ވިކްޓަރީ ސްޕޯޓްސް ކްލަބް އަތުން ފަހު ވަގުތު 3-1 އިން މޮޅުވެ، ޓީސީ ސްޕޯޓްސް ކްލަބުން އެފްއޭ ކަޕް ފުޓްބޯޅަ މުބާރާތުގެ ސެމީ ފައިނަލަށް ދަތުރުކޮށްފި އެވެ.
ޓީސީން މި މެޗުން މޮޅުވީ ފަހަތުން އަރަ އެެވެ. ސެމީ ފައިނަލުގައި ޓީސީން ކުޅޭނީ މިރޭ ކުއާޓާ ފައިނަލް ފަހު މެޗުގައި މާޒިޔާ ސްޕޯޓްސް އެންޑް ރެކްރިއޭޝަނާއި ބުުރު ސްޕޯޓްސް ކްލަބް ކުޅެގެން މޮޅުވާ ޓީމަކާ އެވެ. އެ މެޗު އޮންނާނީ ބުދަ ދުވަހުގެރޭގަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ދެ ޓީމުގެ ފަރާތުން ހަމަހަަަމަ ކުޅުމެއް ފެނިގެންދިޔައިރު، މުހައްމަދު ސިޔާޒް (މޯހަން)ގެ ކޯޗުކަމުގައި ފުރަތަމަ ފަހަރަށް މެޗެއް ކުޅުނު ވިކްޓަރީން ފުރަތަމަ ހާފު ނިންމާލީ ލީޑުގައި އޮވެ އެވެ. މި ލަނޑު ފުަރަތަމަ ހާފުގެ އިތުރު ވަގުތުގެ ތެރޭގައި ޖަހައިދިނީ އަހުމަދު ރިޒްވާން (ރިޒޭ) އެވެ. ޓީސީ ޑިފެންޑަރުން ފަހަތަށް ޖައްސާލި ބޯޅައެއް ހޯދައި، ރިޒޭ ވަނީ އެއް ފަހަރުން ގޯލަށް ބޯޅަ ފޮނުވާލައިފަ އެވެ. އޭގެ ކުރިން ފުރަތަމަ ހާފުގައި ވިކްޓަރީގެ ސްލޮވާކިއާ ފޯވާޑް، މިލޯސް ލެޗްނީ ބޮލުން ޖެހި ބޯޅައެއް އަރިމަތިން ދިޔައީ ބޭރަށެވެ.
ދެ ވަނަ ހާފުގެ ކުޅުން ފެށިގެން ހަތަރު މިނިޓް ތެރޭ ޓީސީން އެއްވަރުކުރި އެވެ. މި ގޯލަކީ، ޓީސީގެ ނައިޖީރިއާގެ ފޯވާޑް އިބްރާހިމް ޖިމޯ އޭރިއާތެރެއަށް ނެގި ހުރަހެއް ދިފާއުކުރަން އުޅުމުގެ ތެރޭގައި، ވިކްޓަރީގެ އަލީ ޝާމިސް (ތޮއްޕޭ) އަތުން ބައިކޮޅަށް ވަން ގޯލެކެވެ.
އަލުން ލީޑުނަގަން ވިކްޓަރީގެ ރިޒޭ އާއި ލެޗްނީ އަށް ލިބުނު ފުރުސަތުތަކުގައި ގޯލެއް ޖެހޭގޮތެއްނުވި އެވެ.
ޓީސީން މޮޅުވީ ފަހު ވަގުތު ދެ ގޯލު ޖަހައިގެންނެވެ. އެ ގޮތުން، އެ ޓީމުން ލީޑުނެގީ 88 ވަނަ މިނިޓްގައި އައިހަމް ހަމްދޫން ޖެހި ގޯލުންނެވެ. ބަދަލަކަށް ކުޅެން އެރި އައިހަމް މި ލަނޑު ޖެހީ އޭރިއާތެެރެއަށް ހުރަސްވި ބޯޅައެއް އެއް ފަހަރުން ގޯލަށް ފޮނުވާލައިގެންނެވެ.
ވިކްޓަރީން އެއްވަރުކުރަން ކުރިއަށް ޖެހިގެން ކުޅެމުން ދަނިކޮށް މެޗުގެ އިތުރު ވަގުތުގެ ތެރޭގައި ޓީސީން ވަނީ ތިން ވަނަ ލަނޑެއް ޖަހައިފަ އެވެ. މި ލަނޑު ޖެހީ ބަދަލަކަށް ކުޅެން އެރި މުހައްމަދު ދާނިޝް އިބްރާހިމް އެވެ. އޭނާ އަށް ލިބުނު ފުރުސަތުގައި ވަނީ ހަމަޖެހިލައިފައި ގޯލުގެ މަތީ ކަނަށް ބޯޅަ ފޮނުވާލައިފަ އެވެ.
އެފްއޭ ކަޕް ފައިނަލުގައި 2017 ވަނަ އަހަރު ކުޅުނު ޓީސީ، އެންމެ ފަހުން 2022 ވަނަ އަހަރުގެ އެފްއޭ ކަޕުން ކެޓީ ކުއާޓާ ފައިނަލުގައި ޕެނަލްޓީ ޖަހައިގެން ކްލަބް ގްރީން ސްޓްރީޓްސް އަތުންނެވެ. ކޮވިޑް-19 އާ ހެދި 2020 ވަނަ އަހަރުގެ އެފްއޭ ކަޕް ކެންސަލްކުރިއިރު، ޓީސީ އޮތީ ސެމީ ފައިނަލަށް ދަތުރުކޮށްފަ އެވެ.
