ލަންޑަން (އޭޕްރީލް 12) - އިނގިރޭސި ޕްރިމިއާ ލީގުގައި މިރޭ ޗެލްސީ 3-0 އިން ބަލިކޮށް މެންޗެސްޓާ ސިޓީން ލީގުގެ ރޭހުގައި ކުރިއަށްދިއުމަށް ބޮޑު ފިޔަވަޅެއް ކުރިއަށް އަޅައިފި އެވެ.
ސިޓީން ވަނީ މި މޮޅާ އެކު، ލީގުގެ އެއް ވަނައިގައި އޮތް އާސެނަލާ ދެމެދު ހަ ޕޮއިންޓަށް ފަރަގު ކުޑަކޮށްފި އެވެ. ލީގުގެ އެއް ވަަނައިގައި އާސެނަލް އޮތީ 32 މެޗުން 70 ޕޮއިންޓާ އެކު އެވެ. ދެ ވަނައިގައި އޮތް ސިޓީ އަށް 31 މެޗުން ވަނީ 64 ޕޮއިންޓް ލިބިފަ އެވެ. ލީގުގައި އަންނަ ހަފްތާގައި ސިޓީން ކުޅޭނީ އަމިއްލަ ދަނޑުގައި އާސެނަލާ ދެކޮޅަށެވެ. އެ މެޗުން މޮޅުވެ، މެޗު ހަމަކުރާއިރު ފުރިހަމަ ރެކޯޑަކާ އެކު ކުރިއަށް ގޮސް ލީގު ތާވަލުގެ އެއް ވަނަ އަށް އެރުމުގެ ފުރުސަތު އެބައޮތެވެ.
ސްޓެމްފޯޑް ބްރިޖުގައި މިރޭ ކުޅުނު މެޗުގެ ފުރަތަމަ ހާފުގައި ޗެލްސީގެ ޕެޑްރޯ ނެޓޯ ފޮނުވާލި ބޯޅައެއް ސިޓީގެ ކީޕަރު ޖިއަންލުއީޖީ ޑޮނަރުންމާ ވަނީ މަތަކޮށްފަ އެވެ، ފުރަތަމަ ހާފުގައި ސިޓީގެ ކެޕްޓަން، ބެނާޑޯ ސިލްވާ ފޮނުވާލި ބޯޅަ ޗެލްސީ ކީޕަރު، ރޮބަޓް ސަންޗޭޒް ވަނީ މަތަކޮށްފަ އެވެ.
ސިޓިން މި މެޗު ކާމިޔާބުކުރީ ދެ ވަނަ ހާފުގައި ތިން ގޯލު ޖަހައިގެންނެވެ. އެ ގޮތުން، ސިޓީން. ލީޑުނެގީ ދެ ވަނަ ހާފު ފެށިގެން ހަ ވަަނަ މިނިޓްގައި ލަނޑު ޖަހައިގެންނެވެ. މި ލަނޑު ޖެހީ މެޗުގެ 51 ވަނަ މިނިޓްގައި ޒުވާން ފުލްބެކް، ނިކޯ އޯރައިލީ އެވެ. މިއީ، ރަޔާން ޗާކީ ނެގި ހުރަހަކުން އޯރައިލީ ބޮލުންނެވެ.
ފުރަތަމަ ލަނޑު ޖެހިތާ ހަ މިނިޓް ފަހުން ސިޓީން ވަނީ ދެ ވަނަ ލަނޑު ޖަހައިފަ އެވެ. މިއީ، މެޗުގެ 57 ވަނަ މިނިޓްގައި ސިޓީގެ ޑިފެންޑަރު، މާކް ގޭހީ ޖެހި ގޯލެކެވެ. ޗާކީ ދިން ބޯޅައެއް ކޮންޓްރޯލް ކުރުމަށް ފަހު، ގޭހީ ފޮނުވާލި ބޯޅައެއް އަމާޒުވީ ގޯލުގެ ދުރު ކަނަށެވެ.
ޗެލްސީން ގޯލެއް ޖަހަން ކުރިއަށް ޖެހިގެން ކުޅެމުން ދަނިކޮށް، ސިޓީން ވަނީ ކައުންޓަ އެޓޭކެއްގައި ތިން ވަނަ ގޯލެއް ޖަހައިފަ އެވެ. މިއީ، މެޗުގެ 68 ވަނަ މިނިޓްގައި ޗެލްސީ އޭރިއާތެރެއަށް ބޯޅަ ހިފައިގެން ވަދެ، ޖެރެމީ ޑޯކޫ ޖެހި ގޯލެކެވެ.
މި ނަތީޖާއާ އެކު، ޗެލްސީ ވަނީ ލީގުގައި ޖެހިޖެހިގެން ތިން މެޗުން ބަލިވެފަ އެވެ. އެ ޓީމު މި ވަގުތު އޮތީ ލީގުގެ ހަ ވަނައިގަ އެވެ. އެއީ، 32 މެޗުން 48 ޕޮއިންޓާ އެކު އެެވެ.
ލީގުގައި މިރޭ ކުޅުނު އަނެއް މެޗުތަކަށް ބަލާއިރު، ކްރިސްޓަލް ޕެލަސް އިން 2-1 އިން ނިއުކާސަލް ޔުނައިޓެޑް ބަލިކުރިއިރު، ނޮޓިންހަމް ފޮރެސްޓާއި އެސްޓަން ވިލާ ވަނީ 1-1 އިން އެއްވަރުވެފަ އެވެ. އަދި، ސަންޑަލެންޑުން ވަނީ 1-0 އިން ޓޮޓެންހަމް ހޮޓްސްޕާސް ބަލިކޮށްފަ އެވެ.
