މެންޗެސްޓާ (އޭޕްރީލް 4) - އިނގިރޭސި އެފްއޭ ކަޕް ކުއާޓާ ފައިނަލުގައި މެންޗެސްޓާ ސިޓީ އަތުން 4-0 އިން ބަލިވެ، މިދިޔަ 80 އަހަރު ތެރޭ މި މުބާާރާތުގައި ލިވަޕޫލުން އެންމެ ދަށް ނަތީޖާއާ ކުރިމަތިލާން ޖެހިއްޖެ އެވެ.
މިއީ، 1946 ވަނަ އަހަރުގެ އެފްއޭ ކަޕްގައި ބޯލްޓަން އަތުން 5-0 އިން ބަލިވި ފަހުން، ލިވަޕޫލުން މި މުބާރާތުގައި ކުރިމަތިލާން ޖެހުނު އެންމެ ދަށް ނަތީޖާ އެވެ. ލިވަޕޫލުން އެފްއޭ ކަޕްގައި އެންމެ ފަހުން ސިޓީއާ ދެކޮޅަށް ކުޅުނު ތިން މެޗުން ވެސް މޮޅުވިއިރު، މި މެޗުން މޮޅުވެ، ސިޓީން މި ވަނީ މި ސީޒަނުގައި ލިވަޕޫލް އަތުން ތިން ފަހަރު މޮޅުވެފަ އެވެ. މީގެ ކުރިން، އިނގިރޭސި ޕްރިމިއާ ލީގުގައި މި ސީޒަނު ކުޅުނު ދެ މެޗުން ވެސް ސިޓީ އަތުން ލިވަޕޫލް ވީ ބައްޔެވެ.
އިއްތިހާދު ސްޓޭޑިއަމްގައި ކުޅުނު މެޗުގައި ލިވަޕޫލަށް ލީޑުނަގަން ރަނުގެ ފުރުސަތުތަކެއް ލިބުނެވެ. އެ ގޮތުން، މުހައްމަދު ސަލާހު އާއި ހޫގޯ އެކިޓީކޭ ފޮނުވާލި ބޯޅަތައް ދިޔައީ ގޯލާ ސީދާނުވެ އެވެ. ސިޓީން މެޗުގެ ކޮންޓްރޯލް ނެގީ ފުރަތަމަ ހާފުގެ ފަހުކޮޅުގަ އެވެ. އެ ގޮތުން، މެޗުގެ 39 ވަނަ މިނިޓްގައި ސިޓީން ލީޑުނެގީ އާލިން ބްރައުޓް ހާލަންޑް ޖެހި ޕެނަލްޓީންނެވެ. މިއީ، ލިވަޕޫލްގެ ކެޕްޓަން، ވާޖިލް ވެން ޑައިކް، އޭރިއާތެރެއިން ސިޓީގެ ނިކޯ އޯރައިލީ އަށް ކުރި ފައުލަކަށް ދިން ޕެނަލްޓީ އެކެވެ. މިއީ، މި ސީޒަނުގައި ވެން ޑައިކް ކުރި ފައުލަކަށް އިދިކޮޅު ޓީމަށް ލިބުނު ހަތަރު ވަނަ ޕެނަލްޓީއެވެ.
ފުރަތަމަ ހާފުގެ އިތުރު ވަގުތުގައި ސިޓީގެ ލީޑުފުޅާކުރީ، އެންޓުއާން ސެމެންޔޯ ނެގި ހުރަހަކުން ހާލަންޑް ބޮލުން ޖެހި ގޯލަކުންނެވެ. ދެ ވަނަ ހާފު ފަށައިގެން ފަސް މިނިޓް ތެރޭ ސިޓީން ތިން ވަނަ ލަނޑު ޖެހި އެވެ. މިއީ، ރަޔާން ޗާކީ ދިން ބޯޅައަކުން ސެމެންޔޯ ޖެހި ގޯލެކެވެ. އަދި، މެޗުގެ 57 ވަނަ މިނިޓްގައި ސިޓީގެ ފަހު ލަނޑު ޖެހީ، އޯރައިލީ ދިން ބޯޅައަކުން ހާލަންޑް އެވެ. މި ލަނޑާ އެކު، ހާލަންޑް ވަނީ ހެޓްރިކް ފުރިހަމަަކޮށްފަ އެވެ.
