މިދިޔަ ނޮވެމްބަރު މަހުގެ ފަހުކޮޅު ޓީސީ ސްޕޯޓްސް ކްލަބްގެ ކޯޗުކަމާ މުހައްމަދު އާތިފް (އާތީ) ހަވާލުވިއިރު، އެ ޓީމު އޮތީ ދިވެހި ޕްރިމިއާ ލީގުގެ އަށް ވަނައިގަ އެވެ. އާތީގެ ފުރަތަމަ މެޗުން އޮޑި ސްޕޯޓްސް ކްލަބް އަތުން ޓީސީ 3-0 އިން ބަލިވި އެވެ. އެކަމަކު އެ މެޗުގައި ވެސް ޓީސީން ކުރިއެރުންތަކެއް ފެންނަން ފެށި އެވެ. ދެ ވަނަ ފަހަރަށް ޓީސީގެ ބެންޗަށް އައިސް އާތީގެ މަސައްކަަތް ފެށުނީ އެ ހިސާބުންނެވެ.
ޓީސީން ދިވެހި ޕްރިމިއާ ލީގުގެ ފުރަތަމަ ބުރު ނިންމާލިއިރު، ނުވަ މެޗުން ލިބުނީ ފަސް ޕޮއިންޓެވެ. އެކަމަކު، ދެ ވަނަ ބުރުގެ ނުވަ މެޗުން އެ ޓީމުން ވަނީ 16 ޕޮއިންޓް ހޯދައިފަ އެވެ. ލީގު ނިންމާލީ ހަތް ވަނައިގަ އެވެ. ރެލިގޭޝަން ޕްލޭއޮފް ކުޅުމުން ސަލާމަތްވާން ވެސް ޓީސީ އޮތީ ގާތުގަ އެވެ. ހަ ވަނަ ހޯދި ވިކްޓަރީ ސްޕޯޓްސް ކްލަބަށް ލިބުނީ ޓީސީއާ އެއްވަރަށް ލީގުގެ 18 މެޗުން 21 ޕޮއިންޓެވެ. ލަނޑުގެ ފަރަގަކީ އެންމެ ގޯލެކެވެ.
ޕްރެޒިޑެންޓްސް ކަޕްގެ ޕްލޭއޮފްގައި ވިކްޓަރީ އަތުން ޓީސީ ބަލިވީ 2-0 އިންނެވެ. އެހެންވެ، އެ މުބާރާތުގެ ގްރޫޕް ސްޓޭޖަށް ޓީސީ ކޮލިފައިނުވެ އެވެ. އޭގެ ފަހުން، ޓީސީން ކުރިމަތިލީ މިހާރު ކުރިއަށްދާ އެފްއޭ ކަޕާ އެވެ. އެ މުބާރާތުގެ ކުއާޓާ ފައިނަލުގައި ޓީސީން ވަނީ ވިކްޓަރީގެ މައްޗަށް 3-1 އިން ކުރިހޯދައި މުބާރާތުގެ ސެމީ ފައިނަލުން ފުރުސަތު ހޯދައިފަ އެވެ. ސެމީ ފައިނަލުގައި ޓީސީން ނުކުތީ ބުރު ސްޕޯޓްސް ކްލަބާ ދެކޮޅަށެވެ. އެ މެޗުން ޓީސީ ވަނީ 2-0 އިން މޮޅުވެފަ އެވެ.
މާދަމާރޭ އެފްއޭ ކަޕްގެ ފައިނަލުގައި ޓީސީން ނުކުންނާނީ މުބާރާތުގެ ޗެމްޕިއަންކަން 12 ފަހަރު ހޯދާފައިވާ ނިއު ރޭޑިއަަންޓް ސްޕޯޓްސް ކްލަބާ ދެކޮޅަށެވެ. ނިއު އިން މި މުބާރާތުގެ ތަށި 12 ވަނަ ފަހަރަށް ހޯދީ 2017 ވަނަ އަހަަރުގެ ފައިނަލުގައި ޓީސީގެ މައްޗަށް ޕެނަލްޓީ ޖަހައިގެން ކުރިހޯދައިގެންނެވެ. އެ މެޗުގެ ފުރިހަމަ ވަަގުތާއި އިތުރު ވަގުތުގެ ދެ ހާފު ނިމުނީ 2-2 އިން އެއްވަރުވެގެންނެވެ. ޕެނަލްޓީގައި ޓީސީ ބަލިވީ 4-2 އިންނެވެ.
