ޕެނަލްޓީ ޖަހައިގެން 6-5 އިން ކްލަބް އީގަލްސް ބަލިކޮށް، އެ ޓީމު ކަޓުވާލައި، ތިން ވަނަ ޑިވިޝަނުގައި ވާދަކުރަމުން އަންނަ ބްލޫ ސްޕޯޓްސް ކްލަބުން އެފްއޭ ކަޕް ފުޓްބޯޅަ މުބާރާތުގެ ސެމީ ފައިނަލުގެ ފުރަތަމަ ޖާގަ ހޯދައިފި އެވެ.
މެޗުގެ ފުރިހަމަ ވަގުތު ހަަމަވިއިރު, ދެ ޓީމު އޮތީ 2-2 އިން އެއްވަރުވެފަ އެވެ. ޕެނަލްޓީގައި ފޮނުވާލި ފަސް ޕެނަލްޓީގެ ތެރެއިން ހަތަރު ޕެނަލްޓީ ވައްދާލައި، ބްލޫ އިން ސެމީގެ ޖާގަ ޔަގީންކޮށް، އެފްއޭ ކަޕްގެ ތާރީހުގައި ވެސް ހާއްސަ ކާމިޔާބެއް ހޯދީ އެވެ.
ތިން ވަނަ ޑިވިޝަނުގައި ވާދަކުރަން ފަރިތަކުރަމުން އަންނަ ބްލޫ ސްޕޯޓްސް ކްލަބަކީ، މި ފަހަރުގެ އެފްއޭ ކަޕްގައި ކުޅޭ އަށް ޓިމުގެ ތެރެއިން ފުރަތަމަ ޑިވިޝަނަށް ނިސްބަތްނުވާ ހަމައެކަނި ޓީމެވެ. އަނެއްކޮޅުން، މިއީ، ރާއްޖޭގެ ފުޓްބޯޅައިގެ ތާރީހުގައި ވެސް ބަލާއިރު، ތިން ވަނަ ޑިވިޝަނުގައި އޮތް ޓީމެއް އެފްއޭ ކަޕްގެ ސެމީގައި ކުޅޭނެ ފުރަތަމަ ފަހަރެވެ.
ސެމީ ފައިނަލުގައި ބްލޫ އިން ކުޅޭނީ ކުއާޓާ ފައިނަލުގައި، މިރޭ އޮޑި ސްޕޯޓްސް ކްލަބާއި ނިއު ރޭޑިއަންޓް ސްޕޯޓްސް ކްލަބް ކުޅެގެން މޮޅުވާ ޓީމަކާ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި ބްލޫ އިން ލީޑުނެގީ 11 ވަނަ މިނިޓްގަ އެވެ. މިއީ، އޭރިއާތެރެއިން އަހުމަދު ފާލިހު ލޮމްތަރު ޖެހި ލަނޑެކެވެ. އޭރިއާތެރެއިން ފާލިހު އަށް ލިބުނު ފުރުސަތުގައި އޭނާ ވަނީ އީގަލްސްގެ ކީޕަރު، މުހައްމަދު އަޝްވާން އަތުގައި ޖައްސާފައި ގޯލަށް ބޯޅަ ވައްދާލައިފަ އެވެ.
ބްލޫ އިން ލީޑުގައި އޮވެ، ފުރަތަމަ ހާފު ނިންމާލިއިރު، އީގަލްސް އިން ވަނީ ދެ ވަނަ ހާފުގައި ކުޅެން އަރައި ފަހަތުން އަރައި ދެ ގޯލު ޖަހައި ނަތީޖާ އަނބުރާލައިފަ އެވެ. އީގަލްސް އިން އެއްވަރުކުރި ލަނޑަކީ، މެޗުގެ 60 ވަނަ މިނިޓްގައި ޕެނަލްޓީ އަކުން އިސްމާއިލް އީސާ (މެސީ) ކާމިޔާބުކުރި ގޯލެކެވެ. މި ޕެނަލްޓީ އަކީ ބްލޫ އޭރިއާތެރެއިން އީގަލްސްގެ އިބްރާހިމް މަހުދީ (ފޭދޫ އިއްބެ) އަށް ކުރި ފައުލަކަށެވެ.
