ސެމީ ފައިނަލް ދެ ވަނަ މެޗުގައި ބުރު ސްޕޯޓްސް ކްލަބް 2-0 އިން ބަލިކޮށް ޓީސީ ސްޕޯޓްސް ކްލަބުން އެފްއޭ ކަޕްގެ ފައިނަލުގެ ފަހު ޖާގަ ހޯދައި، ނިއު ރޭޑިއަންޓް ސްޕޯޓްސް ކްލަބާ ވާދަކުރަން ތައްޔާރުވެއްޖެ އެވެ.
ހޮނިހިރު ދުވަހުގެރޭ މި ސީޒަނުގެ ފަހު މުބާރާތް އެފްއޭ ކަޕްގެ ފައިނަލްގައި ނިއު އާއި ޓީސީ ބައްދަލުކުރާއިރު، މި ދެ ޓީމު އެންމެ ފަހުން ފައިނަލަށް ދަތުރުކުރި އަހަރު ވެސް ބައްދަލުކުރީ ހަމަ މި ދެ ޓީމެވެ. އެއީ، 2017 ވަނަ އަހަރުގެ ފައިނަލުގަ އެވެ. އެ ފަަހަރުގެ ފައިނަލުގައި ޓީސީގެ މައްޗަށް ނިއު އިން ކުރިހޯދީ ޕެނަލްޓީ ޖަހައިގެންނެވެ. މި ފަހަރުގެ ފައިނަލުން ނިއު ޖާގަ ހޯދީ ތިން ވަނަ ޑިވިޝަނުގެ، ބްލޫ ސްޕޯޓްސް ކްލަބް އަތުން ސެމީގެ ފުރަތަމަ މެޗުގައި 7-0 އިން މޮޅުވެގެންނެވެ.
މުހައްމަދު އާތިފް (އާތީ)ގެ ކޯޗުކަމުގައި ތަފާތު ދައްކަމުން އަންނަ ޓީސީން ކުއާޓާ ފައިނަލުގައި ވިކްޓަރީ ސްޕޯޓްސް ކްލަބް ކަޓުވާލިއިރު، ސެމީ ފައިނަލުގައި ބުރު އަތުން މޮޅުވީ ވެސް ޖުމްލަކޮށް ރަނގަޅު ކުޅުމެއް ދައްކައިގެންނެވެ. ކުއާޓާ ފައިނަލުގައި އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން ކަޓުވާލި ބުރުން ސެމީގައި ޓީސީ ކައިރީގައި ގޯލެއް ޖެހޭތޯ ކުރި މަސައްކަތް ކާމިޔާބެއްނުވި އެވެ.
ގަލޮޅު ދަނޑުގައި މިރޭ ކުޅުނު މެޗުގައި ޓީސީން ދެ ލަނޑު ޖެހީ ވެސް ދެ ވަނަ ހާފުގަ އެވެ. ޓީސީން ލީޑުނެގީ 64 ވަނަ މިނިޓްގަ އެވެ. މިއީ، ބުރުގެ މެދުތެރެއިން ގެއްލުނު ބޯޅައެއް ހިފައިގެން ގޮސް ތަނަވަސްކުރި ފުރުސަތެއްގައި އޭރިއާތެރެއިން، ޓީސީގެ ގާނާ ފޯވާޑް، ޕްރިންސް ބޯޑު ތިރިތިރިން ގޯލަށް ބޯޅަ ވައްދާލައިގެން ޖެހި ގޯލެކެވެ.
ބުރުން ނަތީޖާ ހަމަހަަމަކުރެވޭތޯ ގިނަ އެޓޭކްތަކެއް ކުރި އެވެ. އެހެން ނަމަވެސް، ޓީސީީގެ ކީޕަރު، ޑެނިއަލް އެމަނުއަލް އެޔީބޯ ކައިރިން ގޯލެއް ޖެހޭގޮތެއްނުވި އެވެ.
ޓީސީން ފައިނަލުގެ ޖާގަ ޔަގީންކުރީ އިތުރު ވަގުތުގެ ތެރޭަގައި ދެ ވަނަ ގޯލު ޖަހައިގެންނެވެ. މި ލަނޑު ވެސް ޖެހީ މެޗުގެ މޮޅު ކުޅުންތެރިޔާ، ޕްރިންސް އެވެ. އިތުރު ވަގުތުގެ ފަހު މިނިޓްގައި ޕްރިންސް އަށް ލިބުނު ބޯޅަ ހިފައިގެން އޭރިއާތެރެއަށް ވަދެ، ގޯލުގެ ދުރު ކަނަށް ވަނީ އަމާޒުކޮށްލައިފަ އެވެ. އޭގެ ކުރިން ވެސް ޕްރިންސް އަށް ލަނޑެއް ޖަހަން ލިބުނެވެ. މިއީ، އަބްދުލް ވާހިދު އިބްރާހިމް (ވާޑު) ހުސްކޮށްލާފައި ދިން ބޯޅައަކުން ތަނަވަސްވި ފުރުސަތެކެވެ. އެކަމަކު، ޕްރިންސް ޖެހި ބޯޅަ ދިޔައީ ހުރަސްދަނޑިމަތިންނެވެ.
ބުރުގެ ކޯޗަކަށް ހުރީ ޓީސީ އަށް 2016 އާއި 2017 ވަނަ އަހަރުގެ ފައިނަލުގައި ކޯޗުކޮށްދިން މުހައްމަދު ނިޒާމް (ނިޒާމްބެ) އެވެ. ޓީސީން 2016 ގެ އެފްއޭ ކަޕް ފައިނަލުގައި ބަލިވީ ވެލެންސިއާ އަަތުން 3-1 އިންނެވެ.
އެފްއޭ ކަޕްގެ ތިން ވަނަ ހޮވާ މެޗުގައި ހޮނިހިރު ދުވަހު ހަވީރު ބުރު އާއި ބްލޫ ބައްދަލުކުރާނެ އެވެ. އަދި، އެ ރޭ ޓީސީ އާއި ނިއު އިން ކުޅޭ އެފްއޭ ކަޕް ފައިނަަލަށް ފަހު މި ފަހަރުގެ ފުޓްބޯޅަ ސީޒަން ނިމޭނެ އެވެ.
