ރައްޔިތުންގެ މަޖިލީހުގެ މެންބަރުކަމުގެ ޝަރުތު ހިތަދޫ އުތުރު ދާއިރާގެ މެންބަރު މުހައްމަދު ސިނާނުގެ ކިބައިން ގެއްލިއްޖެ ކަމަށް ބުނެ ހުށަހެޅި މައްސަލަ އިއްޔެ ސުޕްރީމް ކޯޓުން ނިންމީ 423 ދުވަސް ފަހުންނެވެ.
ރާއްޖޭގެ އެންމެ މަތީ ކޯޓުން އިއްޔެ ކަނޑައެޅީ ސާބިތު ދަރަންޏެއް އޮވެ، އެ ދަރަންޏާ އެއްގޮތަށް ފައިސާ ދައްކާފައިނުވާތީ ރައްޔިތުންގެ މަޖިލީހުގެ މެންބަރުކަމުން ސިނާނު ވަކިވެފައިވާ ކަމަށެވެ.
ސިނާނުގެ މައްސަލަ ސުޕްރީމް ކޯޓަށް ވެއްދީ ފެބްރުއަރީ 13، 2025، ގަ އެވެ. އެ މައްސަލަ ކޯޓުގައި ރަޖިސްޓްރީ ކުރީ އޭޕްރީލް 15، ގަ އެވެ.
ރައްޔިތުންނާ ގުޅޭ ހައްސާސް އަދި އެފަދަ މުހިންމު މައްސަލައެއް ކޯޓުގައި "ޕާކުކޮށްފައި" އޮތް ސަބަބެއް ނޭނގެ އެވެ. ނަމަވެސް އަދަދު އާ ވާހަކަ ދެއްކި ބައެއް މަސްދަރުތަކުން ބުނީ އެ މައްސަލަ ކޯޓުގައި ތާށިކޮށްފައި ބޭއްވީ ސަރުކާރުން ނުފޫޒު ފޯރުވައިގެން ކަމަށެވެ.
ގާނޫނުއަސާސީގެ 74 ވަނަ މާއްދާގައި ބުނެފައިވާ ގޮތުން ރައްޔިތުންގެ މަޖިލީހުގެ ގޮނޑިއެއް ހުސްވެއްޖެ ކަމާމެދު ސުވާލު އުފެދިއްޖެ ނަމަ އެފަދަ މައްސަލައެއް ބަލަންޖެހޭނީ ސުޕްރީމް ކޯޓުންނެވެ.
ސިނާނުގެ މައްސަލަ ކޯޓުން ބަލަން 423 ދުވަސް ނެގިއިރު، ސަރުކާރުން ވަނީ ނުފޫޒު ބޭނުންކޮށްގެން އެ ކޯޓުގެ ދެ ފަނޑިޔާރަކު މަގާމުން ވަކިކޮށްފަ އެވެ. ސަރުކާރުން ބިރުދައްކާތީ އިތުރު އެއް ފަނޑިޔާރަކު އިސްތިއުފާ ދެއްވި އެވެ.
މިވަގުތު ސުޕްރީމް ކޯޓު ހިންގަނީ ސަރުކާރުން އަލުން އައްޔަން ކުރި ތިން ފަނޑިޔާރަކު ހިމަނައިގެންނެވެ.
ހުކުމާ އެއްގޮތަށް ސިނާނު ނުދެއްކީ މޯލްޑިވްސް އިސްލާމިކް ބޭންކުން ނަގާފައި އޮތް ފަސް މިލިއަން ރުފިޔާގެ ލޯނެކެވެ. އެ ލޯނު އޭނާ އަދާ ކުރީ އެ މައްސަލަ ސުޕްރީމް ކޯޓަށް ވެއްދުމުނެވެ.
ސިނާނުގެ ގޮނޑި ގެއްލުމުން އެ މަގާމަށް އަލުން މީހަކު ހޮވަން 60 ދުވަހުގެ ތެރޭގައި އިލެކްޝަންސް ކޮމިޝަނުން އިންތިހާބެއް ބާއްވަންޖެހެ އެވެ. ނަމަވެސް އެ ކޮމިޝަނުން މިހާތަނަށް އިންތިހާބު އިއުލާނުކޮށްފައެއް ނުވެ އެވެ.
