ބޭސް ސިޓީއަށް ބޭސް ނުލިބުމާއި މީހުންގެ ފުރާނަ ސަލާމަތް ކުރުމަށްޓަކައި ކޮންމެހެން ބޭނުންވާ ބައެއް ސާމާނު ވެސް ރާއްޖެއިން ނުލިބޭތީ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފި އެވެ.
ގަލޮޅު އުތުރު ދާއިރާގެ މަޖިލިސް މެންބަރު، މުހައްމަދު އިބްރާހިމް ހުށަހެޅުއްވި ކުއްލި މައްސަލައިގައި ބުނެފައި ވަނީ ހޮސްޕިޓަލްތަކަށާއި ކްލިނިކްތަކުން ޑޮކްޓަރަށް ދެއްކުމާއި ޓެސްޓުތައް ހެދުމަށް މީގެ ކުރިން ލިބެމުން އައި އާސަންދައިގެ ހިދުމަތް ހުއްޓާލަމުންދާ ކަމަށާއި ބޭސް ސިޓީއަށް ބޭސް ނުލިބޭ ކަމަށެވެ. އަދި، މީހުންގެ ފުރާނަ ސަލާމަތް ކުރުމަށްޓަކައި ކޮންމެހެން ބޭނުންވާ ސިއްހީ ސާމާނު ވެސް ރާއްޖެއިން ނުލިބޭކަމުގެ ޝަކުވާ ރައްޔިތުންގެ ފަރާތުން ލިބެމުންދާ ކަމަށެވެ.
އެ ކަންކަމުގެ ނަތީޖާއެއްގެ ގޮތުން އެތައް ބައެއްގެ ފުރާނަ ނުރައްކަލަށް ހުށަހެޅެމުންދާކަން ފާޅުކަން ބޮޑު ގޮތެއްގައި ފާހަގަވާން އޮތްކަން އެ މައްސަލައިގައި ފާހަގަކޮށްފައިވެ އެވެ.
އެގޮތުން ފާއިތުވި މާޗު މަސް ތެރޭގައި، ހާއްސަ އެހީއަށް ބޭނުންވާ ހަ އަހަރުގެ ކުއްޖަކަށް ދޭންޖެހޭ ފަރުވާ އެކަށީގެންވާ އަވަސްމިނުގައި ނުދެވި ލަސްވުމުގެ ސަބަބުުން އެ ކުއްޖާ ނިޔާވިއިރު، އެ ކުއްޖާއަށް ކާންދޭން ބޭނުންވާ ހޮޅިއެއް ނުގެނެވި، އެ ކުއްޖާގެ ބެލެނިވެރިން އަށް މަސްދުވަސް ވަންދެން ސަރުކާރުގެ އިދާރާތަކުގައި އާދޭސް ކުރަންޖެހުނުކަން އެ މައްސަލައިގައި ފާހަގަކޮށްފައިވެ އެވެ.
އެފަދަ ކަންކަން ހިނގަމުންދަނީ އެންސްޕާ އާއި އެސްޓީއޯގެ އުސޫލުތަކަށް ސަރުކާރުން ބަދަލުގެނެސް، ވަކި ބައެއްގެ އަތުން ގަތުމަށް ރާވައިގެން އުޅޭތީކަމަށް ވެސް އެ މައްސަލައިގައި ފާހަގަކޮށްފައިވެ އެވެ.
އެ މައްސަލަ މަޖިލީހަށް ހުށަހެޅީ އެ މައްސަލަތައް ސަރުކާރުގެ ސަމާލުކަމަށް ގެނެސް، އެ ކަންކަމަށް ހައްލެއް ހޯދުމަށްޓަކައި މަޖިލީހުގެ ތަޅުމުގައި ބަހުސް ކުރުމަށެވެ.
ނަމަވެސް، މަޖިލީހުގެ ރިޔާސަތުގައި މިއަދު އިންނެވި، މަޖިލީހުގެ ނައިބުރައީސް، އަހުމަދު ނާޒިމް ވިދާޅުވީ ކުއްލި މައްސަލައެއްގައި ހުންނާނެޖެހޭ ޝަރުތުތައް އެ މައްސަލައިގައި ހަމަނުވާ ކަމަށެވެ. އެހެންކަމުން އެ މައްސަލަ، ކުއްލި މައްސަލައެއްގެ ގޮތުގައި ބަލައި ނުގަނެވޭނެ ކަމަށް އޭނާ ވިދާޅުވި އެވެ.
