅުނު މެޗުން 2-1 އިން ބޯންމައުތު އަތުން ބަލިވެ، ލީގުގެ އެއް ވަނައިގައި ލީޑު ދަމަހައްޓަން ލިބުނު ފުރުސަތު ގެއްލުމާ އެކު، އާސެނަލްގެ ސަޕޯޓަރުންގެ ކައިރިން އެ ޓީމުގެ ކޯޗު މިކޭލް އާޓެޓާ މާފަށް އެދިއްޖެ އެެވެ.
ބޯންމައުތު އަތުން ބަލިވިއިރު، މިއީ، އެންމެ ފަހުން އާސެނަލް އިން ކުޅުނު ހަތަރު މެޗުގެ ތެރެއިން ބަލިވި ތިން ވަނަ މެޗެވެ. އާސެނަލް މޮޅުވީ، ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި ސްޕޯޓިން ލިޒްބަން އަތުންނެވެ. ބަލިވީ ލީގު ކަޕް ފައިނަލުގައި މެންޗެސްޓާ ސިޓީ އަތުންނާއި އެފްއޭ ކަޕް ކުއާޓާ ފައިނަލުގައި ސައުތެމްޓަން އަތުންނާއި ލީގުގައި ބޯންމައުތު އަތުންނެވެ. މީގެއިން އެއްވެސް މެޗެއްގައި އާސެނަލަށް ލީޑު ވެސް ނުނެގުނެވެ.
އާސެނަަލަށް ބޯންމައުތު ބަލިނުކުރެވުމުގެ ފައިދާ ދެ ވަނައިގައި އޮތް ސިޓީން ވަނީ ރަނގަޅަށް ނަގައިފަ އެވެ. އެއީ، ރޭ ޗެލްސީ ދަނޑުގައި 3-0 އިން މޮޅުވެގެންނެވެ. ސިޓީން ވަނީ މި މޮޅާ އެކު، ލީގުގެ އެއް ވަނައިގައި އޮތް އާސެނަލާ ދެމެދު ހަ ޕޮއިންޓަށް ފަރަގު ކުޑަކޮށްފަ އެވެ. ލީގުގެ އެއް ވަަނައިގައި އާސެނަލް އޮތީ 32 މެޗުން 70 ޕޮއިންޓާ އެކު އެވެ. ދެ ވަނައިގައި އޮތް ސިޓީ އަށް 31 މެޗުން ވަނީ 64 ޕޮއިންޓް ލިބިފަ އެވެ. ލީގުގައި އަންނަ ހަފްތާގައި ސިޓީން ކުޅޭނީ އަމިއްލަ ދަނޑުގައި އާސެނަލާ ދެކޮޅަށެވެ. އެ މެޗުން މޮޅުވެ، މެޗު ހަމަކުރާއިރު ފުރިހަމަ ރެކޯޑަކާ އެކު ކުރިއަށް ގޮސް ލީގު ތާވަލުގެ އެއް ވަނަ އަށް އެރުމުގެ ފުރުސަތު އެބައޮތެވެ.
ބޯންމައުތު އަތުން ބަލިވި މެޗަށް ފަހު، އާޓެޓާ ބުނީ އާސެނަލް ސަޕޯޓަރުންނަކީ ޓީމަށް ހިތްވަރު ދިނުމުގައި ނަމޫނާ ބައެއް ކަމަށާއި ދަނޑު ތެރޭގައި ޓީމަށް ބޭނުންވާ މާހައުލެއް ގާއިމްކުރުމުގައި ވެސް ތަފާތު ދައްކާ ބައެއް ކަމަށެވެ. އަދި، އެ ފަދަ ޓީމަކާ ހަވާލުވެހުރެ އެންމެ ފަހުން މެޗުގައި ނުކުތް ނަތީޖާ އަކީ ހާލަތުގެ ގޮތުން ބަލައިގަންނަން އުނދަގޫ ކަމެއް ކަމަށް އާޓެޓާ ވަނީ ބުނެފަ އެވެ.
"އަހަރެން މާފަށް އެދެން، އެކަމަކު، ޔަގީންކުރަންވީ ކަމަކީ އަހަރެން ހުރިހާ ކަމެއް ވެސް މި ކުރަނީ މި ކްލަބް އޮންނަން ޖެހޭ ކާމިޔާބު ހޯދާ ލެވަލަށް ގެންދިއުމަށްޓަކައި، މި ނަތީޖާ (ބޯންމައުތު އަތުން ބަލިވި މެޗަކީ) މޫނު މަތީގައި އަޅުވާލި އެތިފަަހަރެއް ފަދަ ކަމެއް. ހަގީގަތާ ކުރިމަތިލައި މި ޕްރެޝަރުތަކުން އަރައިގަންނަން ޖެހޭ،" އާޓެޓާ ބުންޏެވެ.
ފާއިތުވި ތިން ސީޒަނުގައި ވެސް، އާސެނަލް ގޮވައިގެން ލީގުގެ ދެ ވަނައިގައި ނިންމާލި އާޓެޓާ ބުނީ، މި ސީޒަން ފެއްޓުމުގެ ކުރިން، އޭޕްރީލް މަހުގައި އާސެނަލް އޮންނާނީ ލީގު ތާވަލުގައި މިހާރު އޮތް ހިސާބު ކަމަށް ބުނެފިނަމަ، އެއީ ރަނގަޅު ކަމެއް ކަމަށް ދެކޭނެ ކަމަށެވެ. އެ ގޮތުން، އާސެނަލުން މިހާރު ވިސްނަންވީ ސީޒަނުގެ ބާކީ ބައިގައި ރަނގަޅު ނަތީޖާ ނެރެން ޕޮޒިޓިވް ވިސްނުމެއްގައި މެޗުތަކަށް ކުރިމަތިލުމަށް ކަމަށް އާޓެޓާ ވަނީ ބުނެފަ އެވެ.
އާސެނަލް ދެން އެންމެ އަވަހަށް ނުކުންނާނީ ޗެމްޕިއަންސް ލީގުގެ ކުއާޓާ ފައިނަލުގެ ދެ ވަނަ ލެގުގައި އަމިއްލަ ދަނޑުގައި މާދަމާރޭ ސްޕޯޓިން ލިޒްބަންއާ ދެކޮޅަށެެވެ.
