ލަންޑަން (އޭޕްރީލް 11) - އަމިއްލަ ދަނޑުގައި 2-1 އިން ބޯންމައުތު އަތުން ބަލިވެ، އިނގިރޭސި ޕްރިމިއާ ލީގުގެ އެއް ވަނައިގައި އޮތް އާސެނަލުން އުނދަގޫ ހާލަތަކާ ކުރިމަތިލާން ޖެހިއްޖެ އެވެ.
މި ނަތީޖާއާ އެކު، ލީގުގެ އެއް ވަނައިގައި ލީޑުފުޅާކުރަން އާސެނަލަށް އޮތް ފުރުސަތު ގެއްލި، ދެ ވަނައިގައި އޮތް މެންޗެސްޓާ ސިޓީ އަށް ލީގު ދިފާއުކުރުމުގެ އަމިއްލަ ބާރު ވަނީ ލިބިފަ އެވެ.
އާސެނަލް މި ވަގުތު އެއް ވަނައިގައި އޮތީ ދެ ވަނައިގައި އޮތް ސިޓީ އަށް ވުރެން ދެ މެޗު އިތުރަށް ކުޅެ، ނުވަ ޕޮއިންޓް އިތުރަށް ހޯދައިގެންނެވެ. އާސެނަލަށް 32 މެޗުން 70 ޕޮއިންޓް ލިބިފައިވާއިރު، ސިޓީ އަށް 30 މެޗުން ވަނީ 61 ޕޮއިންޓް ލިބިފަ އެވެ. އާސެނަލަށް ދެން އޮތް މެޗަކީ އަންނަ ހަފްތާގައި ސިޓީ ދަނޑުގައި ކުޅޭ މެޗެވެ. އޭގެ ކުރިން، ސިޓީން މި ހަފްތާގައި ކުޅޭ މެޗުގައި ޗެލްސީއާ ދެކޮޅަށް އެ ޓީމު ދަނޑުގައި ކުޅޭނެ އެވެ.
އެމިރޭޓްސް ސްޓޭޑިއަމްގައި ކުޅުނު މެޗުގައި ލީޑުނެގީ ވެސް ބޯންމައުތުންނެވެ. މިއީ، މެޗުގެ 17 ވަނަ މިނިޓްގައި އޭރިއާތެރެއިން ބޯންމައުތުގެ ޒުވާން ފޯވާޑް، ޖޫނިއާ ކްރޫޕީ ޖެހި ގޯލެކެވެ. ކްރޫޕީ އަކީ 1999-2000 ވަނަ އަހަރަށް ފަހު، ޕްރިމިއާ ލީގުގައި ކުޅޭ ފުރަތަމަ ސީޒަނުގައި 10 ލަނޑަށް ވުރެން އިތުރަށް ލަނޑު ޖެހި 20 އަހަރުން ދަށުގެ ފުރަތަމަ ކުޅުންތެރިޔާ އެވެ.
އާސެނަލުން އެއްވަރުކުރީ މެޗުގެ 35 ވަނަ މިނިޓްގައި ޕެނަލްޓީ އަކުން ވިކްޓަ ޔޯކެރޭޝް ޖެހި ގޯލުންނެވެ. މިއީ، ބޯންމައުތުގެ ކެޕްޓަން، ރަޔާން ކްރިސްޓީ އަތުގައި ބޯޅަ ޖެހުމުން ދިން ޕެނަލްޓީ އެކެވެ.
ދެ ވަނަ ހާފުގައި ކުޅެން އަރައި، އާސެނަލުން ލީޑެއް ލިބޭތޯ އެޓޭކްތަކެއް ކުރި ނަމަވެސް ލަނޑެއް ނުޖެހުނެވެ. ބޯންމައުތު މޮޅުވީ މެޗުގެ 74 ވަނަ މިނިޓްގައި އަލެކްސް ސްކޮޓް ޖެހި ގޯލުންނެވެ. އެވަނިލްސަން ދިން ބޯޅައަކަށް އަރައި، ސްކޮޓް ވަނީ ހަަމަޖެހިލައިފައި ގޯލަށް ބޯޅަ ފޮނުވާލައިފަ އެެވެ.
މިއީ، އެންމެ ފަހުން އާސެނަލުން ކުޅުނު ހަތަރު މެޗުގެ ތެރެއިން ބަލިވި ތިން ވަނަ މެޗެވެ. އަނެއްކޮޅުން، ބޯންމައުތުން މި ވަނީ އާސެނަލް ބަލިކޮށް، އެ ޓީމުން ބަލިނުވެ ދަމަހައްޓަމުން އަންނަ ރެކޯޑް 12 ވަނަ މެޗަކަށް އިތުރުކޮށްފަ އެވެ. ޖެހިޖެހިގެން ދެ ވަނަ ސީޒަނުގައި އާސެނަލް ދަނޑުގައި ހޯދި މޮޅާ އެކު، ބޯންމައުތު މި ވަގުތު އޮތީ 32 މެޗުން 45 ޕޮއިންޓާ އެކު، ނުވަ ވަަނައިގަ އެވެ.
