އެލިއާ އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ކުރިއަށްގެންދިޔަ "ބޯޓް އޮޕަރޭޓާސް ޓްރޭނިން" ޕްރޮގްރާމް ކާމިޔާބުކަމާއެކު ނިންމާލައިފިއެވެ.
މި ޕްރޮގްރާމަކީ ކަނޑުދަތުރުފަތުރުގެ ސަލާމަތާއި ރައްކާތެރިކަން އިތުރުކުރުމަށާއި، ފަންނީ ގާބިލުކަން ވަރުގަދަކޮށް، ރާއްޖޭގެ ކަނޑުދަތުރުފަތުރުގެ ސިނާއަތް ތަރައްގީކުރުމަށް އެލިއާއިން ދޭ އަހައްމިއްޔަތު ހާމަކޮށްދޭ ހަރަކާތެކެވެ.
ޖުލައި 14 އިން 16 އަށް ކުރިއަށްގެންދިޔަ މި އަހަރުގެ ޕްރޮގްރާމްގައި ރިސޯޓުތަކާއި، ކަނޑުދަތުރުފަތުރުގެ ހިދުމަތްދޭ ކުންފުނިތަކުގެ އިތުރުން ސަރުކާރުގެ މުއައްސަސާތަކުން ޖުމްލަ 47 ފަރާތަކުން ބައިވެރިވިއެވެ.
ތިން ދުވަހުގެ މުއްދަތަށް ކުރިއަށްދިޔަ މި ތަމްރީނުތަކުގައި ކަނޑުދަތުރުފަތުރުގެ ގަވާއިދުތަކާއި، ނެވިގޭޝަން ސޭފްޓީ ނުވަތަ ދަތުރުފަތުރުގެ ރައްކާތެރިކަމާއި، ކުއްލި ހާލަތްތަކުގައި އަމަލުކުރާނެ ގޮތްތަކާއި، ފަސްޓް އެއިޑް، އަލިފާނުގެ ހާދިސާތަކުން ރައްކާތެރިވުމުގެ އިތުރުން އުޅަނދުފަހަރު ދުއްވުމުގައި ގެންގުޅޭ އެންމެ ރަނގަޅު އުސޫލުތަކާ ބެހޭގޮތުން ފުރިހަމަ މައުލޫމާތު ބައިވެރިންނަށް ވަނީ ދީފައެވެ.
މި ޕްރޮގްރާމްގެ ތެރެއިން ޔަމަހާ އައުޓްބޯޑް އިންޖީނުތައް މަރާމާތުކުރުމާއި ދިމާވާ މައްސަލަތައް ހައްލުކުރުމާ ގުޅޭ އަމަލީ ތަމްރީނުތައް ވެސް ވަނީ ކުރިއަށްގެންގޮސްފައެވެ. މީގެ ސަބަބުން އިންޖީނުގެ މަސައްކަތްތައް ހަރުދަނާކުރުމަށް ބޭނުންވާ ފަންނީ މައުލޫމާތާއި، ކަނޑުމަތީގައި ދިމާވާ ހަގީގީ ހާލަތްތަކުގައި ފައިދާހުރި ގޮތެއްގައި އަމަލުކުރުމަށް ބޭނުންވާ އަމަލީ ތަޖުރިބާ ބައިވެރިންނަށް ލިބިގެންދިޔައެވެ.
ޕްރޮގްރާމް ނިންމުމަށް ބޭއްވި ރަސްމިއްޔާތުގައި، ފަންނީ ހުނަރު އިތުރުކުރުމަށް ބައިވެރިން ދެއްވި އަހައްމިއްޔަތު ފާހަގަކޮށް، ތަމްރީނު ފުރިހަމަކުރި ހުރިހާ ބައިވެރިންނަށް ވަނީ ސެޓްފިކެޓް ހަވާލުކޮށްފައެވެ. މި ތަމްރީނުތަކުގެ ސަބަބުން، މިހާރު ބަދަލުވަމުންދާ ކަނޑުދަތުރުފަތުރުގެ މާހައުލުގައި، ބޯޓު ކެޕްޓަނުންނަށް ބޭނުންވާ އިތުބާރާއި، އަމަލީ ހުނަރު އަދި ރައްކާތެރިކަމާއެކު އުޅަނދުފަހަރު ދުއްވުމުގެ ގާބިލުކަން ލިބިގެންދާނެއެވެ.
މި އަހަރުގެ ޓްރޭނިން ޕްރޮގްރާމް ކާމިޔާބުކަމާއެކު ކުރިއަށްގެންދިއުމުގައި އެހީތެރިވެދިން މޯލްޑިވްސް އިންސްޓިޓިއުޓް އޮފް ޓެކްނޮލޮޖީއަށާއި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށާއި، މޯލްޑިވްސް ޕޮލިސް ސާވިސްގެ އިތުރުން ބައިވެރިވި ހުރިހާ މުއައްސަސާތަކާއި މުދައްރިބުންނަށް އެލިއާގެ ފަރާތުން ވަނީ ޝުކުރު އަދާކޮށްފައެވެ.
ރާއްޖޭގައި ޔަމަހާ އައުޓްބޯޑް އިންޖީނުގެ އެކްސްކްލޫސިވް ޑިސްޓްރިބިއުޓަރުގެ ހައިސިއްޔަތުން، އެލިއާއިން އަބަދުވެސް މަސައްކަތް ކުރަމުންދަނީ ކަނޑުމަތީގެ ސަލާމަތާއި ރައްކާތެރިކަން އިތުރުކުރުމަށާއި، ފަންނީ ގާބިލުކަން ބިނާކުރުމަށެވެ. އަދި ރާއްޖޭގެ ކަނޑުދަތުރުފަތުރުގެ ސިނާއަތް ދިގު މުއްދަތަކަށް ތަރައްގީކުރުމަށް ކުރެވޭ މިފަދަ މަސައްކަތްތަކުގައި އެ ކުންފުނިން ދެމިއޮންނާނެއެވެ.
