ހުޅުމާލޭގެ ދެވަނަ ފިޔަވަހިން އިއްޔެ ކަރަންޓު ކެނޑުނީ އެ ސަރަހައްދުގައި ގެއެއް އިމާރާތް ކުރުމުގެ މަސައްކަތުގެ ތެރެއިން މައި ކޭބަލަކަށް ގެއްލުންވެގެން ކަމަށް ސްޓެލްކޯއިން ބުނެފި އެވެ.
ދާދި ދެންމެއަކު ސްޓެލްކޯއިން ސޯޝަލްމީޑިއާގައި ފޮޓޯއާއެކު ކުރި ޕޯސްޓެއްގައި ވަނީ އިމާރާތް ކުރުމުގެ މަސައްކަތް ކުރިއަށްދާއިރު، ބިމު އަޑީގައި ވަޅުލާފައި ހުންނަ ކޭބަލްތަކަށް ހާއްސަ ސަމާލުކަމެއް ދިނުމަށް އިލްތިމާސްކޮށްފަ އެވެ.
"ހުޅުމާލޭ ދެވަނަ ފިޔަވަހީގެ ބައެއް ޓަވަރުތަކުން އާދީއްތަ ދުވަހު ކަރަންޓުގެ ހިދުމަތް މެދުކެނޑެން މެދުވެރިވީ، ދެވަނަ ފިޔަވަހީގައި ބަޔަކު އިމާރާތް ކުރުމުގެ މަސައްކަތް ކުރަމުން ދަނިކޮށް ކަރަންޓު ދިނުމަށް އަޅާފައިވާ މައި ކޭބަލަކަށް ލިބުނު ގެއްލުމަކާ ގުޅިގެން،" ސްޓެލްކޯގެ ޕޯސްޓުގައި ބުންޏެވެ.
ހުޅުމާލެ ދެވަނަ ފިޔަވަހިން އިއްޔެ ކަރަންޓު ދިޔައީ ހަވީރު 3:00 ހާއިރު އެވެ. އެ މައްސަލައަށް ހައްލު ހޯދައި ކަރަންޓު ދިނުމަށް މަސައްކަތް ކުރަމުން ދަނިކޮށް، އިތުރު ޓެކްނިކަލް މައްސަލަތަކެއް ވެސް ޖެހުނެވެ. މުޅި ފެވަނަ ފިޔަވައްސަށް ކަރަންޓު ދެވުނީ ރޭ 11:30 ހާއިރު އެވެ.
ހުޅުމާލޭގެ ދެވަނަ ފިޔަވައްސަށް ކަރަންޓު ދިނުމުގައި ދިމާވާ ދަތިތަކަށް ހައްލު ހޯދުމަށްޓަކައި ސްޓެލްކޯ އާއި އެޗްޑީސީގެ ވެރިން މިއަދު ވަނީ ބައްދަލުކޮށް މަޝްވަރާކޮށްފަ އެވެ.