މި ސީޒަނަށް ފަހު، ލިވަޕޫލް ދޫކޮށްލާނެކަން އިއުލާނުކުރި ފަހުން، ސަލާހު އެ ޓީމަށް ކުޅެދިން ފުރަތަަމަ މެޗުގައި ލަނޑު ޖަހަން ލިބުނު ގިނަ ފުރުސަތުތަކެއް ނަގާލި އެވެ. އެ ގޮތުން، ދެ ވަނަ ހާފުގައި އެކިޓީކޭ އަށް ސިޓީގެ މަޓެއުސް ނޫނޭޒް ކުރި ފައުލަކަށް ދިން ޕެނަލްޓީ އަކުން ސަލާހު ފޮނުވާލި ބޯޅަ ސިޓީގެ ކީޕަރު، ޖޭމްސް ޓްރަފޯޑް ވަނީ މަތަކޮށްފަ އެވެ.
ސިޓީން މި ވަނީ، މި މެޗުން މޮޅުވެ، ޖެހިޖެހިގެން އަށް ވަނަ ސީޒަނުގެ އެފްއޭ ކަޕްގެ ސެމީ ފައިނަލަށް ދަތުރުކޮށް ރެކޯޑް ދަންމާލައިފަ އެވެ.
ސިޓީގެ އިތުރުން، އެފްއޭ ކަޕްގެ ސެމީ ފައިނަލުން ޗެލްސީ ވެސް ވަނީ ޖާގަ ހޯދައިފަ އެވެ. އެ ގޮތުން، ޗެލްސީން ވަނީ ތިން ވަަނަ ޑިވިޝަނުގައި ވާދަކުރަމުން އަންނަ ޕޯޓް ވޭލް އަތުން 7-0 އިން މޮޅުވެ، ސެމީ ފައިނަލުން ޖާގަ ހޯދައިފަ އެވެ.
މި މެޗުގައި ޕޯޓް ވޭލް ކޮޅަށް ޗެލްސީގެ ލަނޑުތައް ޖެހީ، ޖޮރެލް ހަޓޯ، ޖޮއާއޯ ޕެޑްރޯ، ޓޮސިން އަޑަރަބިއޯޔޯ، އަންޑްރޭ ސަންޓޯސް، އެސްޓެވާއޯ އަދި އަލެހަންދްރޯ ގާނާޗޯ އެވެ. ގާނާޗޯ ލަނޑު ޖެހީ ޕެނަލްޓީ އަކުންނެވެ. އަނެއް ގޯލަކީ، ޕޯޓް ވޭލްގެ ލޯރެންސް ގަބްރިއެލް އަތުން ބައިކޮޅަށް ވަން ގޯލެކެވެ.
ޕޯޓް ވޭލް އަކީ ކުއާޓާ ފައިނަލުގައި މި ފަހަރު އޮތް އެންމެ ދަށް ޑިވިޝަނުގެ ޓީމެވެ. ޕޯޓް ވޭލް އިން ކުއާޓާގައި ކުޅޭނީ ޗެލްސީއާ އެވެ. މިއީ، 1929 ވަނަ އަހަރުގެ ފަހުން، ޗެލްސީ އާއި ޕޯޓް ވޭލްގެ ފުރަތަމަ ކުރިމަތިލުމެވެ. ޗެލްސީ އަކީ، މިދިޔަ ވިއްސަކަށް އަހަރު ތެރޭ އެފްއޭ ކަޕްގައި ކުއާޓާ ފައިނަލެއްގައި އެންމެ ފަރަގު ބޮޑުކޮށް މޮޅުވި ޓީމެވެ. އެންމެ ފަހުން، އެފްއޭ ކަޕް ކުއާޓާ ފައިނަލުގައި، 7-0 އިން މޮޅުވީ، 2006 ވަނަ އަހަރު ބާމިންހަމް ސިޓީ އަތުން ލިވަޕޫލް އެވެ.
