އަމީނީ މަގުގައި ހުންނަ ގިޔާސުއްދީން އިންޓަނޭޝަނަލް ސްކޫލުން ފެށިގެން އެންމެ ހުޅަނގަށްވީ ބައި އާރްޑީސީން އަލުން ހަދަން އުޅޭކަން އެ ކުންފުނިން އިއުލާންކޮށްފައިވާއިރު، ޗައިނާގެ ހިލޭ އެހީގައި މާލެ އާއި ވިލިމާލޭގެ މަގުތައް ޒަމާނީ ފެންވަރަށް ތަރައްގީކުރުމަށް މި އަހަރު ފަށާނެ ކަމަށް ބުނި މަޝްރޫއުގެ ހަބަރެއް އަދިވެސް ނެތެވެ.
ޕީއެސްއެމްގެ ރާއްޖެމިއަދު ޕްރޮގްރާމުގައި އާރްޑީސީގެ އެމްޑީ އިބްރާހިމް ނަޒީމް ވިދާޅުވީ އަމީނީ މަގަށް ދިމާވެފައި އޮތް މައްސަލަ ހައްލުކުރަން މިފަހަރު މަސައްކަތް ކުރާނީ ޓެކްނިކަލީ ބަލަންޖެހޭ ހުރިހާ މިންގަނޑުތަކެއް ބަލައިގެން ރަނގަޅު ފެންވަރުގައި މަސައްކަތް ކުރިއަށް ގެންދެވޭނެ ގޮތަށް ރާވައިގެން ކަމަށެވެ.
"އެހެންނަމަވެސް ދެން އިރާދަކުރެއްވިއްޔާ އެތަން މި ހެދިގެންދާއިރުގައި އަޅުގަނޑުމެން ޓެކްނިކަލީ ބަލަންޖެހޭނެ ހުރިހާ މިންގަނޑުތަކެއް ވަރަށް ސަމާލުކަމާ އެއްކޮށް ބަލައި ދެން ތާރު އެޅިގެންދާއިރުގައި ހަމަ ރަނގަޅު ފެންވަރުގައި އެ މަސައްކަތް ކުރެވިގެންދާނެ ގޮތަކަށް އަޅުގަނޑުމެން ކަންކަން ރާވައިގެން ގެންދާނީ" އޭނާ ވިދާޅުވި އެވެ.
އަމީނީ މަގުގެ މަސައްކަތް މިދިޔަ ސަރުކާރާއި މި ސަރުކާރުން ވެސް ކުރި އެވެ. ނަމަވެސް ފަހުން އަނެއްކާވެސް ގިޔާސުއްދީން ސްކޫލް ހިމެނޭ ސަރަހައްދުން ފެށިގެން ހުޅަނގަށްވީ ބައި ވަނީ ހަލާކުވެފަ އެވެ.
ނަޒީމް ވިދާޅުވީ ކުރިން އަމީނީ މަގުގެ މަސައްކަތް ދިޔަގޮތާ ގުޅޭގޮތުން އެއްޗެއް ދަންނަވަން ނޭނގޭ ކަމަށާއި އަމީނީ މަގުގެ މަސައްކަތް މިފަހަރު އަލުން ފަށާނީ ރާއްޖެއިން ބޭރުން ރޯޑް އިންޖިނިއަރެއްވެސް ގެނެސްގެން ކަމަށެވެ.
ފެެންބޮޑުވެ ޓްރެފިކް ބާރުބޮޑުވުމުން އަމީނީ މަގު ހުޅުވާލައިފި
އަމީނީ މަގުގެ މަސައްކަތް ނިންމާ ރަސްމީކޮށް ހުޅުވަން ތާވަލުކޮށްފައި އޮތީ މިރޭ. ނަމަވެސް ރާއްޖެއަށް މިހާރު ކުރަމުންދާ ވިއްސާރާގައި މާލެއަށް ބޯކޮށް ވާރޭ ވެހި ފެންބޮޑުވުމުގެ ސަބަބުން މާލޭ ޓްރެފިކް ފްލޯ ފަސޭހަ ކޮށްދިނުމަށްޓަކައި މިއަދު ހަވީރު އެ މަގު ވަނީ އާންމުންނަށް ހުޅުވާލާފައި
"އަޅުގަނޑުމެން އެބަ ގަސްދުކުރަން އެކަމަށް ވަކިން ހާއްސަކޮށް ހަމަ ރާއްޖެއިން ބޭރުން މިކަމަށް ރޯޑް އިންޖިނިއަރެއް ވެސް މިވަގުތަށް ހަމަ، އެ މަސައްކަތް ކުރިއަށް ގެންދިޔުމުގައި އަޅުގަނޑުމެންނާއެކު މަސައްކަތް ކުރާނެ މީހަކު ގެންނަން. އެ މަސައްކަތް އަޅުގަނޑުމެން އެބަ ކުރަމުންދަން" އޭނާ ވިދާޅުވި އެވެ.
ކޮންސްޓްރަކްޝަން މިނިސްޓްރީއާ މަޝްވަރާކޮށްގެން ކުރިއަށް އޮތް ދެ ހަފްތާއެއްހާ ދުވަސް ތެރޭގައި އަމީނީ މަގުގައި އޮތް ތާރުގަނޑު ނަގައި އައު ތާރުގަނޑެއް އަޅާނެ ކަމަށް ނަޒީމް ވިދާޅުވި އެވެ.
