މާފަންނު ސަބުދެލި މަގުގައި ހުންނަ ބީޗްފްލެޓް ގޭގެ 10 ވަނަ ފްލޯއިން މީހަކު ވެއްޓި އަނިޔާވެގެން ފަރުވާދޭން ފަށައިފި އެވެ.
ފުލުހުން ބުނީ އިރުއޮއްސި 18:20 ގައި ރިޕޯޓު ލިބުނު މި ހާދިސާގައި އަނިޔާވީ ބިދޭސީއަކަށް ކަމަށާއި އޭނާއަށް ފަރުވާދެމުންދަނީ އައިޖީއެމްއެޗް ހޮސްޕިޓަލުގައި ކަމަށެވެ.
އަދަދު އަށް އެނގިފައިވާ ގޮތުގައި ބިދޭސީ މީހާ ބީޗްފްލެޓް ގޭގެ 10 ވަނަ ފްލޯއިން ވެއްޓުނީ ޖެހިގެން ހުރި ގޭގެ ފުރާޅު މައްޗަށެވެ. އެގޮތުން އެ ގޭގެ ފުރާޅު ފޫއަޅުވާލާފައި އޭނާ ވެއްޓުނީ ގޭ ތެރެއަށް ކަމަށް މައުލޫމާތު ލިބެ އެވެ.
މި ހާދިސާގައި އޭނާއަށް އެކިވަރުގެ އަނިޔާ ލިބުނުއިރު، ފުރާނައަށް ނުރައްކާވާ މިންވަރުގެ އަނިޔާއެއްވެފައިވާކަން މިހާތަނަށް ސާފެއް ނޫނެވެ. އޭނާ ބީޗްފްލެޓް ގެއިން ޖެހިގެންހުރި ގޭގެ ފުރާޅަށް ވެއްޓެން މެދުވެރިވި ސަބަބެއް ނޭނގެ އެވެ.
ހާދިސާ ހިނގި ސަރަހައްދުގައި ފުލުހުންގެ ފޮރެންސިކް ޓީމުން ހަރަކާތްތެރިވަމުންދާއިރު، މައްސަލަ ތަހުގީގު ކުރަމުންދާ ކަމަށް އެ މުއައްސަސާއިން ވަނީ ބުނެފަ އެވެ.
