ޕެރިސް (އޭޕްރީލް 8) - ޗެމްޕިއަންސް ލީގުގެ ކުއާޓާ ފައިނަލުގައި ލިވަޕޫލާ ދެކޮޅަށް ކުޅޭ މެޗަށް ނުކުންނައިރު، މުބާރާތުގެ އެންމެ ފަހުގެ ޗެމްޕިއަން، ޕީއެސްޖީ އަކީ މި މެޗުގެ ފޭވަރިޓުންގެ ގޮތުގައި ނުދެކޭ ކަމަށް އެ ޓީމުގެ ކޯޗު، ލުއިސް އެންރީކޭ ބުނެފި އެވެ.
މިދިޔަ އަހަރުގެ ޗެމްޕިއަންސް ލީގުގެ ގަދަ 16 ބުރުގައި، ލިވަޕޫލުން ޕީއެސްޖީ ދަނޑުގައި މޮޅުވި ނަމަވެސް، އަމިއްލަ ދަނޑުގައި ކުޅުނު ލެގުން ބަލިވެ، މުބާރާތުން ކެޓީ އެވެ. މި ފަހަރުގެ ޗެމްޕިއަންސް ލީގުގެ ކުއާޓާ ފައިނަލުގައި މި ދެ ޓީމު ބައްދަލުކުރަން ޖެހުނުއިރު، ފުރަތަމަ ލެގުގެ މެޗު މިރޭ ކުޅޭނީ ޕީއެސްޖީ ދަނޑުގަ އެވެ.
އެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އެންރީކޭ ބުނެފައިވަނީ، ޗެމްޕިއަންސް ލީގުގެ މި ހިސާބުން ވަކި ޓީމަކީ ފޭވަރިޓެއް ނޫން ކަމަށެވެ. އަދި، އެންމެ މުހިންމު ކަމަކީ ވީ އެންމެ ރަނގަޅަށް ތައްޔާރުވެގެން ނުކުމެ، އަމިއްލަ ދަނޑުގައި ކުޅުމުގެ އެޑްވާންޓޭޖް ނަގައި، އެންމެން ވެސް ޒިންމާ އަދާކޮށްގެން މެޗުން މޮޅުވުން ކަމަށް އެންރީކޭ ވަނީ ބުނެފަ އެވެ.
"މި ހުރިހާ ކަމެއް ކުރީމަ ކޮން ނަތީޖާއެއް ނުކުންނާނީ؟ އަހަރެމެން ޖެހޭނީ ބަަލަން، މިދިޔަ އަހަރު އަހަރެމެން އަމިއްލަ ދަނޑުގައި އެންމެ ރަނގަޅަށް ކުުޅުނު އެއް މެޗު ލިވަޕޫލް މެޗަކީ، އެކަމަކު ވެސް ވީ ބަލި، ލިވަޕޫލް އޮތީ ފޭވަރިޓުންގެ ގޮތުގައި، ދެން ވީ ގޮތަކީ އަނެއް ބުރަށް ދިޔައީ އަހަރެމެން،" އެންރީކޭ ބުންޏެވެ.
"މި މުބާރާތުގެ މި ހިސާބުގައި ފޭވަރިޓެއް އޮންނާނެ ކަމަށް ދެކުމަކީ ގޯހެއް. އަހަރެމެން ވިސްނަންވީ އަމިއްލަ ކޮންޓްރޯލްގައި ހުރި ކަންކަން ރަނގަޅަށް ގެންގޮސްގެން ނަތީޖާއެއް ހާސިލްކުރަން،"
އޭނާ ވިސްނަނީ މިއީ ވަރުގަަދަ ދެ ޓީމެއްގެ ކުރިމަތިލުމެއްގެ ގޮތުގައި ކަމަށާއި ފަރުވާ ކުޑަކޮށްލެވޭނެ އެއްވެސް ޖާގައެއް ނެތް ކަމަށެވެ.
ހޮނިހިރު ދުވަހު، އެފްއޭ ކަޕްގެ ކުއާޓާ ފައިނަލުން މެންޗެސްޓާ ސިޓީ އަތުން 4-0 އިން ބަލިވެ، އެ މުބާރާތުން ކެޓިއިރު، ލިވަޕޫލުން މިރޭ ޕީއެސްޖީ ދަނޑުގައި ކުޅޭ މެޗަށް ނުކުންނައިރު އޮތީ ޕްރެޝަރުގަ އެވެ. އަދި، އެ ޓީމުގެ ކޯޗު އާނާ ސްލޮޓަށް އޮތް ވަޒީފާގެ ޕްރެޝަރު ވެސް އަންނަނީ ބޮޑުވަމުންނެވެ.
ސްލޮޓް ބުނީ، ޕީއެސްޖީއާ ދެކޮޅަށް ކުޅޭ މެޗަކީ ސީޒަނުގައި ކުރިއަށްދިއުމަށްޓަކައި، ލިވަޕޫލުން ހުރިހާ ކަމެއް ރަނގަޅަށް ގެންދަން ފޯކަސް ކުރަން ޖެހޭ މެޗެއް ކަމަށެވެ. އަދި، ޕީއެސްޖީ ކަހަލަ ޓީމެއް ކައިރީގައި ރަނގަޅު ނަތީޖާ ނެރެން، 90 މިނިޓް އެއްކޮށް ސަމާލުވެގެން ޓީމެއްގެ ގޮތުގައި މަސައްކަތް ކުރަން ޖެހޭނެ ކަމަށް ސްލޮޓް ވަނީ ބުނެފަ އެވެ.