"އަޅުގަނޑުމެން މި ބަލަނީ ކުރިއަށް އޮތް ހަފްތާއެއް ނޫނިއްޔާ ދެ ހަފްތާއެއްހާ ދުވަސް ތެރޭގައި އިރާދަކުރެއްވިއްޔާ މިހާރު އެތާ އެއޮތް ތާރުގަނޑު ނަގާފައި އަލުން އެތާނގައި ތާރު އެޅުމުގެ މަސައްކަތް ކުރިއަށް ގެންދަން،" އޭނާ ވިދާޅުވި އެވެ.
އާރްޑީސީން އަމީނީ މަގުގެ މަސައްކަތް ފަށަން ތައްޔާރުވަމުންދާއިރު، އެމްޓީސީސީން އަންނަނީ ބޭރު މަގު، މާރުކޭޓު ސަރަހައްދުން ފެށިގެން ބާސެލޯ ނަސަންދުރާއާ ހަމައަށް ތާރު އަޅައި ޒަމާނީ ފެންވަރަށް ދަނީ ތަރައްގީކުރަމުންނެވެ. މިގޮތުން މާރުކޭޓް ސަރަހައްދުން ފެށިގެން އެއް ނަންބަރު ފާލަމާ ހިސާބަށް މިހާރު ވަނީ ތާރު އަޅައި ނިންމާފަ އެވެ.
ޗައިނާގެ ހިލާ އެހީގައި މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްގީ ކުރުމަށް ހަމަޖެހިފައިވާއިރު، ބޭރު މަގުގައި ތާރު އެޅުމުގެ މަސައްކަތާއި އަމީނީ މަގުގެ މަސައްކަތަށް ބޮޑު ހަރަދެއް ދައުލަތުގެ ބަޖެޓުން ދާނެ އެވެ.
ޗައިނާގެ ހިލޭ އެހީގައި މާލޭގެ މަގުތައް ތަރައްގީކުރަން ފެށޭނެ ތާރީހެއް މިހާރު ސަރުކާރަކަށް ނޭނގޭ!
"އަމަލީ މަސައްކަތް ފަށަން ބޭނުންވާ ތާރީހު ކަނޑައެޅިގެން ދާނީ ޗައިނާ ސަރުކާރުން ބޭނުންވާ ހުއްދަތައް ލިބުމުން،"
މާލެ އާއި ވިލިމާލޭގެ މަގުތައް ތަރައްގީ ކުރުމުގެ މަޝްރޫއު 2024 ގައި ފަށާނެ ކަމަށް މުއިއްޒު ވިދާޅުވެފައިވާއިރު، ހައުސިން މިނިސްޓަރު އަބްދުﷲ މުއްތަލިބު ވިދާޅުވީ މިދިޔަ އަހަރު މަޝްރޫއުގެ މަސައްކަތް ފަށާނެ ކަމަށެވެ. ނަމަވެސް މިހާތަނަށް މަޝްރޫއު ފެށިފައެއް ނުވެ އެވެ.
މި މަޝްރޫއުގެ ފީސިބިލިޓީ ހެދުމަށް ބަޔަކާ ހަވާލުކުރިތާ ވެސް ދޮޅު އަހަރަށް ވުރެ ގިނަ ދުވަސް ވަނީ ވެފަ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ހުށަހެޅި ސުވާލުތަކަށް އިންފްރާސްޓަރަކްޗާ މިނިސްޓްރީން ދިން ޖަވާބުގައި ބުނީ މަގު ހެދުމުގެ މަޝްރޫއު ފެށުން ލަސްވަމުންދަނީ، ޗައިނާ ސަރުކާރުން ފުރިހަމަކުރަންޖެހޭ އިދާރީ ހުއްދަތައް ހޯދުމުގެ މަރުހަލާތަކަށް ވަގުތު ބޭނުންވާތީ ކަމަށެވެ.
މަޝްރޫއާ ގުޅޭ ތަފްސީލްތައް
- ޗައިނާ ސަރުކާރުން ރާއްޖެއަށް ދިނުމަށް ކަނޑައަޅާފައިވާ 130 މިލިއަން ޑޮލަރުގެ ހިލޭ އެހީ.
- މާލެ އަދި ވިލިމާލޭގެ ތެރެއިން ކަނޑައެޅޭ މަގުތައް ތަރައްގީކުރުން.
- އަމަލީ މަސައްކަތް ފެށޭނެ ވަކި ތާރީހެއް އަދި ކަނޑައެޅިފައެއް ނެތް. އެ ތާރީހު ކަނޑައެޅޭނީ ޗައިނާ ސަރުކާރުން ބޭނުންވާ ހުއްދަތައް ލިބުމުން
މާލޭގެ ހުރިހާ މަގުތަކެއް ޗައިނާގެ އެހީގައި ތަރައްގީ ކުރާނެ މުއިއްޒު ކުރިން ވިދާޅުވެފައި ވާއިރު، އެންމެ ފަހުން އިންފްރާސްޓަރަކްޗާ މިނިސްޓްރީން ދިން ޖަވާބުގައި ބުނެފައި ވަނީ ތަރައްގީކުރާނީ ކަނޑައެޅޭ މަގުތަކެއް ކަމަށެވެ.