ފައިނަލުގައި ނިއުއާ ދެކޮޅަށް ޓީސީން ކުޅޭ މެޗުގެ ކުރިން "ޕީއެސްއެމް ސްޕޯޓްސް" އަށް ދިން އިންޓަވިއުއެއްގައި އާތީ ބުނީ، ޓީސީން މިހާރު ކުޅެމުން އަންނަނީ ފިޓްނަސް އެންމެ ރަނގަޅު ލެވަލްގައި ހުރެގެން ނޫން ކަމަށާއި 15 ވަރަކަށް ދުވަހުގެ މަސައްކަތުން އާދެވުނު ހިސާބުން ޓީމުގެ ކުޅުންތެރިން އަމިއްލަ އަށް ނެރުނު ހިތްވަރުން ކުރި މަސައްކަތާ އެކުގައިި ކަމަށެވެ.
"އަބަދުވެސް ކޮންފިޑެންސް ދެމުން އައީ، ނުވާ ވަރުގެ ކަމެއް ނޫނޭ އެފްއޭ ކަަޕަކީ، އަހަރެންގެ ހަޔާތުގައި އަހަރެން. އެފްއޭ ކަޕްގެ ތިން ފައިނަލުގައި ކުުޅުނީމޭ، ދެ ތަށި އަހަރެއް އަތުގައި އިންނާނޭ، މިއީ ވަރަށް ފަސޭހަ އެއްޗެކޭ ގިނަ ފަހަރަށް، އެކަމަކު މަސައްކަތް ކޮށްލާ ބަޔަކަށޭ (މިކަން ވާނީ)." އާތީ ބުންޏެވެ.
ނިއު އިން ފައިނަލަށް ނުކުންނައިރު މުބާރާތުގައި ކުޅުނު ދެ މެޗުން ވެސް އެ ޓީމު ވަނީ ތަފާތު ބޮޑުކޮށް މޮޅުވެފަ އެވެ. ކުއާޓާ ފައިނަލުގައި އޮޑި ސްޕޯޓްސް ކްލަބް އަތުން 4-0 އިން އަދި ސެމީ ފައިނަލުގައި ބްލޫ ސްޕޯޓްސް ކްލަބް އަތުން 7-0 އިން ނިއު މޮޅުވި އެވެ. ފައިނަލުގެ ފޭވަރިޓަކީ ނިއު ކަމަށް ގިނަ ބަަޔަކު ގަބޫލުކުރިޔަސް، އާތީ ދެކޭ ގޮތުގައި ޓީސީ އޮތީ ވަކި ދެރަ ފޯމެއްގައެއް ނޫނެވެ.
"މީގެ އަހަރެމެން ކޮމްޕެއާ ކުރަން ޖެހޭނީ (އަޅާކިޔަންޖެހޭނީ) ލީގުގައި އަހަރެމެން ކުޅުނު މެޗުތަކާ ކަންނޭނގެ. އެހެން ޓީމުތައް ކޮޅަށް ޖަހާފައި ހުރި އެއްޗެހި އެއީ އަހަރެމެން ކޮންމެހެން ކައުންޓް ކުރަން ޖެހޭ އެއްޗެއް ނޫން ކަންނޭނގެ،" އާތީ ބުންޏެވެ.
"ޓީސީ ވެސް ތަފާތު ފޯމެއްގައެއް ނޫން މީނދީ، އެހެންވީމަ ނިއު ރޭޑިއަންޓް އެކަންޏެއް ނޫން ދޯ. ޓީސީ ވެސް ރަނގަޅު ފޯމެއްގައި ހަމަ،"
އެފްއޭ ކަޕް ފައިނަލުގައި ޓީސީ އާއި ނިއު ބައްދަލުކުރާ މެޗު މާދަމާރޭ 21:00 ފަށާއިރު، މުބާރާތުގެ ތިން ވަނަ ހޮވާ މެޗުގައި މާދަމާ ހަވީރު ބުރު އާއި ބްލޫ ބައްދަލުުކުރާނެ އެވެ.
