ލިވަޕޫލް (އޭޕްރީލް 10) - ލިވަޕޫލަށް ކުޅެމުން އަންނަ ސްކޮޓްލެންޑް ގައުމީ ޓީމުގެ ކެޕްޓަން، އެންޑީ ރޮބަޓްސަން، ނުވަ އަހަރަށް ފަހު އެ ކްލަބް ދޫކޮށްލަން ނިންމާފައިވާ ކަމަށް ބުނެފި އެވެ.
ހަލް ސިޓީ ދޫކޮށް 2017 ވަނަ އަހަރު 10 މިލިއަން ޑޮލަރުގެ ޑީލެއްގައި ލިވަޕޫލަށް ސޮއިކުރި ރޮބަޓްސަން، މި ސީޒަން ނިމުމުން ލިވަޕޫލް ކެރިއަރު ނިންމާލާނީ ކޮންޓްރެކްޓް ހަމަކޮށްފަ އެވެ. ލިވަޕޫލުން އެންމެ ފަހުން ރޮބަޓްސަންއާ އެކު ހެދި ކޮންޓްރެކްޓް އޮތީ މި ސީޒަނުގެ ނިޔަލަށެވެ. ލިވަޕޫލުން ރޮބަޓްސަންގެ އެއްބަސްވުން އާ ކުރަން މަސައްކަތްތަކެއް ކުރި ނަމަވެސް ކުޅުމުގެ ކެރިއަރުގައި މުހިންމު ކަންތައްތަކެއް ހުރުމާ އެކު، އެންމެ ރަނގަޅު ގޮތަކީ އާ ޗެލެންޖަކާ ދިމާލަށް މިސްރާބު ޖެހުން ކަމަށް ގަބޫލުކުރެވޭތީ ރޮބަޓްސަން ނިންމީ ލިވަޕޫލް ދޫކޮށްލުމަށެވެ.
"މި ނުވަ އަހަރުގެ ހަނދާންތައް އަހަރެން އާ ކުރާނީ ވަރަށް ބޮޑު ހިނިތުންވުމަކާ އެކު،" ރޮބަޓްސަން ބުންޏެވެ.
އުމުރުން 32 އަހަރުގެ ރޮބަޓްސަން ގަންނަން ޖެނުއަރީ ޓްރާންސްފާ ތެރޭގައި ޓޮޓެންހަމް ހޮޓްސްޕާސް އިން ޝައުގުވެރިކަން ފާޅުކުރިއިރު، ޑީލެއް ހަދަން ލިވަޕޫލާއި ޓޮޓެންހަމްގެ ދެމެދުގައި އެއްބަސްވުމަކަށް ވެސް އަ އެވެ. އެކަމަކު، ފަހުން ލިވަޕޫލުން ނިންމީ ރޮބަޓްސަން ދޫކޮށްނުލާށެވެ. އެންމެ ބޮޑު ސަބަަބަކީ، ލޯން އެއްބަސްވުމެއްގައި ރޯމާގައި ހުރި ގްރީސްގެ ފުލްބެކް، ކޮސްޓަސް ސިމިކާސް ގެނެވެން ނެތުމުންނެވެ.
ލިވަޕޫލަށް 373 މެޗު ކުޅެދިން ރޮބަޓްސަން ވަނީ އެ ޓީމާ އެކު، ޖުމްލަ ނުވަ ޓްރޮފީ ހޯދައިފަ އެވެ. އޭގެ ތެރޭގައި އިނގިރޭސި ޕްރިމިއާ ލީގުގެ ޗެމްޕިއަންކަން ދެ ފަހަރު ހޯދުމުގެ އިތުރުން، ޔުއެފާ ޗެމްޕިއަންސް ލީގާއި ކްލަބް ވޯލްޑް ކަޕް އަދި ޔުއެފާ ސުޕަ ކަޕް ކާމިޔާބުކުރުން ހިމެނެ އެވެ.
ރޮބަޓްސަން، ލިވަޕޫލް ދުކޮށްލަން ނިންމި އެންމެ ބޮޑު އެއް ސަބަބަކީ، ކުޅުމުގެ ފުރުސަތު ގިނައިން ލިބޭ ޓީމަކަށް ބަދަލުވުމެވެ. ލިވަޕޫލުން މި ފަހަރު 50 މިލިއަން ޑޮލަރުގެ ޕެކޭޖެއްގައި، ހަންގޭރީގެ ފުލްބެކް، މިލޯސް ކާކޭޒް ގެނައި ފަހުން، ފުރަތަމަ އެގާރައިން ރޮބަޓްސަން އަށް ލިބޭ ފުރުސަތުތައް ވަނީ މަދުވެފަ އެވެ.
