ރައްޔިތުންގެ މަޖިލީހުގައި އޮތް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ސުޕަމެޖޯރިޓީއިން ގާނޫނުއަސާސީއަށް ގެނެސްފައިވާ ބަދަލުތަކާ މެދު ދެ ޕާޓީގެ މެދުގައި މަޝްވަރާކޮށް ހައްލު ހޯދުމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން އަބްދުލްޣަފޫރު މޫސާ ދައުވަތު ދެއްވައިފި އެވެ.
ވިހިވަނަ މަޖިލީހުން ގާނޫނުއަސާސީއަށް ބޮޑެތި ބަދަލުތަކެއް އަންނަނީ ގެންނަމުންނެވެ. އޭގެ ތެރެއިން ބައެއް ބަދަލުތަކަށް އަމަލުކުރަން ފަށާފައިވާއިރު އަނެއް ބައި ބަދަލުތަކަށް ރައްޔިތުންގެ މެދުގައި ނެގި ފެންނަ ނުފެންނަ ވޯޓުގައި ތާއިދު ލިބިފައި ނުވެ އެވެ. އެހެންވެ އެ ބައްދަލުތަކަށް އަމަލެއް ނުކުރެވެ އެވެ.
"ގާނޫނުއަސާސީއަށް މި ގެނައި އިސްލާހުތަކުގައި ދެ ޕާޓީ އިށީނދެގެން، ވާހަކަ ދައްކައިގެން ހައްލެއް އެބަ ޖެހޭ ހޯދަން. މެންބަރުން ތަޅުލާފައި ނުބޭތިއްބޭނެ،" ހަނިމާދޫ ދާއިރާގެ މެންބަރުކަން ކުރައްވާ ޣަފޫރު ވިދާޅުވި އެވެ.
ޣަފޫރު މިހެން ވިދާޅުވިއިރު ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވާމުގެ ބާރު ސިޔާސީ ޕާޓިތަކަށް ދިނުމަށް ގާނޫނުއަސާސީ ބަދަލުކުރީ މި މަޖިލީހުންނެވެ. އެ މައްސަލަ ސުޕްރީމް ކޯޓުގައި އޮތްއިރު މާދަމާ އެ މައްސަލައިގެ އަޑުއެހުމެއް އޮންނާނެ އެވެ.
"ދައުލަތުގެ ވެރިޔަކަށް ހުންނަ މީހާ އެ ޒިންމާތައް އުފުލަން ޖެހޭނެ، ދައުލަތުގެ ފައިސާއިން ކޮރަޕްޝަނާއި ކަންކަން ހިނގަމުންދާއިރު. އެއީ ދައްކަން ޖެހޭ ވާހަކައެއް، ހަމަހަމަކަމާއެކު އެންމެންގެ މެދުގައި އިންސާފު އޮންނަން ޖެހޭނެ،" ޣަފޫރު ވިދާޅުވި އެވެ.
އެޕްރީލް ހަތަރުވަނަ ދުވަހު ލޯކަލް ކައުންސިލް އިންތިހާބާ އެކު ނެގި ފެންނަ ނުފެންނަ ވޯޓުގައި ސަރުކާރުގެ ހުށަހެޅުމަށް ގާތްގަނޑަކަށް 70 ޕަސެންޓު ރައްޔިތުން ވަނީ ނޫނެކޭ ބުނެފަ އެވެ. އެއީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބާއްވައި މިހާރު ހިނގަމުންދާ މަޖިލީހުގެ ދައުރުން ހަ މަސްދުވަސް އުނިކުރުމަށް ގެންނަން އުޅުނު ބަދަލެކެވެ.
ސިޔާސީ ޕާޓީތަކުގެ މެދުގައި މަޝްވަރާތައް ފެށުމަށް ޣަފޫރު ގޮވާލެއްވިއިރު އެމްޑީޕީން ވަނީ ކައުންސިލް އިންތިހާބުގައި ރާއްޖޭގެ އާބާދީ ބޮޑެތި ސިޓީތައް ކާމިޔާބުކޮށްފަ އެވެ. އަދި ފެންނަ ނުފެންނަ ވޯޓުގައި ވެސް އެ ޕާޓީން ކެމްޕޭން ކުރީ ސަރުކާރަށް ނޫނެކޭ ބުނުމަށެވެ.
ރައްޔިތުންގެ މަޖިލީހުގައި ޕީއެންސީގެ ސުޕަމެޖޯރިޓީ އޮންނާތީ އެކަށީގެންވާ ވަރަށް އެ ތަނުގައި ގައުމުގައި ހުރި މައްސަލަތަކާ މެދު ބަހުސެއް ނުހިނގަ އެވެ. ޕީއެންސީ މެންބަރުންގެ ވާހަކައިގައި މައިގަނޑުކޮށް އޮންނަނީ ރައީސް މުހައްމަދު މުއިއްޒުއަށް ތައުރީފުކޮށް ވާހަކަ ދެއްކުމެވެ.
އެމްޑީޕީގައި ތިއްބަވަނީ 12 މެންބަރުން ކަމަށްވުމާއެކު މަޖިލިސް ތަޅުމުގައި އިދިކޮޅު އަޑުތައް އިވެނީ ވަރަށް މަޑުންނެވެ. ޣަފޫރުގެ މި ގޮވާލެއްވުމަށް ސަރުކާރުން އިޖާބަ ދޭނެކަން އަދި ސާފެއް ނޫނެވެ.
