ރާއްޖޭގައި މަސައްކަތް ކުރާ ކޮންމެ ބިދޭސީއަކަށް ވެސް އެއް ސިމްކާޑަށްވުރެ އިތުރަށް ނުލިބޭ ގޮތަށް ހަމަޖެއްސުމަށް ވަޒީރުންގެ މަޖިލީހުން އިއްޔެ ނިންމައިފި އެވެ.
އެ ނިންމުން ނިންމާފައި ވަނީ އިއްޔެ ބޭއްވި ވަޒީރުންގެ މަޖިލީހުގެ ޖަލްސާގަ އެވެ. އެ ނިންމުމަކީ ޖަލުތަކަށް ވައްދާ މޯބައިލް ސިމްކާޑުތައް ރެޖިސްޓްރީކޮށްފައިވާ ފަރާތްތަކަށް ގާނޫނީ ފިޔަވަޅު އެޅޭނެކަން ކަށަވަރު ކުރުމުގެ ގޮތުން ނިންމި ނިންމުމެއް ކަމަށް ރައީސް އޮފީހުން ބުންޏެވެ.
އެގޮތުން، ބިދޭސީއަކު ގެންގުޅޭ ސިމްކާޑު ހަލާކުވެ ނުވަތަ ގެއްލޭ ހާލަތުގައި ވެސް ފުލުހުންނަށް ހުށަހަޅައިގެން ކަނޑައެޅޭ ވަކި ޕްރޮސެސްއެއްގެ ތެރެއިން މެނުވީ އިތުރު ނަންބަރެއް ދޫނުކުރާ ގޮތަށް ހަމަޖެއްސުމަށް ވެސް އިއްޔެ ބޭއްވި ވަޒީރުންގެ މަޖިލީހުގެ ޖަލްސާއިން ނިންމި އެވެ.
އޭގެ އިތުރުން، އެކި މައްސަލަތަކުގައި ތަހުގީގަށް ހައްޔަރުކޮށް، ހުކުމެއް ކުރުމެއް ނެތި ބަންދުގައި ތިބޭ މީހުންގެ އަދަދު އެންމެ މަދު ގައުމަކަށް ދިވެހިރާއްޖެ ހެދުމަށްޓަކައި ކުރަންޖެހޭ ކަންކަން ކުރުމަށް ވެސް އިއްޔެގެ ބައްދަލުވުމުގައި ނިންމި އެވެ.
އަދި، މާލެ އަތޮޅު ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަކީ ހުރިހާ ހިދުމަތްތަކެއް ލިބޭ "ސްޓޭޓް އޮފް ދި އާޓް" މަރުކަޒަކަށް ހެދުމަށްޓަކައި އެ މަރުކަޒު އަޕްގްރޭޑު ކުރުމުގެ ކަންކަމަށް ބޭނުންވާ އެހީތެރިކަން ކަމާބެހޭ ފަރާތްތަކުން ހޯދައިގެން ކުރިއަށް ގެންދިޔުމަށް ވެސް ވަޒީރުންގެ މަޖިލީހުން އިއްޔެ ވަނީ ނިންމައިފަ އެވެ.
