ވިޔަފާރީގެ ވާދަވެރިކަން ދެމެހެއްޓުމުގެ ގާނޫނާއި ސަރުކާރުން ހަދާފައިވާ ޓެކްސީ ގަވާއިދާ ހިލާފަށް އެމްޓީސީސީން މާލޭ ޓެކްސީ ލައިނުގެ ހިދުމަތް ދެމުން އަންނަ ކަމަށް ބުނެ އެ މައްސަލަ ބަލަން ޓެކްސީ ޑްރައިވާސް އެސޯސިއޭޝަނުން މިއަދު ގޮވާލައިފި އެވެ.
ޓެކްސީ ޑްރައިވަރުންގެ އެސޯސިއޭޝަނުން މި ނޫސް ބަޔާން ނެރުނުއިރު، އެ ޖަމިއްޔާއިން ވަނީ މި ހިދުމަތް ފަށަން ސަރުކާރުން ވިސްނި ހިސާބުން ވެސް މިކަމާ ދެކޮޅަށް އަޑުއުފުލާފަ އެވެ. އެހެން ކުރި މަޝްވަރާތަކުގައި ޓެކްސީ ހިދުމަތަށް ނުވަންނަން ސަރުކާރުން އެއްބަސްވެސްވި އެވެ.
އެކަމަކު، އޭގެ މާ ގިނަ ދުވަސްތަކެއް ނުވަނީސް ސަރުކާރުން ވަނީ ޓެކްސީ ޑްރައިވަރުންނަށް ދިން ޔަގީންކަން ބޮލާލައިޖަހައި، އެމްޓީސީސީ ހަވާލުކޮށްގެން މާލޭ ސަރަހައްދުގައި ޓެކްސީ ހިދުމަތް ދިނުމުގެ މަސައްކަތް ފެށި އެވެ.
މިކަމާ ގުޅިގެން ޓެކްސީ ޑްރައިވަރުންގެ ޖަމިއްޔާއިން ނެރުނު ބަޔާނުގައި ބުނި ގޮތުގައި ޓެކްސީ ޑްރައިވަރުންނަކީ އާންމު ދަތުރުފަތުރުގެ ނިޒާމުގައި މުހިންމު ދައުރެއް އަދާކުރާ، އެތައް ސަތޭކަ ދިވެހި އާއިލާއެއްގެ ދިރިއުޅުމާއި އާމްދަނީއާ ގުޅިފައިވާ ކަމެކެވެ.
"ނަމަވެސް، ސަރުކާރުން ކުންފުންޏަކުން މި ދާއިރާއަށް ވަނުމަކީ، އިންސާފުވެރިކަމާއި ހަމަހަމަކަން ގެއްލި، ރެގިއުލޭޓު ކުރުމުގެ ނިޒާމަށް ބުރޫއަރާނެ ކަމެއް ކަަމަށް މީގެ ކުރިން ވެސް އަޅުގަނޑުމެން ވާނީ ތަކުރާރުކޮށް ދަންނަވާފަ،" އެ އެސޯސިއޭނުގެ ބަޔާނުގައި ވެ އެވެ.
އެމްޓީސީސިން މި ހިދުމަތް ދެނީ ސަރުކާރުގެ ޓެކްސީ ގަވާއިދާ ހިލާފަށް ކަމަށް ބުނެ، ޓެކްސީ ޑްރައިވަރުން ވަނީ އެ ގަވާއިދުގައި ހުރި ގިނަ ކަންތައްތަކެއް ފާހަގަކޮށްފަ އެވެ. އަދި، މިކަންކަމާ ދެކޮޅަށް ފިޔަވަޅު ނޭޅުމަކީ ގަވާއިދުތަން ތަންފީޒުކުރުމުގައި ގެންގުޅޭ ބޭއިންސާފު މިންގަނޑެއް ކަމަށް ވަސް އެ ޖަމިއްޔާއިން ބުންޏެވެ. އެގޮތުން އެ ޖަމިއްޔާއިން ފާހަގަކުރި ކަންކަމުގެ ތެރޭގައި:
7 ވަނަ މާއްދާ - ޓެކްސީ ސެންޓަރުގެ ޝަރުތުތައް
ޓެކްސީ ޑްރައިވަރުންގެ ޖަމިއްޔާއިން ބުނަނީ ޓެކްސީ ގަވާއިދުގައި، ޓެކްސީ ސެންޓަރުތަކުގައި ހުންނަން ޖެހޭ ކަމަށް ބުނާ ޝަރުތުތައް އެމްޓީސީސީގެ ހިދުމަތުގައި ހަމަ ނުވާ ކަމަށެވެ.
