ސްޓެލްކޯގެ މެނޭޖިން ޑިރެކްޓަރުކަމުގެ މަގާމުން މިދިޔަ އަހަރުގެ ސެޕްޓެމްބަރު މަހު ވަކިކުރި ހުސައިން ފަހުމީ އެމްޑަބްލިއުއެސްސީގެ މެނޭޖިން ޑިރެކްޓަރުގެ މަގާމަށް މިއަދު އައްޔަނުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ބުނީ އެމްޑަބްލިއުއެސްސީގެ ބޯޑު މެންބަރުކަމުގެ މަގާމަށާއި އެމްޑީގެ މަގާމަށް ފަހުމީ އައްޔަންކޮށްފައިވާ ކަމަށެވެ.
ކަރަންޓުގެ ހިދުމަތް ދޭ ކުންފުނީގައި 27 އަހަރު ހިދުމަތް ކުރި ފަހުމީ އެ ކުންފުނީގެ އެންމެ އިސް މަގާމުން މިދިޔަ އަހަރުގެ ސެޕްޓެމްބަރުގައި ވަކިކުރިތާ 24 ގަޑިއިރު ނުވަނީސް ރައީސް އޮފީހުގެ ޕްރިންސިޕަލް ސެކްރެޓަރީ އޮން ޕޮލިސީ އެންޑް މެނިފެސްޓޯގެ މަގާމަށް އޭނާ އައްޔަންކުރި އެވެ.
އެ މަގާމަކީ މިނިސްޓަރުން ފެންވަރުގެ މަގާމެކެވެ. މުހައްމަދު މުއިއްޒުގެ ވެރިކަމުގައި ރައީސް އޮފީހަށް ޕްރިންސިޕަލް ސެކްރެޓަރީން އައްޔަން ކުރަނީ މިނިސްޓަރުން ފެންވަރުގަ އެވެ. އެމްޑަބްލިއުއެސްސީގެ އެމްޑީއަކަށް އައްޔަންކުރުމާ ހަމައަށް އޭނާ ހުންނެވީ ރައީސް އޮފީހުގެ އެ މަގާމުގަ އެވެ.
ސްޓެލްކޯގެ އެމްޑީގެ މަގާމުން ފަހުމީ ވަކިކުރީ އޭރު މާލެ އާއި ހުޅުމާލެއިން ކަރަންޓު ކެނޑޭ މައްސަލަ އާއި ކަރަންޓު ބިލު އަގުބޮޑުވާ މައްސަލައިގައި ނުރުހުން ސަރުކާރަށް އަމާޒުވެފައި އޮތް ދަނޑިވަޅެއްގަ އެވެ.
އެމްޑަބްލިއުއެސްސީގެ އެމްޑީގެ މަގާމު ހުސްވީ އެ މަގާމުގައި ހުންނެވި އަބްދުލް މަތީން މިދިޔަ އާދީއްތަ ދުވަހު މަގާމުން އިސްތިއުފާ ދެއްވުމާ ގުޅިގެންނެވެ. ނަމަވެސް، އޭނާ އިސްތިއުފާ ދެއްވި ސަބަބެއް ހާމައެއް ނުކުރެ އެވެ.
އެމްޑަބްލިއުއެސްސީގެ އެމްޑީގެ މަގާމަށް މަތީން އައްޔަނުކުރީ ނޮވެމްބަރު، 28، 2023 ގަ އެވެ. މަތީން އަކީ މީގެ ކުރިން އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރުކަން ކުރައްވާފައިވާ ބޭފުޅެކެވެ.
