ދިވެހިރާއްޖޭގައި ދިރިއުޅޭ ބަންގްލަދޭޝްގެ ރައްޔިތުންގެ ތެރެއިން އަށް މީހަކު 10 ދުވަހުގެ ތެރޭގައި މަރުވުމާ ގުޅިގެން މަސައްކަތްތެރިންގެ ހައްގުަތައް ކަށަވަރުކުރުމަށް އަވަސް ފިޔަވަޅުތަކެއް އެޅުމަށް ޓްރާންސްޕޭރެންސީ މޯލްޑިވްސްއިން ގޮވާލައިފި އެވެ.
ޖުލައި 25، އާއި އޯގަސްޓު 3، އާ ދެމެދު ހާދިސާތަކުގައި ބަންގްލަދޭޝްގެ އަށް މީހަކު މަރުވި ކަމަށް ރާއްޖޭގައި ހުންނަ އެ ގައުމުގެ ހައި ކޮމިޝަންއާ ހަވާލާދީ ރިޕޯޓުކޮށްފައި ވަނީ އެ ގައުމުގެ ނޫސްތަކުންނެވެ.
އެ މަރުތަކުގެ ތެރޭގައި މަސައްކަތުގެ މާހައުލުގައި ހިނގި އެކްސިޑެންޓްތަކާއި، ސިއްހީ ސީރިއަސް މައްސަލަތަކުގެ އިތުރުން އަމިއްލައަށް މަރުވުމުގެ ހާދިސާތައް ހިމެނޭކަން ޓްރާންސްޕޭރެންސީން ވަނީ ފާހަގަކޮށްފަ އެވެ. އެ 10 ދުވަހުގެ ތެރޭގައި ގިނައިން މަރުވީ އުމުރުން 21 އަހަރާއި 45 އަހަރާ ދެމެދުގެ މީހުންނެވެ.
އެއީ ވަކިވަކި ހާދިސާތަކެއްގެ ގޮތުގައި ބެލެވެން ނެތް ކަމަށާއި، މިއީ ބިދޭސީ މަސައްކަތްތެރިންގެ ހައްގުތަކާއި ސިއްހީ ރައްކާތެރިކަން ކަށަވަރުކުރުމުގައި ހުރި ނިޒާމީ ބަލިކަށިކަން ހާމަކޮށްދޭ ކަމެއް ކަމަށް އެ ޖަމިއްޔާއިން ނެރުނު ބަޔާނެއްގައި ބުނެފައިވެ އެވެ.
މަސައްކަތްތެރިން ރައްކާތެރިކުރުމަށް ހުރި ގާނޫނުތައް ހަރުދަނާކަމާއެކު ތަންފީޒުކުރުމާއި، މަސައްކަތުގެ މާހައުލުގެ ސަލާމަތީ މިންގަނޑުތައް ބަލައި ފާސްކުރުން އިތުރުކުރުން ޓްރާންސްޕޭރެންސީން ވަނީ އެ ބަޔާނުގައި ގޮވާލާފަ އެވެ.
އޭގެ އިތުރުން، ބިދޭސީންނަށް ސިއްހީ ފަރުވާ އާއި ނަފްސާނީ އެހީތެރިކަން ފަސޭހައިން ލިބޭނެ އިންތިޒާމު ހަމަޖެއްސުމަށާއި، އެ މީހުންނަށް ކުރިމަތިވާ ނިޒާމީ އަނިޔާތަކާއި އިހުމާލުތައް ހުއްޓުވުމަށް ވަނީ ގޮވާލާފަ އެވެ.
ގިނަ އަދަދެއްގެ މަސައްކަތްތެރިންނަށް އެމީހުންގެ ހައްގުތައް ގެއްލިގެންދާއިރު، އިންސާފު ހޯދުމަށް އެކަށީގެންވާ މަގުތަކެއް ފަހިވެފައި ނެތްކަން އެ ޖަމިއްޔާއިން ފާހަގަކުރެ އެވެ.
މަސައްކަތްތެރިންނަށް ރައްކާތެރި މާހައުލަކާއި އެކަށީގެންވާ ދިރިއުޅުމުގެ ހާލަތު ފޯރުކޮށްދިނުމަކީ ވަޒީފާދޭ ފަރާތްތަކުގެ ޒިންމާއެއް ނަމަވެސް، އެ ޒިންމާ އަދާނުކުރާ ފަރާތްތަކާ މެދު ފިޔަވަޅު އެޅުމުގައި ދައުލަތުގެ މުއައްސަސާތަކުން ފަސްޖެހޭކަން ވަނީ ފާހަގަކޮށްފަ އެވެ.