މެޗުގައި ފުރަތަމަ ފަހަރަށް އީގަލްސް އިން ލީޑުނެގީ 76 ވަނަ މިނިޓްގައި ޒައިން ޒަފަރު ކާމިޔާބުކުރި ގޯލުންނެވެ. ޒައިން، އޭރިއާބޭރުން ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެކަމަކު، ބްލޫ އިން ހިތްވަރު އެލުވައިނުލައި ކުޅެ، 86 ވަނަ މިނިޓްގައި ލަނޑު ޖަހައި އެއްވަރުކުރި އެވެ. މިއީ، އޭރިއާތެރެއިން ލިބުނު ފުރުސަތެއްގައި، ބްލޫގެ އަބްދުﷲ އިޔާދު މުހައްމަދު ޖެހި ގޯލެކެވެ. އިޔާދު ފޮނުވާލި ޝޮޓު ގޯލުގެ ކަނަށް އަމާޒުވިއިރު، ކީޕަރު އަޝްވާނަށް އެ ބޯޅަ ހުއްޓުވޭ ގޮތެއްނުވި އެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު އެއްވަރުވެފައި އޮތުމުން ނަތީޖާ ނެރެން ޖެހުނީ ޕެނަލްޓީ ޖަހާށެވެ.
ޕެނަލްޓީގައި އީގަލްސް އިން ފުރަތަމަ ޕެނަލްްޓީ އީސަ ފޮނުވާލިއިރު, އަމާޒުވީ ގޯލުގެ ދަނޑިއަށެވެ. ބްލޫގެ ފުރަތަމަ ޕެނަލްޓީ އެމަނުއަލް ކޯފީ ފޮނުވާލިއިރު، ކީޕަރު އަޝްވާން އެ ބޯޅަ ވަނީ ހުއްޓުވައިފަ އެެވެ. އީގަލްސްގެ ދެ ވަނަ ޕެނަލްޓީ ޒައިން ވަނީ ގޯލަށް ވައްދާލައިފަ އެވެ. ބްލޫ އިން ދެ ވަނަ ޕެނަލްޓީ ފޮނުވާލި ޝިޔާން މުހައްމަދު ފޮނުވާލިއިރު، ކީޕަރު އަޝްވާން އަތުގައި ޖެހިފައި ވަނީ ގޯލަަށެވެ. އީގަލްސްގެ ތިން ވަނަ ޕެނަލްޓީ އަބްދުﷲ ޒުހާން ފުރަަތަމަ ފޮނުވާލިއިރު، ބްލޫގެ ކީޕަރު، އަޝްފާގު އައްޔޫބް އެ ބޯޅަ މަތަކުރީ ކުރިއަށް ނުުކުމެފައިވާތީވެ، ދެ ވަނަ ފަހަރަށް ޖަހަން ދިނުމުން ފޮނުވާލި ބޯޅަ ވެސް ކީޕަރު އަޝްފާގު މަތަކުރި އެވެ. ބްލޫ އިން ތިން ވަނަ ޕެނަލްޓީ އިޔާދު ވަނީ ގޯލަށް ވައްދާލައި އެ ޓީމަށް ލީޑުނަގައިދިނެވެ. އީގަލްސްގެ ހަތަރު ވަނަ ޕެނަލްޓީ އަބްދުލްމަލިކް ވަނީ ގޯލަށް ފޮނުވާލައިފަަ އެވެ. ބްލޫގެ ހަަތަރު ވަނަ ޕެނަލްޓީ މައިކަލް އަކުއާޔޭ ވަނީ ކާމިޔާބުކޮށްފަ އެވެ. އީގަލްސްގެ ފަސް ވަނަ ޕެނަލްޓީ އަބްދުﷲ ސަމީހު މޫސާ (ސަމިއްޓެ) ވަނީ ގޯލަށް ފޮނުވާލައިފަ އެވެ. ބްލޫގެ ފަސް ވަނަ ޕެނަލްޓީ މުހައްމަދު ޖިނާހު ގޯލަށް ފޮނުވާލައި، ބްލޫ އިން ސެމީ ފައިނަލަށް ދަތުރުކުރި އެވެ.