11 ވަނަ މާއްދާ - ޓެކްސީ ސެންޓަރުން ހިދުމަތް ދިނުން
ޓެކްސީ ޑްރައިވަރުންގެ ޖަމިއްޔާއިން ވަނީ ޓެކްސި ސެންޓަރުން ހިދުމަތް ދިނުމުގެ މާއްދާގެ ދަށުން ބަޔާންކުރާ ޓެކްސީ ލައިސަންސް ޓެކްސީ ސެންޓަރުން ހިދުމަތްދޭ އުޅަނދުތަކުަގއި ހުންނަ ޝަރުތުތައް އެމްޓީސީސީގެ ހިދުމަތުގައި ފުރިހަމަނުވާ ކަމަށެވެ.
މި ހިދުމަތް ވިޔާފާރީގެ ވާދަވެރިކަމުގެ ގާނޫނާ ހިލާފު ކަމަށް ޓެކްސީ ޑްރައިވަރުންގެ ޖަމިއްޔާއިން ދެކޭ އެންމެ ބޮޑު ސަބަބަކީ މި ހިދުމަތުގެ އެޕްލިކޭޝަން ތައްޔާރުކުރެވެންދެން އެ ހިދުމަތް ހިލޭ ދޭ ގޮތަށް އޮތުމެވެ،
"ވަކިން ހާއްސަކޮށް ސަރުކާރުގެ އަމިއްލަ އެޕްލިކޭޝަން ތައްޔާރުވަންދެން މި ހިދުމަތް ހިލޭ ދިނުމަށް ނިންމާފައިވާ ނިންމުމަކީ، އިގުތިސޯދީ ގޮތުން ދަތި، މި ދަނޑިވަޅުގައި އަމިއްލަ ޓެކްސީ ޑްރައިވަރުންގެ އާމްދަނީއަށް ފޫނުބެދޭ ވަރުގެ ބޮޑު ގެއްލުމެއް،" ޓެކްސީ އެސޯސިއޭޝަނުގެ ބަޔާނުގައި ބުންޏެވެ.
އެމްޓީސީސީގެ ޓެކްސީ ހިދުމަތުގެ މައްސަލައިގައި ޓެކްސީ ޑްރައިވަރުންގެ ޖަމިއްޔާއިން ވަނީ ފުލުހުންނާއި ޓްރާންސްޕޯޓް މިނިސްޓްރީއަށް ސަރުކާރުގެ ޓެކްސީތަކާ މެދު ވެސް ހަމަހަމަ އުސޫލަކުން ގަވާއިދު ތަންފީޒުކުރަން ގޮވާލާފަ އެވެ.
އެމްޓީސީސިން ފެށި ހިދުމަތާ މެދު ޑްރައިވަރުންގެ ހުރި ކަންބޮޑުވުންތަކުގެ އިތުރުން މި ކާރުތައް ގަތުމާއި ހިދުމަތް ދޭން ތައްޔާރުކުރި އެޕްލިކޭޝަނާ ގުޅިގެން ސީރިއަސް ތުހުމަތުތަކެއް ކުރެވެ އެވެ.
ހަމައެހެންމެ މި ހިދުމަތުގައި ބޭނުންކުރާ "މާލެ ޓެކްސީ" އަކީ ވެސް އެހެން ބަޔަކަށް ރަޖިސްޓްރީކޮށްފައިވާ ނަމެއް ކަމަށް ބުނެ، އެ މީހުން ވަނީ ނަން ބޭނުންކުރުން ހުއްޓާލަން ވެސް އެމްޓީސީސީގައި އެދިފަ އެވެ. ނަމަވެސް އެ ކުންފުނިން އަންނަނީ މިކަމަށް އިޖާބަ ދިނުމެއް ނެތި މި ނަން ބޭނުންކޮށްގެން ހިދުމަތް ދެމުންނެވެ.
