ލަންޑަން (އޭޕްރީލް 15) - މި ސީޒަނަށް ފަހު އިނގިރޭސި ޕްރިމިއާ ލީގުގެ ބޯންމައުތުގެ ކޯޗުކަން ދޫކޮށްލާނެކަން އިއުލާނުކުރި ސްޕެއިނުގެ ކޯޗު އަންޑޯނީ އިރައޯލާ އަށް ގިނަ ކްލަބްތަކެއްގެ ހުށަހެޅުންތަކެއް ލިބެންފަށާފައިވާ ކަމަށް ރިޕޯޓްތައް ބުނެފި އެވެ.
އިރައޯލާ، 43، ބޯންމައުތުގެ ކޯޗުކަމާ ހަވާލުވީ 2023 ވަނަ އަހަރުގެ ޖޫން މަހު އެވެ. އެއީ، އޭރު އެ ޓީމުގެ ކޯޗަކަށް ހުރި ގެރީ އޮނީލް ވަކިކުރުމަށް ފަހު ބޯންމައުތު މެނޭޖްމަންޓުން ގެނައި ބަދަލެކެވެ. އިރައޯލާ އަށް ދެ އަހަރުގެ ކޮންޓްރެކްޓެއް އެންމެ ފުރަތަމަ ބޯންމައުތުން ދިންއިރު، ފަހުން އެ އެއްބަސްވުން އާ ކޮށް މި ސީޒަން ނިމުމުން އޭނާ ބޯންމައުތު ދޫކޮށްލާނީ، ތިން އަހަަރު އެ ޓީމުގައި ހޭދަކޮށްފަ އެވެ.
މީގެ އަށް އަހަރު ކުރިން އިރައޯލާ ކޯޗިން ކެރިއަރު ފެށީ ސައިޕްރަސްގެ އޭއީކޭ ލަނާކާ އިންނެވެ. އެ ޓީމަށް 2018-2019 ސީޒަނުގައި ކޯޗުކޮށްދިނުމަށް ފަހު، ޖެހިގެން އައި ސީޒަނުގައި، ސްޕެއިނުގެ މިރަންޑެސް އަށް ކޯޗުކޮށްދިންނެވެ. އެ ކްލަބްގައި ކުރި މަސައްކަތް ރަނގަޅުވުމުން 2020-2023 އަށް ރަޔޯ ވަޔެކާނޯގައި ކޯޗުކޮށްދޭން ފުރުސަތެއް ލިބުނެވެ. ވަޔެކާނޯ އަށް ފަހު، ދެން، އިރައޯލާ ފެނުނީ ބޯންމައުތުގެ ކޯޗެއްގެ ގޮތުގަ އެވެ.
އިރައޯލާ، ދެން ފެންނާނީ އޭނާގެ ކުޅުމުގެ ކެރިއަރުގައި އެންމެ ގިނަ އަހަރުތަކެއް ހޭދަކުރި ކްލަބް، އެތުލެޓިކް ބިލްބާއޯ އިން ކަމަށް ރިޕޯޓްތައް ބުނެ އެވެ. އިރާއޯލާ ވަނީ 12 ސީޒަނުގައި ބިލްބާއޯ އަށް 400 އަށް ވުރެން ގިނަ މެޗު ކުޅެދީފަ އެވެ.
އެނބުރި ގައުމަށް ގޮސް ކޯޗިން މަސައްކަތް ކުރަން ބޭނުންވެފައި ހުރި އިރައޯލާ އަށް ބައެއް ކްލަބްތަކުގެ ހުށަހެޅުންތައް ލިބެމުން އަންނަ ކަމަށް ރިޕޯޓްތައް ބުނެ އެވެ. އޭގެ ތެރޭގައި އިނގިރޭސި ޕްރިމިއާ ލީގުގެ ދެ ކްލަބަކާއި އިޓަލީ އާއި ސްޕެއިނުގެ ދެތިން ކްލަބެއް ހިމެނެ އެވެ. ޕްރިމިއާ ލީގުގެ އެއް ކްލަބަކީ މެންޗެސްޓާ ޔުނައިޓެޑް ކަމަށް ވެސް ރިޕޯޓްތައް ބުނެ އެވެ.
ބޯންމައުތުން މި ވަގުުތު އޮތީ އިނގިރޭސި ޕްރިމިއާ ލީގުގައި އެންމެ ފަހުން އެ ޓީމުން ކުޅުނު 12 މެޗުން ވެސް ބަލިނުވެ ރަނގަޅު ފޯމެއްގަ އެވެ. ބޯންމައުތުން އެންމެ ފަހުން ޕްރިމިއާ ލީގުގައި ކުޅުނު މެޗުގައި ލީގުގެ އެއް ވަނައިގައި އޮތް އާސެނަލް ދަނޑުގައި ވަނީ 2-1 އިން މޮޅުވެފަ އެވެ. ކްލަބް ދޫކޮށްލަން ނިންމާފައިވާކަން އިރައޯލާ އިއުލާނުކުރީ އެ މެޗަށް ފަހު އެވެ.
