މޯލްޑިވްސް ވޯޓާ އެންޑް ސޫވޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރު، އަބްދުލް މަތީން އެ މަގާމުން މިއަދު އިސްތިއުފާދެއްވައިފި އެވެ.
އެ މަގާމުން އިސްތިއުފާ ދެއްވިކަން މަތީން ހާމަކުރެއްވީ ސޯޝަލްމީޑިއާގައި ދާދި ދެންމެއަކު ކުރެއްވި ޕޯސްޓެއްގައި އެވެ. ނަމަވެސް، އެ މަގާމުން އިސްތިއުފާދެއްވި ސަބަބެއް އޭނާ ހާމައެއް ނުކުރައްވަ އެވެ.
އެމްޑަބްލިއުއެސްސީގެ މެނޭޖިން ޑިރެކްޓަރުގެ މަގާމަށް މަތީން އައްޔަނުކުރީ ނޮވެމްބަރު، 28، 2023 ގަ އެވެ. މެނޭޖިން ޑިރެކްޓަރުކަމުގެ އިތުރުން އޭނާއަކީ އެ ކުންފުނީގެ ބޯޑުގެ އެގްޒެކެޓިވް ޑިރެކްޓަރު ވެސްމެ އެވެ. މަތީން އަކީ މީގެ ކުރިން އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރުކަން ކުރައްވާފައިވާ ބޭފުޅެކެވެ. އެވެ.
އެމްޑަބްލިއުއެސްސީގެ އެމްޑީގެ މަގާމުން މަތީން އިސްތިއުފާދެއްވާފައިވާއިރު، ސަރުކާރުގެ މަސް ކުންފުނި، މިފްކޯގެ ސީއީއޯގެ މަގާމުގައި ހުންނެވި ފަރުހަތު ޝަހީރު ވެސް މިއަދު ވަނީ އެ މަގާމުން އިސްތިއުފާދެއްވައިފަ އެވެ.
އޭގެ އިތުރުން ފާއިތުވި ހަފުތާގެ ތެރޭގައި، ފެނަކައިގެ މެނޭޖިން ޑިރެކްޓަރުގެ މަގާމުގައި ހުންނެވި، މުހައްމަދު ނަޖާހު ވަނީ އެ މަގާމުން ވަކިކޮށްފަ އެވެ. އަދި، އެމްޕީއެލްގެ ސީއީއޯގެ މަގާމުގައި ހުންނެވި މުހައްމަދު ރިޝްވާން ވެސް ވަނީ މިދިޔަ ހަފުތާގައި އިސްތިއުފާދެއްވައިފަ އެވެ.
ސަރުކާރު ކުންފުނިތަކުގެ މަތީފަޑިއަށް ބޮޑެތި ބަދަލުތަކެއް ގެންނަން ފަށާފައި މިވަނީ، އޭޕްރިލް 4، ގައި އޮތް ލޯކަލް ކައުންސިލްތަކުގެ އިންތިހާބާއި ޑަބްލިއުޑީސީގެ އިންތިހާބުގެ އިތުރުން، ދެ އިންތިހާބު އެއްކޮށް ބާއްވަން ފެނޭތޯ ބެލުމަށް ނެގި ރިފަރެންޑަމްގައި ސަރުކާރަށް ލިބުނު ނާކާމިޔާބީއަށް ފަހު އެވެ.
